6
1 Airumung: Khristan mungdao" nho: sao qhid' zhao: yu: ra" khyo re nhaung thao" mae to: co' mung:- qao" ra" mho" shid' mungdao: re kham: yu nae" qhid' mae" qhid' au: khyo khe' ye: gelang:-
2 Ngonhaung" wa akyu" mabo: ra" lo, mau" jham re to" pye' mung: Mao"So re lam khug: ra" khyo- qid nyhab' kham: yu: ru we' sin" ra" mho" shid' khyo- lo, kai: byid' ra" khyo- shid: rumae" dam: daui: to" li" ra" khyo- apyad ato: nho: dao: kho' ra" khyo jham: nho: apan aqao: re ngonhaung" dam: to: byid: maang ngad: ra".
3 Ngonhaung" wa qhid' khyo jhin" ye: gelang:- amung: Mao"So qad: ngad: re wa ngonhaung" ceru: kad' bam zai ngad: ra".
4 Yao: bam: lam khug: myid mae" phaug' lo" ko" mo, re myid dam: tha" lo gesho' khoru: qo" kad' nae" i? Yao: bam wa Mao"So: bo" bao khug mae dalhang kaoso' daui: qu" ru we' mug:gaung: jhaung qhu" re meim" qu" va" mo, ngad mung: Gyang" Lho" Byo re kham: yu: qu" va" mo, ngad: ako".
5 Yao: bam wa Mao"So: mungdao: gai: rure we' joe" lo nae" ra" pyad we' sin" ra" qam: so' jham rere: thaung" qhug' ba: lo mo, ngad: ako".
6 Ngadqere: yao: bam wa yao: bam: lam khug: ra" khyo mae" phaug' lo" byaug vako" ra". Yao: bam wa Mao"So: yao: Zo: re pyao: zang mae dam: jin" se' pye' na: ru we' qho' phyo' na ko" ruyang yao: bam re nhag' lam: dam: tha" lo nhao nae" magai: boe" ngad: ra".
7 Yao" dao mae ana" na" za: qu: sheim: byid' ra" mug: qid re qo" yu: ra" myid gaung re Mao"So shaman" byid: mung: ai: myid gaung wa qhovo: qhoshi: qho: mo, re akyu" bo: ra" gaug zo maui: lam: qo" nhao: ra".
8 Ngadqere: ai: yo myid wa zau: we' myo, gae jham reza: yaug: thug' li" nhao: ngad: re wa ai wa pe" phug' made, lomung: Mao"So: yang nhang" pye' ru qhug' ru we' myi" yang ngha" pye' ru qhug' li" nae".
9 Mao:nhaung: qe we"- ngonhaung" ceru: ta" sho' ngadqere: ngonhaung" wa naonhaung" khyo re gaigai: yao: ba: ra". Naonhaung" nho: khyad' yu: ru we' sin" ra" je: gai: ra" shaman" jeju jham naonhaung" qo" ko" rure ngonhaung" ba: ra".
10 Mao"So wa tarha" madin: nyang: ra" yaug mangad: ngad: ra". Naonhaung" zaui: so" lo: ra" mau" rere:- yao: re jhid'de; rure qhu" byid' ra" naonhaung" bao" thaug' byid' rure re:- naonhaung" Khristan mao:nhaung: qere ana" joe" sho' bao" thaug' byid' na ko" rure re: Mao"So wa to" myhid' li" nae" mangad: ngad: ra".
11 Naonhaung" yaug khao: ngo" wa naonhaung" myid: lao" na: ra" ja: jab byang" li" nae" qhid' mae" lo" thao" joe" sho' mathang mano: nhag' lam: zhau: to" na genae" rure ngonhaung" gyai o ngaui: ra".
12 Ngonhaung" wa naonhaung" re noe" shoe: ra" mo, maboe" nhao nug- Lam khug mung: zang: kham yang: Mao"So byid' to" ra" dao:so: re qo" khae: yu: ra" mo, we' dakhyo: kam" wa boe" nhao nug: ra".
Lam Ga" Ra" Mao"So: Dao:so:
13 Mao"So wa Abraham re yao" dao:so: to" ra" au:- jham tang: yang: dao:so: to" ra". Yao: tho' je: qi" ru khag' mana yang: yao: wa yao: yao" mang re lao: mung: jham tang: yang: dao:so: to" ra".
14 Mao"So wa ngo nao re shaman" byid: nae"- Myid:zo: myo: sho' nao re ngo byid: nae"- ga" rure nao re dao:so: byid: va"- ga: yao: re ta" ra".
15 Abraham wa nhag'lam: qhang qhang za: zang: kham: lo: ruyang yao: wa Mao"So: dao:so: byid' to" rure qo" khae: yu: ra".
16 Byu wa jham tang" ra" au: yao: tho' je: qi" ra" byu dayaug yaug: mang re lao: yang: jham tang: ba: ra". Airu: jham tang" ru wa jho" ngag: byo; ra" khyo alhab' re athao yab: lo" nhao: ra".
17 Mao"So wa yao" myid: yaung: to" ra" khyo re yao: khonhae" re: matha" pye'- ga" rure yao: byid' to" ra" dao:so: re khae: yu nae" ra" mo, re de: de: za: qhu" byid: nug: ra". Airumung: yao: wa jham tang: yang: dao:so: byid' ra".
18 Aimung: ce shid' ja: re- maqo" gai: tha" pye' ngad: ra". Ce we' sin: yang: Mao"So wa maqo" mhug' ngad: ra". Airumung: yao" khug mae gug: gug: za: khug ngha: ru qhug' ra" mo, ngonhaung" wa ngonhaung" qhid' kheim: mae byid' to" ra" myid: lao" rure tang za: zaui" zag: ci nae" qi: sho' qam: byid' ru qhug' yu: ra".
19 Ce: myid: lao" ru wa ngonhaung" nho: kaoso' daui: ra" khyo qhid' mae" jo,to' nghoe: we' dakhyo: ngad: ra". Airu wa gug' ru we' lam ga" ru ngad mung: mug:gaung: yham zang mae" qe, kyo pin: lung: re lai: vao ye" lo" yang: akhug shad' gyang" lho" ra" jo, qo khyo joe" ye" ra".
20 Yesu wa Melkhizedeg nho: khu mae xo' zaui" ra" apyad ato: Khinjaung Yin" boe" thao re ngonhaung" gaung tha" ai: jo, qo khyo ngonhaung" qhid' khyo vao ye" lo" ava".