39
Babelon Mae" Lagyo: Qe
(2 Kh 20.12-19)
1 Ce: ayo, ko re- Babelon kho:kham Baladan nho: yauggai zo: Babelon kho:kham Merodag Baladan wa Hezekia no: ra" khyo re the' gyo" ra". Airumung: yao: wa vhin tung" we' jhaung qhu" vhin: ke' byid' ra".
2 Hezekia wa lagyo: qere lham: pang" yu mung: yao" jo,nho" ngaui- qhang- xeim: nae pyo: cid'- sheim nae pyo: ja: xau- yao" gyezai gyekhin alhab'- yao: bam re ceim" shid' ra". Yao" nho: zai to: jhi jham mae- yao" mung"dan: khyi" khao: ngo" mae yao: bam re maqhu" ru pe" daja: re: majo, lo:ngad: ra".
3 Ai: thao lapa Esaia wa kho:kham Hezekia jhao" ye: mung:- ce: lagyo: qe wa khai: mae" joe" li" mo, ngad mung: nao re pe" ta" ko" ra" i? ga: myid' ra".
Hezekia wa yao: bam wa gyai va" ra" Babelon mung"dan: mae" joe" li" mo, ngad: ako" ga: tau" ra".
4 Kho:kham kho" mae yao: bam pe" ja: re myao: avako" i? ga: myid' ra".
Yao: bam ja: khao: ngo" re myao: yu avako". Zai to: jhi mae ngoyang yao: bam re maqhu" ru pe" re: majo, lo:- ga: tau" ra".
5-6 Alao" Esaia wa kho:kham pho" re ni" kho:kham kho" mae jo; ru ja: khao: ngo"- ana" ba joe" sho' ni" phug' pho" qeyang qhaung: to" ru ja: khao: ngo" wa Babelon khyo tai: lo" nae" ayo, joe" lo: na: ra". Pe" ja: re: madang nae".
7 Naoyao" myid:zo: qemae" xo' gyo" lo: ra" mo, daqhae: wa taung" jhui" lo" ru qhug' mung: Babelon kho:kham kho" mae caung da" byid: nae" unug kad' pye' qhug' li" genae"- ga: qam bo: ra" Asang ta" ra"- ga: ta" kyo" ra".
8 Kho:kham Hezekia wa ce wa yao" apyad gyo: gu: mae ngaui pyo: yaug yo: ru we' gug: gam ru qo" nae" ngad: ga" ra" lajheim: re ba: gyo" yu yang: yao: wa- nao: yang ngore byid' ra" Asang mae" joe" li" ra" mungdao: wa gai: ra"- ga: phaug' tau" ra".