HOSEA
(HOSEA)
Dao: Phung"
Lapa Hosea wa Samari vogaung: byo; qeim: lo" ra" BC 721 zin majoe" shire qug: khai: dayin dayo: boe" ra" ayo, gyo: mae- Israel byumyu" qenho: mug: am: mung"dan: mae Lapa Amo thao re mungdao: kho" kyo" ra" lapa ngad: ra". Mao"So re malam ko" rure alokho" ra". Hosea wa ce: lam: khug: myid mabo: ko" rure- yao: yao" ug' khug' dinkhu: mae jhaug' mazaug: ra" myiqe: dayaug we' na: byo; lo" rure- ve" ve" alho tau" qhu" ra". Yao" yham sang myhi" Gome wa yao: re nhaung thao" phaug' jhaug' mazaug: ru we' dakhyo: Mao"So: byumyu" qe wa Asang re shapye' co' ako". Ceru: mung: yang: Israel dao mae dao: kho' ru joe" li" nae". Ngad sho' qere: lo" thao" mae wa Mao"So: yang yao" byumyu" re jhid'de; ra" mabaui mabyo; jhid'de; myid wa jo; dang: jo; ra". Aimung: yao" byumyu" re yao: yao: jhao" dam: jhui" tug' yu mung: zam" khug: xo' taui" rure dam: nyhang" ra". Ce: jhid'de; myid wa nhag' lam: mae zao" ra" dao: kheim: jham mae qhu" byid' to" ra". Aiwa Israel we"- Nao re ngo khoru: tho' to" pye' nae" laug i? Nao re ngo khoru: qo" shapye' pye' nae" laug i? Nga" nhag' lam: wa airu: kad' nae" maqad ngad: ra". Nao re jhid' ra" nga" myid wa gyai qam: bo: ra" ga" ru ngad ra".(11.8) Yao: wa solho re caung:pa" ra" mo, we' yao: bam mae" so re jhaug' mazaug: ga: ta" ra" dao: jham ci yang: qhu" byid' to" ra".
1
1 Ce: mungdao: wa Yuda mung" mae Uzia- Yotham- Ahaza we' Hezekia bam kho:kham boe" mung: Israel mung" mae Yehoasha nho: yauggai zo: Yeroboam kho:kham boe" ra" ayo, gyo: mae Beri nho: yao: zo: Hosea re Asang: yang byid' ra" mungdao: ngad: ra".
Hosea Nho: Yham Sang Myhi" We' Yao: Zo: Qe
2 Hosea khyo" yang Israel byu qere Asang sao qhid' dao: jhau: au: yao: wa Hosea re- Myi: yeyu wa, Ni" yham sang myhi" wa jhaug' mazaug' yaug ngad nae". Amung: ni" zo: qe wa yao: we' dakhyo: yao: ngad: li" genae". Ai we' dakhyo: nga" byumyu" qe wa ngo re to: co' gemung: jhaug' mazaug mo, boe" li" genae"- ga: ta" ra".
3 Aimung: Hosea wa Diblaim nho: myiqe: zo: Gome ga: mang yaug re lo, xo' yu: ra"- zoqhid' yauggai zo: khau thao re-
4 Asang wa Hosea re- Yao: re Yezre ein: mhang" wa,- pe"mung:ga"re Yezre mae Israel kho:kham nho: phug' pho" Yehu yang byuse' ra" mathao mae Israel kho:kham re qobo dae byid: nae" mamyao" lo:- Ngo wa Yehu nho: kho:kham byuxag' re thao" nhao naeva".
5 Yezre lao: khaung: mae ai: ayo, re Israel nho: gye qam: re ngo phyo' qheim" pye' nae"- ga: ta" ra".
6 Gome wa shid' yaug ein: nae" zoshao dam: qo" ra"- Ce:lhang mae" wa myiqe: nau" ngad: ra". Asang wa Hosea re yao" mang re Majhid' De, Yaug ein: mhang" wa,- pe"mung:ga"re ngo wa Israel byumyu" re jhid'de; myid maqhu" byid: lo nae". Yao: bam re qobo makhyad' byid: lo nae".
7 Ngadqere: Yuda byumyu" qere wa ngo: yang jhid'de; myid qhu" byid: nae". Yao: bam: Mao"So Asang ngo wa yao: bam re khyad' yu nae" ngadqere: ngo wa ai: rure gyekhe' mang: zin: mau" khyo" makad' nae". Shae pyang:- lo, la:- myo: khe'- myao: we' myao: jui: sulhe: jham maci nae"- ga: ta" ra".
8 Gome wa yao" myiqe: zo: re nug' bin: kao thao re gaung dam: la: mung: yauggai zo: dayaug dam: qo" ra".
9 Asang wa Hosea re- Yao: re Nga" Byumyu" Mangad: ein: mhang" wa, pe"mung:ga"re Israel byumyu" wa nga" byumyu" mangad:- ngore: yao: bam: Mao"So mangad:- ga: ta" ra".
Israel Re Dam: Tau: To' Nae"
10 Israel byumyu" wa panglai: mae" ma coe we' dakhyo: matho' nghe' matho' lag lo:sho' myo" li" genae". Ana" Mao"So wa yao: bam re- Naonhaung" wa nga" byumyu" mangad:- ga: ta" ra". Ngadqere: daba: ba na mae wa- Naonhaung" wa daui: na: ra" Mao"So: yao: zo: qe ngad:- ga: ta" nae" ba na joe" li" nae".
11 Yuda byumyu" qe we' Israel byumyu" qe wa dadang: dalam: dam: boe" byaug: li" genae". Yao: bam wa yao: bam yao" qhid' mae" au: she yaug dayaug re za: khyin: yu: li" genae". Aimung: yao: bam wa yao: bam: mug:myid mae dalhang dam: qi" qhang mung: na: dai: li" genae". Ngad va"- Yezre ba na wa ba na mo" daba ngad: li" nae".