HABAKUG
(HABAKKUK)
Dao: phung"
Lapa Habakug nho: dao: thoe wa BC 700 zin thao" lo" qid mae Babelon qe kheim: so' we' eib zo" na: ra" au: re pa: ra" lapa dao: ngad: ra". Yao: wa ai: makhyang" ra" byumyu" qenho: aqan alan mau" mathao mae nhag' lam: shug mung: Asang re dao: myid' ra". Aire yao: bam tho' je: din:man" ra" mo, re phyo' qheim" ra" au: nao pe" mung: sae za: tae: to" i?(1.13)
Jham: paug' nho: dang: ra" jham: dau gu: wa madin: man: mo, phau: zo: nae" ra" byuxa: voqoe, we' sin" ra" lapa dao: ngad mung: lo" thao" dau wa Mao"So qi" qhang: ra" khyo re caung:khin" ra" thoe we' dao: zham" zham" yang: aung khug mae bo: jo; ra" lam khung: myid re tung" to" ru ngad: ra".
1
1 Ce wa lapa Habakug re Asang: yang qhu" byid' ra" mungdao: ngad: ra".
Tarha" Madin: Vang" Rure Habakug Nyhung: Ru
2 O" Asang we"- nao: yang tae" gyo: byid: nae" ayo, joe" sho' re: ngonhaung" re aqan alan mae" nao: yang khyad' yu nae" ayo, joe" sho' re: bao" thaug' ru qhid' mae" khomyhao" myao" sho' ngo mho' yao: na ca" nae" i?
3 Airu" ra" qug: khai: jham re pe" mung: ngore myao: nhao: ra" i? Airu" ra" shad' nghung" rure nao khoru: tho' qu" to" i? Nga" avai: ayae mae phyo' qheim" ru we' aqan alan lo, mau" byang" jo, mung: khyi" khao: ngo" mae jho" ke' se' ru we' myan" myo: mung: jho" byo; ako".
4 Tarha" wa qam: nang: mung: pe" akyu" mabo ngad: ra" ai: tarha" din: vang" ra" khyo" khonhae" re: maboe" makhyang: mashab mo, wa din:man: mo, tho' mae gai: na mung: tarha" din: vang" khyo wa nghung" lo" byaug va".
Asang Phaug' Tau" Ra" Dao:
5 Aimung: Asang wa yao" byumyu" qere naonhaung" nho: avai: ayae mae" byumyu" qere mathang lhaug' qu" na ge,. Aire naonhaung" the' myao: ruyang mug' byaug genae"- naonhaung" the' gyo: lao" matho' lam" naepho" ru ngo kad' ke' nae".
6 Ngo wa ai: qu" gyaug pho: sae za: maba: na: ra" Babelon byumyu" qere kheim: so' bo nhao nae" yao: bam wa mug:myid dao mae" gaje: mug: jham re khe' aung: yu nae" ga: seim" thug' li" ako".
7 Yao: bam wa gyaug ja: we' din ci" ja: re pyo: sin" ke' mung: yao: bam: ngad beim" ra" khyo mae yao: bam nug: khyo: tarha" to" ako".
8 Yao: bam: myao: jham wa nintin jham tho' mye, mung: vae: moe' na: ra" zag ne jham tho' je: lhe" ako". Yao: bam: myao: jui: gyetab wa va" ra" mung" mae" jui" li" ako". Yao: bam wa zeim baung" yang qo, nau" taung: zo" ru we' dakhyo: khe' gyo" li" ako".
9 Yao: bam: gyetab jham wa phyad za: aung doe: ru we' to" ye: mung: yao: bam joe" li" au: yaug khao: ngo" gyaug: din: ako". Yao: bam: yang taung" yu: ra" byu jham wa ma coe ce' nho" myo" ako".
10 Yao: bam wa kho:kham qere maphug' makhyad' kad' mung: zug: qere qi: pye' ako". Khoru" ra" gyetab vogaung" yang re: yao: bam re maqo" tam" yao: bam wa myid zhai: vin: bam" mung: aire sang: pye' ako".
11 Ai: thao yao: bam wa la we' dakhyo: dao" lo mung: lai: lo" ako". Yao: bam: kheim: so' wa yao: bam yao" so ngad: ako".
Asang Re Habakug Dam: Nyhung: Ra" Khyo
12 Asang we"- sao qhid' maqhid mae" yao: nao wa Mao"So ngad: ra". Nao wa gyang" lho" ru we' apyad ato mae nga" Mao"So ngad: ra". Nga" Mao"So we' ngore gug:gam byid' ra" Asang we" nao wa Babelon byumyu" qere khyin: yu mung: yao: bam: yang ngonhaung" re qobo dae qo" byid gesho' nao wa yao: bam re qam: bo nhao: ra".
13 Ngadqere: ceru" makhyang" ra" pyag' hab' qere nao khoru: lhaung" tho' qu" to" ra" i? Ni" myo, wa gyang" lho" rumung: makhyang: mashab: rure maqu"- aimung: shad' ru kad' ra" byu qere nao maqo" qu" to: ngad: ra". Are yao: bam tho' je: din:man: mo, re phyo' qheim" ra" au: nao pe" mung: sae za: tae" to" i?
14 Nao wa byu qere ngo: jham we' dakhyo:- yao: bam re khyoshid' nae" zug: au: jhaung maqo" ko" ra" bathaung bajin: jham re we' dakhyo: khoru: tho' qu" to" ra" i?
15 Babelon byu qe wa ngo: jham re we' dakhyo: ngomyhad' yang ngoe" yu: ako" yao: bam wa byu qere geim mae she: khyad' yu mung: qo" taung" yu: ra" mo; mathao mae ngaui bau ngaui lho" hug' ako" lhe"-
16 Yao: bam: nho geim jham wa yao: bam re ja: khao: ngo" mae" gai: thao" rure the' yu nhao mung: yao: bam: geim jham re lhao" re: caung:pa" mung: aijham re ngaui" xeim: ngaui" byid' ako". Pe"mung:ga"re yao: bam: geim jham wa ja: khao: ngo" mae" gai thao" rure yao: bam: qhid' mae" qo" yu byid: yang: ngad: ra".
17 Yao: bam wa apyad ato mae yao: bam: shae pyang: jham re ci mung: byumyu" qe re nhag' makhyag' lo: za: phyo' qheim" na genae" ga: ko" laug i?