ESAIA
(ISAIAH)
Dao: Phung"
Esaia mugsug' wa BC 800 zin je khaung lo" thao" phyao: Yerusalem mae na: lai: lo" ra" lapa mo" dayaug: nho: mang yu yang: mhang" to" ru ngad: ra". Ce: mugsug' re akhyag adau qi: sam dau gai: kho' ra".
1) Adau qi: 1-39 wa mug: thao shad' Yuda mung"dan: re kheim: so' qi" ra" yham kyo: cao: Asuri mung"dan: yang kyaug' nhin" na: ra" au: thug' li" ru ngad: ra". Yuda qhid' mae" kyaug' nhin" ru agyang" wa qam: qi" ra" Asuri yang za: mangad:- ai: mung" byu qe yao" qobo jham we' Mao"So re maphug' cao" mung: yao: re lam khug: ra" myid mabo yang: boe" ru ngad: ga: Esaia yang myao byid' ra". Lapa wa mung" byu qe we' au: jhaung qere myo, mae de: de: myao: ra" dao: tau" jham khyo" khai: yao mung: dangman" ru we' tarha" din: nyang: ra" kao so' daui: na genae" qhid' mae" re: Mao"So re matae" gyo: gengad: re jeim" lo" ru we' byo,qeim: ru qhug' nae" ga: ta" peim" to" ra". Esaia wa mug: myid geim" ngaui pyo: yaug yo: ra" ayo, we' kho:kham aso: gai boe" ra" kho:kham boe" nae" Davi nho: myid:zo: dayaug joe" li" nae" khyo re gau: qhid' khae" yang: ta" to" ra".
2) Adau qi: 40- 55 wa Yuda mung" byu qe myo: sho' mo, Babelon mae pyaung" nha: to: qhug' mung: nhag' lam: gyug' ru we' myid: lao" khyo maqo" ra" ayo, mae thug' li" ru ngad: ra". Lapa wa Mao"So: yang yao" byumyu" re loe, beim nhao: ke' mung: apyad asag' lo" dam: qhid genae" qhid' mae" Yerusalem khyo jhui" lo" nae" ga" rure ta" hau" ra". Ce: adau qi: jham mae" xam" to: gai: ra" dao: au: wa- Mao"So wa mhomyi: saung seim Asang ngad mung: yao" byumyu" qhid' mae" yao: myid: yaung: kyae: to" rumae yao: bam khyo" yang shaman" jeju qo" yu genae" gatau: byumyu" qere yao: sasana vao ca" ga" ru bobo: ra". Asang: daui daui yaug ga" ra" dao: abang: jham wa Dao: Thang" Axug' mae" gai: thao" mae bobo: ra".
3) Adau qi: 56- 66 myo: phyao: wa Yerusalem mae dam: lojoe" na: ra" ai: byumyu" re Mao"So byid' to" ra" dao:so: kad' lhoe" byid: nae" rure dam: ta" jhaug' ru ngad: ra". Dangman" ra" khyo we' tarha" din: nyang: ra" khyo gyai ca" shi" ra" ga: ta" mung: Dugno: Ba mae cao" ye: ca" ru- xeim: ngaui" byid' ru we' akyu" mho' ra" khyo jham rere: bota" to" ra". Xam" to: gai: ra" dao: bang: dadau wa 6.1- 2 mae bo: ra" dao: ngad mung: ai: dao: bang: re Yesu sasana qhid: lo" ra" au: khai: yu: ra" khyo" ci: ra".
1
1 Ce: mugsug' paug' mae Yuda kho:kham qe ngad ko" ra" Uzia- Yotham- Ahaza- Hezekia bam eib: ra" ayo, gyo: mae Amod nho: yauggai zo: Esaia re Mao"So: yang qhu" byid' ra" Yuda mung" we' Yerusalem vogaung: khyo re ta" ra" mungdao: jham bobo: ra".
Yao" byumyu" Re Mao"So Qeim: Ra" Khyo
2 Asang wa mug:gaung we' myid gaung we"- ngo ta" na: rure tae" gyo: ge,- ngoyang khau: qhi" ke' ra" zoshao qe wa ngore geim lau to" ako".
3 Nung: jham wa yao: bam re khag' yang sang: rure ba mung: loze jham wa yao: bam: Asang yao: bam re khai: mae zho" rure ba: ako". Aiwa nga" byumyu" Israel qe ba: ru tho' je: ra". Yao: bam dajhid' re: maba: gyo: ngad: ako".
