46
1 Ce wa Babelon nho: so jham thao" lo" ra" khyo ngad: ra".
Bela we' Nebo re ganhae" caung:pa" byid' ako".
Ngadqere: ana" wa aijham re loze jham: dao mae seim" zaui: to: qhug' mung:
dug myaung" jo; ra" gug'nyhug' jham: dao kao" mae qola: boe" jo; ra".
2 So alho jham wa yao: bam yao" gaung re maqo" khyad' yu ngad: ako".
Yao: bam wa sham" yu qhug' mung: dao: cilo" pye' qhug' ako".
Ce wa Babelon nho: so jham thao" lo" ru ngad: ra".
3 Yaku nho: myid:zo: qe ngad ko" ra" nga" byumyu" na: dang mo, alhab' we"- ngore tae" gyo: gela,.
Ngo wa naonhaung" khau: li" ra" ayo, mae" gun caung byid: va".
4 Ngo wa naonhaung" Mao"So ngad mung: naonhaung" mao: mung: au: phyu yo, joe" sho' ngo naonhaung" re gun caung byid: nae".
Ngo wa naonhaung" re phan" to: mung: gun caung byid' na:-
Ngo wa naonhaung" re bao" thaug' byid: mung: khyad' yu nae".
5 Nao ngore khag' we' dau tau" nae" i?
Ngo we' dau ru gatau khag' na: i? ga: Asang ta" ra".
6 Byu qe wa yao: bam: ngaui thaung jham re phung" mung: qhang re vhe' thug' ako".
Yao: bam wa ngaui re jao mae lag: ako".
So kad' nae" qhid' mae" qhang: zai be, mo, re okaung lhaung: ako".
Ai: thao yao: bam goe; gyo" mung: aire caung:pa" ako".
7 Yao: bam aire yao: bam: lo, sin mae gaug: vo, mung: dao: lo" ako".
Yao: bam wa aire yao" jo, qo mae to" ako".
Aiwa ye; jo, mung: yao" jo, qo mae" maqo" qhui: ngad: ra".
Dayaug yaug aire akyu" yemho' re- maqo" tau: byid:-
qug: khai: kyi" khyag' rumae" re: yao: re maqo" khyad' yu ngad: ra".
8 Qobo jab naonhaung" we"-
Aire myid: beim: ge,- ngo kad' lai: lo: rure myid: qu" ge,.
9 Ganhae" pe" boe" lai: lo: rure myid: beim: ge,.
Ngo dayaug za: Mao"So ngad: rure we'
ngo we' dau: ru gatau khag' mana: rure lhang: yu ge,.
10 Boe" li" nae" khyo re aqhid mae" ngo lapa pa: to: mung:
pe" boe" li" nae" rure ganhae" gaco' mae" gau: qhid' khae" yang: ta" to: va".
Ngo yaung: to" ra" mau" jham wa khonhae" re: malhaui" pye'.
Ngo kad' nae" seim" to" ru ja: khao: ngo" re ngo kad' yaug ngad: ein: ngo ta".
11 Ngo wa ba thug' shad' mae" byu dayaug re li" nae" khai: na:-
yao: wa zeim we' dakhyo: dao" gyo" li" mung:
ngo yaung: to" ra" mau" re li" zaui" pin" li" nae" ngo ta" to: va". Aire: boe" li" nae" ngad:-
12 Aung doe; ru we' gyai va" ra" ga: jho: na ko" ra"
nhag' lam: qao: ra" byu qe we"- ngore tae" gyo: gela,.
13 Ngo wa aung doe; ra" ba na re jhao" li" nhao: na mung: ai wa dajhid' re: mava: lo:-
Nga" aung doe; ru wa thao magyo" nae".
Ngo wa Yerusalem re khyad' yu mung:
Israel re aimae ngo nga: yhe' byid: nae"- ga: ta" ra".