18
Ethiopia Re Mao"So Qobo Dae Byid' Li" Nae"
1 Ethiopia qid gyaung: jham: thoete' mae jo; ra" mung"dan: mae daung phab' thoe the' gyo" ra".
2 Ai: mung"dan: mae" lagyo: qe wa qid phaung yao" yang kad' to" ra" lha khyo" Nila gyaung: khyo joe" gyo" lo: ako". Qao: ra" lagyo: qe we"- yham phao: lo" ge,- qid gyaung: jham: yang kho' to" ra" naonhaung" mung"dan: khyo- qam: bo mung: kheim: so' qi" ra" naonhaung" byumyu" jhao"- mug: myid byu alhab' yang ceim" gyaug: ra" gaung qhang yang: sho: yaung" ra" naonhaung" mung" byu qejhao" mungdao: dam: vin: tug' lo" ge,.
3 Mug: myid dao mae na mo, yaug khao: ngo" we"- tae" gyo: ge,- bam au: jham: dao mae to" to" ra" ve, so: khyi jham re qu" ge,- labo" mad: ra" ve, so: khyi jham re qu" ge,- labo" mad thoe re tae" gyo: ge,.
4 Asang wa ngore gaug yad yo, mae" lam: ra" myi na jham mae nghin boe" li" ru we' dakhyo:- na" gaung mae zo" mae" zho: laung byid' ra" ba we' dakhyo:- ngo wa mug: khaung mae" qu" khyo" ke' nae".
5 sabyi shi: maphyo' yu shire- abu" jham alhab' shu: gyo" lo" byaug mung: sabyi shi: mhang" yid: jo; au: sabyi naui akaung jham re shae: yang xe" phyid' au: laui: ra" qhi" gyevo qe wa Kusha byu qere phyo' qheim" pye' li" nae".
6 Yao: bam: gyezo: qe: sushid mao gaung jham wa ngho' jham- seyo: gug'nyhug' lhe: jham: qhid' kheim: mae shid: lang" jo; li" genae". Xaung: gaung mae ngho' jham zo" gyi: mung: gyo, yo, mae gug'nyhug' jham zo" gyi" yu: li" genae".
7 Qid gyaung: jham: yang kho' to" ra" ce: mung"dan:- ce: qam: bo: ru we' kheim: so' qi" ra" byumyu"- mug: myid byu qe alhab' yang ceim" gyaug ko" ra" ce: gaung qhang: ru we' sho: yaung" ra" byumyu" qeyang qhaug' byid' ra" ngaui" xeim: jham re qam: bo: ra" Asang qo" khae: yu nae" ayo, joe" lo: na: ra". Yao: bam wa qam: bo: ra" Asang re caung:pa" byid' ra" jo, qo Ziun bam khyo yao: bam joe" lo: li" genae".