4 Qobo kad' ra" byumyu" nao ave, qeim: ru we' makhyang" ra" byumyu" nao we"- nao wa jeim" byaug: ava". Ni" qobo jham wa nao re she: khyad' khyo" pye' ava". Naonhaung" wa Israel nho: gyang" lho" ra" Mao"So Asang re ngag: lhaui" pye' mung: naonhaung" wa yao: re nhaung thao" phaug' pye' avako".
5 Pe"mung: naonhaung" mathang lo: geim lau to" na ko" i? Qobo dae je: myo: sho' byid: nae" rure naonhaung" o ko" i? Israel we"- ni" au: wa dae khu za: byang" sho' ngad: jo; ava". Ni" aung khug nhag' lam: we' myid wa no: na: ava".
6 Au: mae" khyid joe" sho' gai: ru datau re: majo, lo:ngad: ra". Naonhaung" gaung wa thaung" khyad' cad' ra" dae- dae jad: dae khu jham byang" sho' ngad: ava". Naonhaung" nho: dae khu jham wa macid' san: pye'- mathab' pye' qu" ngad: ra". Aijham re xau magyad: qu" ngad: ako".
7 Naonhaung" mung"dan: wa cae: jhug tag ngad: byaug mung: naonhaung" vogaung: jham wa myid gaung mae nga" gyoe; bam: jo; avako". Nao qu" na: au: yao: taung bug byu qe wa ni" mung"dan: re sang: yu: pye' mung: ja: khao: ngo" re phyo' qheim" pye' ako".
8 Tug' lhe: nae" go majo; ra" sabyi khyae lhaug' yaug: zaung khyae: we' lakhu: khyae mae" zaung khyae: ru: vogaung: wa vang" to" ra" qao: mae Yerusalem za: dang: jo; ra".
9 Qam: bo: ra" Asang wa byu damyo" re mana: dang nhao re Yerusalem wa Sodom we' Gomora ru: bin sho' phyo' qheim" pye' ru qhug' nae" ngad: ra".
10 Yerusalem we"- ni" zug: qe we' ni" mung" byu qe wa Sodom we' Gomora mae" mo, we' dau: ako". Asang naonhaung" re ta" na: rure nyang" tae" gyo: ge,. Ngonhaung" Mao"So naonhaung" re pe" ja: mho" na: rure nyang" gyo" yu ge,.
11 Naonhaung" ngore abang mabyid ngaui" byid' na ko" ra" ngaui" xeim: aijham alhab' re ngo o: ra" ein: jho ko" i? Ngaui" xeim: jham khyo" phad' ngaui" byid' ra" yao jham we' naonhaung" yaung" ra" gug'nyhug' jham: nho: xau tho' ngo je: qo" ra". Ngo wa nung: jaung lo: jham- yao jham- cad' be, jham: sa: re nghang: va".
12 Naonhaung" ngore caung:pa" nae" li" ko" au:- cejham alhab' re ngojhao" cili" nae" qhid' mae" naonhaung" re khag' mho' ra" i? Nga" Caung:pa" Yham mae cegu: re kad' yang: li" zab: nhe" pye' nae" khag' ta" ra" i?
13 Naonhaung" nho: ngaui" xeim: jham aje amyid cili" ako". Naonhaung" phad' ngaui" ra" sheim nae pyo: xau sheim re ngo ca' ra". Ngo wa naonhaung" lho" xin: poe- Dugno: Ba we' naonhaung" caung:pa" thung" phaung re ngo- manug: bobo- aijham wa naonhaung" qobo jham: mathao mae alhab' qeim: byaug: ako".
14 Naonhaung" nho: lho" xin: poe jham we' gyang" lho" ba na jham re ngo nghang" ra". Aijham ngo vin: la" na: ra" qola: jham ngad: ako".
15 Naonhaung" lo, tau yang: akyu" mho' ko" au:- naonhaung" re ngo maqu" nae". Naonhaung" khonho" akyu" mho' mho' matae" gyo: byid: nae". Pe"mung:ga"re naonhaung" lo, wa sa: za: ngad: ako".
