55
Mao"So: Yang Byid' Ra" Nhag' Khyag' Ru
1 Asang wa-
qid shab' ra" mo, yaug khao: ngo" we"- li" geri: qid cemae jo; ra".
Ngaui maqo" mo, we"- li" geri: gaug zo vai zo: ge,-
sabyi qang: we' nung: nug' li" vai shaug' geri:-
ai wa naonhaung" qhid' mae" pe" aphug' maca" nae".
2 Nhag' magai: dag: ra" ja: qhid' mae" pe"mung: ngaui yhung" pye' ko" i?
Pe"mung: naonhaung" okaung phug' ngaui re yhung" pye' mung: vae: moe' na shiko" i?
Ngo re tae" gyo: mung: ngo ta" rure kad' ge,.
Naonhaung" wa gai: thao" ra" zo:ve alhab' re qo" zo" li" genae".
3 Nga" byu qe we"- ana: tae" gyo: ge,- ngojhao" lo geri-
ngojhao" lo geri:- naonhaung" kao so' qo" yu: li" genae".
Ngo wa naonhaung" we' kad' ra" dao: thang" re myao" sho' dang: jo, nhao nae".
Davi re ngo dao:so: byid' to" ra" shaman" jeju jham ngo naonhaung" re byid: nae".
4 Ngo wa yao: re au: jhaung we' byumyu" qe: gyezug: kad' nhao va".
Yao: khyo" yang nga" qam: so' re yao: bam re ngo qhu" byid: va".
5 Ana" taung bug byumyu" qere naonhaung" khai: zhang" yu: li" genae".
Yao: bam wa ganhae" naonhaung" re maba ngad: ako".
Ngadqere: ana" nao we' qhan: nae" yao: bam tao" li" li" genae".
Israel nho: gyang" lho" Mao"So ngad: ra"
naonhaung" Mao"So Asang ngo wa cegu: alhab' re boe" nhao nae".
Ngo wa nga: yhe' ru wa phungbao yao: re byid: nae"- ga: ta" ra".
6 Asang jhao" lhang: lo mung: yao: re akyu" mho' ge,.
Ana" yao: wa ajhao" mae na: ra".
7 Makhyang" ra" byu qe wa yao: bam: makhyang" ra" kao so' daui khyo re to" pye' mung:
yao: bam myid: ra" khyo re tha" pye' vageshao:.
Ngonhaung" nho: Mao"So jhao" yao: bam re lhang: lo nhao ge,.
8 Asang wa- nga" myid: qu" khyo wa- naonhaung" myid: ru we' madau nga" khyo wa naonhaung" khyo we' jho" shai" ra".
Yao: wa nhag' khyag' ru we' qobo khyad' byid: nae" phyad yaug ngad: ra".
9 Mug: khaung wa myid gaung tho' mae myhao: ra" nho"-
nga" khyo jham re nga" myid: qu" ra" khyo wa naonhaung" tho' mae myhao: ra".
10 Nga" mungdao: wa mug:gaung mae" gyo" li" mung:
myid gaung re qid sheim: byid' ra" nghin we' mug: qid we' dakhyo: ngad: ra".
Aiwa qhovo: jham re yaug nhao mung: sin: nae" myug: shi: we' zo:ve re byid' ra".
11 Ngo ta" ra" mungdao: re: ai we' dakhyo: boe" nae".
Aiwa ngo yaung: to" rure kad' boe" nae" malhaui" pye' li" nae".
Aiwa ngo zaui: nhao: to" ru ja: khao: ngo" re kad' li" nae".
12 Naonhaung" wa ngaui bau" ru we' Babelon mae" thug' lo" li" genae".
Naonhaung" wa vogaung: khug mae" ngaui pyo: yaug yo jhui" thug' lo" ru qhug' li" genae".
Bam jham we' bug gaung jham wa- nghaui"caung: li" genae".
Amung: sag' gae jham wa bau: yang: hug' li" genae".
13 Ana" zau: kyi yaug: jo; ra" jo, qo mae qhoje; gae yaug: thug' li" nae".
Zau: jham: khu mae matu gae jham yaug: thug' li" genae".
Ce wa apyad ato dang: jo, nae" ve, so: ngad mung:
Asang ngo kad' lo: va" khyo re peim: byid' ru ngad: li" nae"- ga: ta" ra".