9
Israel Re Qobo Dae Byid: Nae" Khyo Hosea Ta" Hau" Ru
1 Israel byumyu" qe we"- Mao"So re malam mo, we' dakhyo: naonhaung" poe kad' rure to" pye' ge,. Naonhaung" wa naonhaung" nho: Mao"So mae" phaug' lo" mung: yao: re jhaug' mazaug lo: ngad: ako". Damang: geim" mae naonhaung" yao" gaung re shava myhi" we' dakhyo: Bala so re aung: zo" pye' avako". Aimung: yao" yang naonhaung" re byid' ru ga: myid: jho: ra" gaug zo re jhid'de; avako" lhe"-
2 Ngadqere: khomyhao" makyo re naonhaung" wa gaug zo khaung: we' zhanlun xau: mathae: qo" lomung: sabyi qang: re: majo; byaug nae".
3 Israel byumyu" qe wa Asang: mug:myid mae mana lo: gemung: Egutu khyo dam: tug' phao: lo" ca" genae"- Kham" to" ra" zo:ve re Asuri mae zo: ca" li" genae".
4 Ai: taung bug: mang: jham mae- yao: bam wa Asang re sabyi qang: maqo" ngaui" byid: genae". Yao: re ngaui" xeim: re: maqo" ciye: byid: genae". Yao: bam: zo:ve wa- sushid yham mae zo: shaug' ko" ra" zo:ve we' dakhyo: aire zo: mo, yaug khao: ngo" wa masan masin" boe" li" nae". Aire yao: bam: moe, shab' ru qo" baui: nae" qhid' mae" za: zo: shaug' cili" genae". Aigu: mae" daja: rere: Asang: Caung:pa" Yham khyo- ngaui" xeim: khyo" ma ciye: genae".
5 Aimung: Asang re nga: yhe' ra" poe kad' nae" ayo, joe" li" ra" au: re yao: bam pe" kad' genae i?
6 Qug: khai: qam" joe" mung: ai: byumyu" qe phao: sin" lo" ra" au: re- Egutu qe we' yao: bam re sham" zhang: yu: li" genae". Yao: bam re Memphi mae nyhab' pye' nae" qhid' mae" sham" zhang: yu: li" genae". Yao: bam: ngaui jo,nho" zai kug jham we' yao: bam: yham jo; lai: lo: ra" jo, qo yham qo jham wa mhin: jham: yang se: nghoe' pye' mung: myo, we' zau: kyin jham: yang yaug: nhai" pye' li" genae".
7 Qobo dae byid: nae" ayo, wa joe" jo; va". Ai: byumyu" qe yao: bam qo" de, zo: nae" man: qi" ru qo" yu nae" ayo, joe" va". Airu: boe" lo: ra" au: re- ai re Israel qe ba: li" genae". Naonhaung" wa- ce: lapa pho" wa- kopyad' ngad: ra". Ce: byo qam: bo yaug wa sa: qeim: ra"- ga: ta" ako". Byu naonhaung" wa- naonhaung" nho: qobo saung" thau mung: ngore nghang" ako".
8 Mao"So wa yao" nho: byumyu" Israel re ta" peim: nae" qhid' mae" ngore nhao: ke' va". Ngadqere: ngo khai: ye: khai: mae naonhaung" wa ngho' re we' dakhyo: ngore lha" khae nae" phin" ako". Mao"So nho: Caung:pa" Yham mae lao" re: ai: byumyu" qe wa lapa pho" nho: gyevo jham boe" ako".
9 Yao: bam wa Gibea mae" we' dakhyo: yu nae" magai losho' makhyang: mashab ngad: ako". Mao"So wa yao: bam: qobo re xam" ci mung: ai: mathao mae yao: bam re qobo dae byid' li" nae".
Israel Nho: Qobo We' Ai Mae" Boe" Lo: Ra" Athao Jham
10 Asang wa- Israel re ngoyang sao qhid' the' qhug' qho: myao: re din"pyad' yo mae" sabyi shi: qho: qhug' ru we' dau: ra". Naonhaung" nho: phug' phyid' qere ngo: yang sao qhid' qhug' myao: ra" au: re pho' ham" shi: mhang" yo, re mhang" qhid: li" ru the' myao: ru we' dau: ra". Ngadqere: yao: bam wa Peora bam mae joe" lo: re Bala so re caung:pa" qhid: li" ako". Aimung: khomyhao" makyo re yao: bam wa yao: bam jhid'de; ra" so jham we' dakhyo: ca' naeru" ru boe" li" ako".
11 Israel nho: qi" qhang: ru wa- ngho' we' dakhyo: dao" phao: byaug li" nae". Aimung: yao: bam mae zo: dau makhau: li" lo: genae". Gaung la" ra" myiqe: qere: mana lo: genae". Zo: dau khag' re: made, lo: genae".
12 Yao: bam zoshao qere khau: qhi: gesho' ngadqere: aibam re ngo jhui" yu: pye' byid: mung: adaui dayaug re: matang" to: byid: nae". Ngo: yang ce: byumyu" re shapye' to: co' lao" yao: bam mae gyaug: din ja: jham boe" genae"- ga: ta" ra".
13 Asang we"- yao: bam: zo: dau qere ceim" khe' zin: mung: se' pye' rure ngo qo" the' myao byid' ra".
14 Ce: byumyu" qere nao: yang:- pe" khoru: kad' byid: nae" qhid' mae" nao re ngo pe" mho' nae" laug i? Yao: bam: myiqe: qere bug daung: boe" nhao wa. Yao: bam: nau" nin" qere nug' maqhug' jhaug' nae" khyo" kad' byid: wa,.
Israel Dao Mae Asang: Yang Dao: Kho' Ru
15 Asang wa- Yao: bam: makhyang: mashab: mau" zo" alhab' wa Gigala mae" qhid: lo: ra". Ai: jo, qo mae yao: bam re ngo sao qhid' nghang" qhid va". Aimung: yao: bam kad' lai: lo: ra" makhyang: mashab: mau" mathao mae- ngo wa yao: bam re nga" mug: myid mae" khe' thug' pye' nae". Ngo wa yao: bam re majhid'de; lo nae"- yao: bam: zug: ade, au: jhaung alhab' wa ngore tau: lhan" avako".
16 Israel byumyu" qe wa- agyi: kyaug' byaug mung: ashi: mazaui: lo" ra" qhovo: gae we' dau: ako". Yao: bam wa zo: dau maqo" genae". Zoshao qe to" qo" gengadqere:- yao: bam gyai jhid'de; ra" zoshao qere ngoyang se' pye' byid: nae"- ga: ta" ra".
Lapa Pho" Wa Israel Nho: Khyo Re Ta" Ru
17 Ngo caung da" byid' ra" Mao"So wa yao" byumyu" re ngag: lhaui" pye' nae". Pe"mung:ga"re yao: bam wa yao" mho dao: matae" gyo: yang: ngad: ra". Yao: bam wa- byumyu" qe: phaung gaung: mae na: du" lae" qin" ca" li" genae".