16 Naonhaung" yao" gaung re san sho' kad' pye' ge,- naonhaung" kad' na: rure ngo myao: ra". Ce: makhyang" ra" mau" alhab' re thang: pye' ge,. Ngad va"- makhyang" ra" mau" re thang: pye' mung: jo: ru kad' nae" zhao: yu ge,.
17 Tarha" din: nyang: rure cao" ge,- zag zo: qhug' mo, re bao" thaug' byid: ge,- cug' zo: qere yao: bam qo" yu ang: ra" akho: akhang" byid: ge,- cug' mo" qere gug: gam ge,- ga: Asang ta" ra".
18 Asang wa ana"- ai: mau" re sho' pye' gelang: naonhaung" qobo wa sa: ru: ne: de; jo; ra". Ngadqere: ngo wa naonhaung" re gyu: ru: phyu sho' cid' pye' byid: nae". Naonhaung" byao byao ne sho' de; jo, ngadqere: yao mug' ru: naonhaung" phyu: li" genae".
19 Naonhaung" ngore mho dao: gyo: ko" re wa myid gaung mae" thug' ra" qhovo: ashi: gai the' zo" li" genae".
20 Ngadqere: naonhaung" ngore masan masin" kad' pye' ko" re wa naonhaung" shid: dam: genae"- Asang ngo ta" to: va"- ga: ta" ra".
Qobo Jab Vogaung:
21 Ganhae" jhaug' zaug: lo: ra" vogaung: wa shava myhi" ru: kad' na: ra". Ganhae" dalhang ai: vogaung: wa din:man: mo, byang" sho' na: lo: ako". Ngadqere: ana" wa byu se' mo, za: na: dang: jo; ako".
22 Yerusalem we"- ganhae" nao wa ngaui we' dau: lo: ra". Ngadqere: ana" nao wa pe" phug' made, lo:ngad: ra". Nao wa sabyi qang: gai we' dau: lo: ra". Ngadqere: ana" nao wa qid cin za: angad lo" ra".
23 Ni" au: jhaung qe wa tau: lhan: mo, we' khug' hab' qe: ba nam qe za: ngad: ako". Yao: bam wa khonhae" re: jhaung qhu" jham we' khug vag: jham re khae: yu mo, ngad: ako". Yao: bam wa cug' zo: qere tarha" yung" mae khonhae" re: mabo ta" qid' byid:- cug' mo" qe: mung mau" re khonhae" re: matae" gyo: byid: mo, ngad: ako".
24 Airumung: ana"- Israel nho: kheim: so' bo: ra" Mao"So- qam bo: ra" Asang ta" na: rure tae" gyo: wa,- Asang wa gyevo nao re ngo lage, phaug' nae". Ailao" nao wa ngore aqug: akhai: maboe" nhao lo nae".
25 Nao re ngo qobo zaug' nae". Ngo wa to' re kyang" ru we' dakhyo: nao re kyang" mung: ni" nho: magyang" rure khyad' pye' byid: nae".
26 Ganhae" nao lhaung" qo" qu" ra" mo, ru" ra" zug: qe we' pha,jhi" byid: mo, re nao re ngo byid: nae". Ailao" Yerusalem wa- din:man: jhaug' zaug: ra" vogaung: ga: mhang" ru qhug' nae"- ga: ta" ra".
27 Asang wa din:man: yaug ngad: ruyang yao: wa Yerusalem re we' aimae na: ra" myid tha" mo, yaug khao: ngo" re khyad' yu: li" nae".
28 Ngadqere: qobo kad' mo, we' yao: re tau: lhan: mo, yaug khao: ngo" re wa khyoe' pye' li" nae". Yao: re shapye' mo, yaug khao: ngo" re yao: se' pye' li" nae".
29 Sag' gae jham we' qho" to" ra" gyang" lho" khyae jham re nao caung:pa" lo: rure nao nhag' kaug' li" nae".
30 Nao wa shid: lo" na: ra" shikhai: gae we' khag' yang qid masheim" ra" bin: khyae we' dakhyo: jhoe' nyhaung: lo" li" nae".
31 Myijhang" yang zin: nga" lo" ra" khovho we' dakhyo: za:- kheim: so' qo" ra" mo, wa yao: bam yao" makhyang" ra" lo,mau" yang yao: phyo' qheim" pye' qhug' li" genae". Ai: byo; qeim: rure khag' re: maqo" tam" pye' genae".