THESALONI
BAO: RE POLU NHO: VHIN TUNG" DALAM:
(1 THESSALONIANS)
Dao: Phung"
Thesaloni vogaung: wa Roma mung"dan: gu: mae bobo: ra" Makedoni mung" mae" vogaung: dalam: ngad: ra". Polu wa Philipi vogaung: mae" thug' lo" thao re Thesaloni vogaung: mae phung: dalam: lote" to" ra". Ngadqere: ai: vogaung: mae Polu wa Yuda caung:pa" thung" re myid vao zo" lo ko" ra" Yuda byu mangad' ra" mo; phaung mae Khristan mungdao: kho" kyo" rumae aung doe; li" mung: Yuda byu qe wa yao: re myid nug: gemung: gye kad' ako". Airumung: Polu wa Thesaloni vogaung: mae" Beria vogaung: khyo khe' phao: ke' ru qhug' ra". Aimae Korinthu vogaung: khyo joe" ye: thao re yao" mau" zaui: cao: ngad: ra" Timothi nhad' mae" Thesaloni phung: mae boe" na: ra" khyo we' sin" ra" lau dao: re the' gyo" ra".
Thesaloni bao: re dalhang ein: lhang tung" ke' ra" vhin tung" wa aimae" Khristan qere qam: byid: nae" we' qam: mashan genae" qhid' mae" tung" ke' ra" mugsug' ngad: ra".
Polu wa yao: bam: lam khug: khyo we' jhid'de; myid qhid' mae" Mao"So re jeju caung:khin" byid' ra". Yao: bam we' yao: daga" na: au: yao: khoru: kaoso' daui: lo: ra" khyo rere: yao: bam re myid: beim: nhao: ra". Amung: Khristan phung: byu dayaug wa Khristu madam: joe" gyo" li" shire shid: byaug yang: ngad: re Khristu joe" gyo" li" ra" au: re byid: nae" ra" apyad ato: kaoso' re yao: qo" yu nae" laug i? ga: phung: khug mae myid' na ko" ra" dao: myid: jham re phaug' tau: byid' ra". Polu wa yao: bam re Khristu dam: tug' li" nae" rure myid: lao" na zo" re" yao: yao: zaui: ang: ra" mau" zo" re sae za: xo' yang: zaui: so" na genae" qhid' mae" yao: bam re ta" ra".
1
1 Polu, Sila, we' Timothi bam wa Pho" Mao"So we' Yesu Khristu nho: byu qe ngad ko" ra" Thesaloni phung: byu qere vhin tung" tung" ke' ra". Nhag' myan" ra" jeju we' ngaui pyo: yaug yo: rure naonhaung" qo" yu vageshao: wo".
Thesaloni Phung: Qenho: Kaoso' Daui Khyo We' Lam Khug: Khyo
2 Ngonhaung" wa naonhaung" alhab' mo; qhid' mae" khonhae" re: Mao"So re jeju caung:khin" byid: mung: ngonhaung" akyu" mho' rumae khonhae" re: naonhaung" qhid' mae" akyu" bomho' byid' ra".
3 Pe"mung:ga"re naonhaung" lam khug: myid re khoru: lo, joe" zaui: so" na ko" rure ngonhaung" Pho" Mao"So: qhid' kheim: mae myid: beim" na: ra".
4 Mao:nhaung: qe we"- Mao"So wa naonhaung" re jhid'de; mung: yao" qhid' mae" boe" genae" qhid' mae" khyin: yu: to: va" rure ngonhaung" ba: ra".
5 Pe"mung:ga"re ngonhaung" wa Ngaui Bau" Lau Dao: Gai re nhad' dao: thoe za: mangad: lo: Gyang" Lho" Byo: qam: so' we' ai: Lau Dao: Gai wa dangman" ru ngad: rure jhaug' za: myid: lam: ru we' ngonhaung" naonhaung" jhao" vin: li" ru ngad:. Ngonhaung" wa naonhaung" we' daga" na: au: naonhaung" akyu" qhid' mae" khoru: kaoso' daui: rure naonhaung" ba: ako".
6 Naonhaung" wa ngonhaung" ave, re we' Asang: ave, re qu" yu: ako". Naonhaung" wa dayin dayo: myo: sho' qhug' kham zo: gesho' ngadqere: Gyang" Lho" Byo: yang byid' ra" ngaui bau" ra" myid we' ai: mungdao: re naonhaung" khae: yu: ako".
7 Airumung: naonhaung" wa Makedoni mung" we' Akhaia mung" mae na ko" ra" phung: byu qe alhab' mo; qhid' mae" ave, qu" yu nae" mo, boe" lo: ako".
8 Pe"mung:ga"re naonhaung" lo, mau" mathao mae Asang: nho: khyo mungdao: wa Makedoni mung" we' Akhaia mung" jao: sho' za: hau" nhao" lo" ru mangad: Mao"So re naonhaung" lam khug ko" ra" khyo- lau thoe re khyi" khao: ngo" khyo hau" nhao" lo" ra". Airumung: naonhaung" re pe" ta" maca" lo:ngad: ra".
9 Ngonhaung" wa naonhaung" jhao" joe" li" au: re naonhaung" khoru: ngonhaung" re lham: khae: yu ko" ra" khyo rere: kao: so' daui: ru we' dangman" ra" Mao"So re caung da" byid: nae" qhid' mae" we' mug:gaung dao mae" yao" yao: Zo: joe" li" nae" qhid' mae" sulho jham re to" pye' mung: Mao"So shad' khyo naonhaung" khoru: phaug' lo ko" ra" khyo rere: ai: byu qe alhab' mo, ta" na: ako".
10 Ai: yao: zo: wa shid: rumae" yao" yang dam: daui: to" li" nhao mung: joe" li" nae" Mao"So: nhag' yo" rumae" ngonhaung" re khyad' yu: ra" yaug Yesu ngad: ra".