7
Kho:kham Ahaza Nho: Qhid' Mae" Mungdao:
1 Uzia nho: yao: myid: Yotham nho: yauggai zo: kho:kham Ahaza Yuda mung" re eib: au: gye poe boe" li" ra". Suri kho:kham Rezin we' Israel kho:kham Remalia nho: yauggai zo: Peka wa Yerusalem re khe' zin" ako". Ngadqere: ai: vogaung: re maqo" aung: yu ngad: ako".
2 Suri gyetab jham Israel mug: myid mae li" joe" na vako" ra" ga" ra" lau dao: Israel kho:kham khyo joe" lo" lao"- yao: we' yao" mung" byu qe alhab' wa la hug' hug' rumae sag' gae jham laui" nan" ruru: yao: bam ko, ko, nin" yang: gyai gyaug: ako".
3 Asang wa Esaia re- Ni" yauggai zo: Sheara Yashub re jhui: mung: kho:kham Ahaza re yeqhug' wa,. Nao wa yao: re tho' qid kyaung" mae" qid she: yu: ra" qid khyo: athao- mai bau: zab mo, mau" zaui" ra" khyodang mae yeqhug' li" nae".
4 Yao: re so: so: za: yaug yo za: na mung: magyaug nae"- nhag' lam: manhaung" nae" qhid' mae" ta" kyo: wa,- Kho:kham Rezin we' yao" Suri gyezo: qe- Kho:kham Peka bam: nhag' yo" ru wa sag' khyaung: shid' khyaung: mae" moe: moe: mung: thug' na: ra" myikhug' tho' pe" maje: gyaug ca".
5 Suri wa Israel we' yao" kho:kham re geim lau khug' to" ra".
6 Yao: bam wa Yuda khyo jhin" vao ye: mung: yao: bam: shad' bode, sho' yekyaug' nhin" nae" seim" to" ako". Ai: thao Tabe nho: yauggai zo: re kho:kham tao" khau" mae zhaung nae" yaung: to" ako".
7 Ngadqere: ceru: khonhae" re: maboe" nae" ein: ngo Asang ta" ra".
8 Pe"mung:ga"re Suri wa yao" vomo" Damasku tho' qam: maje: bo- Damasku wa kho:kham Rezin tho' qam: maje: bo yaug ngad: ra". Israel qhid' mae" kam" wa khyaug' xe: ngo" zin gyo: mae byumyu" mung"dan: dalam: khyo" na: dang: jo, nae" gyai yao: mhan" ngad: jo; li" nae".
9 Israel wa yao" vogaung: Samari tho' qam: maje: bo ngad: ra". Samari wa kho:kham Peka tho' qam: maje: bo ngad: ra".
Naonhaung" lam khug myid mazang: qhao" ko" re wa naonhaung" re: zang: qhao" byid' ru maqhug' genae"- ga: ta" ra".
Emanuela Nho: Ve, So:
10 Asang wa Ahaza re-
11 Nao re ve, so: daja: qhu" byid: nae" ni" Mao"So Asang re mho' wa,- ai wa no; ra" movo: mug: mae"- mangad: lao" myhao: ra" mug:gaung mae gai: ngad: ra" ga: mungdao: gatau vhin: ke' ra".
12 Ahaza wa ngo wa ve, so: re mamho' nae"- ngo wa Asang re majham" qu" nae"- ga: phaug' tau" ra".
13 Esaia wa- ana" Davi nho: myid:zo: qe we"- tae" gyo: ge,- naonhaung" wa byu qere nhag' lam: maqhang mung: Mao"So rere: nhag' lam: maqhang genae" ein ko" i?
14 Airulao" wa gai va"- Asang yao: yao: ve, so: daja: naonhaung" re byid' li" nae". Aiwa- gaung la" ra" zomyi: dayaug wa yauggai zo: dayaug khau: li" nae". Yao" mang re Emanuela ga: mhang" li" genae".
15 Yao: wa yao: yao: ba: myid: phyid' ra" ayo, joe" lao"- byu qe wa nung: nug' we' byoyhid re shaug' na: li" genae".
16 Ai: ayo, majoe" shire lhao" re: naonhaung" re kyaug' nhin" na ko" ra" ai: kho:kham shid' yaug: nho: mung"dan: wa cae: jhug' tag boe" byaug: li" nae".
17 Asang wa Yuda mung" mae" Israel mung"dan: jho" kho' yu: ra" ba na mae" boe" qu" ra" qug: khai: tho' je: xo: ra" qug: khai: ba na jham re nao we' ni" byumyu" qe- ni" kho:kham yham khaung geim" dao mae boe" li" nhao nae". Yao: wa Suri kho:kham re jhui" yu: li" nae".
18 Ai: ayo, joe" lao"- Asang wa Egutu byu qere va" thao" ra" Nila gyaung: qid ko' jham mae" yao khaung: jham we' dakhyo: joe" li" genae" re:- Suri byu qere yao: bam: mung" mae" byo: jham we' dakhyo: lo, mo" mad: ke' li" nae".
19 Yao: bam wa cae: jhug tag mung: ra" lao: khaung: jham mae we' laug byo, jham mae jo; ra" laug aug' jham mae li" ham: jo, gemung: yao: bam wa zau: kyin paung" khao: ngo" we' mhin: gyo, jao: khao: ngo" mae li" byang" jo; li" genae".
20 Ai: ayo, joe" lao"- Asang wa Asuri kho:sin" ngad: ra" Uphrad gyaung: thoete' mae" au: ko' yaug re okaung lhaung: yu mung: yao: wa ni" nhad' maui: jham- ni" xae jham- ni" gaung mae" shomug' jham re qaug: pye' byid' li" nae".
21 Ai: ayo, joe" lo lao"- yo kad' zo: yaug dayaug wa nung: jaung bae: dazang we' cad' be, shid' dau: za: qo" zam" to: yang: ngadqere:-
22 Aijham wa yao: qo ca" gu: alhab' qo" sho' nug' myo: sho' thug' byid' li" genae". Ngad va"- mung"dan: mae na: dang mo, dajhid' za: ngad mung: nung: nug' we' byoyhid qhug' shaug' li" genae".
23 Ai: ayo, joe" lao"- sabyi naui dataung yaug: ra" sabyi khyae we' dakhyae re ngaui dataung phug' ra" sabyi khyae gai jham wa zau: gae we' zau: kyin paung" jham: yang se: nhai" pye' li" genae".
24 Byu qe wa ai: jo, qo khyo lo, la: jham we' myo: jham ci yang: sho: ye kung" li" genae". Ngad va"- Mung"dan: geim" wa zau: gae we' zau: kyin paung" jham byang" jo; li" nae".
25 Qhovo: lhaung" qho" ra" bug gaung jham alhab' wa ai: khyo khag' maqo" ye: losho' zau: kyin jham xo sho' yaug: nhai" pye' li" genae". Ai: jo, qo wa nung: we' yao jham mhin: lhae: zo" ra" jo, qo boe" byaug: li" nae"- ga: ta" ra".