9
1 Yao: bam wa ce: qug: khai: ayo, mae" phao: loe, nae" khyo majo, genae".
Joe" Lo Nae" Ayo, Mae" Kho:kham
Zebulun we' Nabhtali amyu" kaung qenho: mug: myid wa ganhae" dalhang nga: yeim: ru qhug' ako". Ngadqere: joe" lo nae" ayo, mae wa Mug:gaung: panglai: ba thug' shad' mae" Yodan gyaung: thoete' joe" sho' mae" mug: myid we' taung bug byu qe na ko" ra" Galile joe" sho' lhao" ngad: ra". Ce: mug: re nga: yhe' byid: nae".
2 Mug: cad' yo mae su" ra" amyu" byu qe wa
qi" qhang: ra" bo" bao re the' myao: avako".
Yao: bam wa aqab mung"dan: khug mae na: lo mo, ngad: ako".
Ngadqere: ana" wa yao: bam re bo" bao zho byid' na: ava".
3 Asang we"- nao wa yao: bam re ngaui bau" ru myo: sho' byid' to" ava".
Nao wa yao: bam re ngaui pyo: nhao: ava".
Byu qe yao: bam: gaug zo re yad: yu: au: bau" ru we' dakhyo:
the' sham" yu: ra" jo,nho" re yao: bam jho" gae ko" au: bau" ru we' dakhyo:
nao kad' lo: ra" lo, mau" mae yao: bam ngaui bau" ako".
4 Pe"mung:ga"re yao: bam vin: la" ra" kyau: re we'
yao: bam: lo,sin re be; ava".
Ganhae" nao: yang Midian gyetab re nao aung: pye' ruru:
ni" byumyu" qere cab' zo: zag zo: ko" ra" byumyu" re nao aung: pye' ava".
5 Jhin" vao li" ko" ra" gyezo: qenho: khyid zaung: jham we'
yao: bam: sa: de; ra" mai bau: jham wa
myi" yang ngha" pye' qhug' ako".
6 Ngonhaung" qhid' mae" zoshao khau byid' ava".
Ngonhaung" re yauggai zo: byid' to" ava".
Amung: yao: wa ngonhaung" nho: zug: ngad: li" nae".
Yao: re mug' pho: pha,jhi" byid: yaug-
qam: bo: thao" ra" Mao"So apyad ato: nho: yao: pho"
ngaui pyo: yaug yo: ra" kho:kham nau"- ga: mhang" li" genae".
7 Yao" nho: kho:kham kheim: so' wa xo' yang: qi" li" nae"-
Yao" nho: mung"dan: wa khonhae" re: ngaui pyo: yaug yo: jo, nae".
Yao: wa ana" mae" ayo, thao" sho' jo: ru we'
tarha" din: nyang: ru dao mae yao" kheim: so' re apan to: mung:
kho:kham Davi khu mae kho:kham xo' kad' yaug khyo" eib: li" nae".
Qam: bo: ra" Asang wa cegu: alhab' re kad' nae" myid: phyid' to" ava".
Israel Re Asang Qobo Dae Byid: Nae" Khyo
8 Asang wa Yuda nho: myid:zo: qe ngad ko" ra" Israel mung"dan: dao mae dao: kho' nae" ta" ke' ava".
9 Yao: ceru: kad' va" rure Israel byu qe alhab'- Samari vogaung: mae na: ra" mo, yaug khao: ngo" ba: li" genae". Ana" yao: bam wa ngad beim: mung: phug: ako".
10 Yao: bam wa- zhogam" yang kad' ra" yham jham wa gyang: gyo" byaug: avako". Ngadqere: ngonhaung" wa aijham re laug baui yham dam: tha" kad' nae" ngad: ra". Pho' ham" sag' thaung: khaung jham re lag: khyo" pye' ngadqere: aire gai: thao" ra" shaug' thaung: ngonhaung" dam: ke' nae"- ga: ta" ako".
11 Asang wa yao: bam re khe' zin: nae" qhid' mae" yao: bam: gyevo qere lhau: zhung" ke' ra".
12 Israel byu qere myug: pye' nae" qhid' mae" ba thug' shad' khyo Suri- ba vao shad' khyo Philisti bam yao: bam: nhad' re ho" ci: ako". Airu: ngad sho' ngadqere: Asang: nhag' jam: yo" ru wa mathao" ngad: ra". Yao" lo, wa qobo dae byid: nae" yheim" to" ashi".
13 Israel byu qe wa myid matha" ngad: ako". Qam: bo: ra" Asang yao: bam re qobo dae byid: ngadqere: yao: bam yao: jhao" maphaug' lo ngad: ako".
14 Asang wa Israel nho: au: jhaung qe we' mung" byu qere daba mae za: qobo dae byid' li" nae". Yao: wa yao: bam re au: we' shomyi: phyid' pye' byid' li" nae".
15 Apyad qi: mo, we' nga: ye; ra" mo, wa au: ngad mung: mhug' yang: mho" shid' ko" ra" lapa qe wa shomyi: ngad: ako".
16 Ce: mung" byu qere au: she mo, wa aibam re khyonghung: jhui" nghung: mung: bin sho' athaui: asad' kad' pye' ako".
17 Airumung: Asang wa zolau: dayaug rere: maphao: loe, nhao nae". Amung: yao: wa cug' mo" qe we' cug' zo: qemae" dayaug rere: nhag' khyag' myid maqhu" byid: nae". Pe"mung:ga"re amyu" byu qe alhab' Mao"So mabo: ru we' makhyang: mung: yao: bam ta" ru ja: khao: ngo" wa makhyang" ru ngad: ra". Airu: ngad sho' ngadqere: Asang: nhag' jam: yo" ru wa mathao" nae". Yao" lo, wa qobo dae byid: nae" ayheim" to: shinae".
18 Makhyang" ra" byu qe wa zau: kyin paung" we' zau: gae jham re nga" pye' ra" myi: we' dakhyo: nga" ako". Myikhug' athaui: thaui: thug' sho' nga" ra" byab gyi" myi: we' dakhyo: nga" ako".
19 Qam: bo: ra" Asang nhag' yo: yang: yao" qobo dae byid' ru wa mung" geim" mae myi: we' dakhyo: nga" mung: byu qere phyo' qheim" pye' ra". Byu qe wa- yao: bam: mao:nhaung: dayaug rere: matang" to: ngad ako".
20 Mung"dan: khyi" khao: ngo" mae" byu qe wa yao: bam the' qho: ru dajhid' re zo: ngadqere: yao: bam moe, gyi" khonhae" re: madang" genae". Yao: bam: zoshao qere lhao" re: yao: bam zo" li" genae".
21 Manashe we' Ephrim byu qe wa yao: cao: gye jho" zin: mung: Yuda re yao: shid' yaug daga" gye zin" ako". Airu: ngad sho' ngadqere: yao" nhag' jam: yo" ru mathao" ngad: ra". Yao" lo, wa qobo dae byid: nae" yheim" to" ashi".