50
1 Yoseb wa yao: yao" gaung re yao: pho" dao mae pye' bam" mung: ngug zo" re" yao: pho" myo, khung: re bobaug baug: ra".
2 Ai: thao Yoseb wa yao: pho" mao gaung re mocid' gyad nae" qhid' mae" amyin" byid' ra".
3 Ga-au: we' dakhyo: mocid' gyad: rure byid xe ba kad' ako". Egutu byu qe wa yao" mathao mae nhad' xe ba kaug' ngug: ako".
4 Kaug: ngug: ra" ayo, gan lao"- Yoseb wa kho:kham pho" nho: zug: qere jeju khyo" ce: lau dao: re kho:kham pho" jhao" vin: ye: byid: gela,-
5 Nga" pho" wa shid: lo" na: au:- yao: re Khanan mung" mae" yao: nyhang" to" ra" lab mae nyhab' byid: nae" khyo re ngore dao:so: kad' nhao: ra". Airumung: jeju khyo" nga" pho" re lo" nyhab' nae" ngore lo" nhao: la,- ai:thao ngo dam: tug' lo nae"-ein: lo" ta" kyo: ge,- ga: ta" ra".
6 Kho:kham pho" wa- nao kad' nae" dao:so: byid' to" ru we' dakhyo: ni" pho" re lo" nyhab' wa,- ga: tau" ra".
7 Airumung: Yoseb wa yao: pho" re nyhab' nae" qhid' mae" ye" lo" ra". Kho:kham pho" nho: zug: qe alhab' kho:kham kho" mae" lau: de, qe- Egutu mung" mae" au: jhaung qe alhab' mo, wa Yoseb we' daga" cao" ye" ako".
8 Yao: bam: zo dau angai qe- yao- cad' be,- nung: jham za: Goshen mug: mae na: jo; ako". Yao: nho: yham byu- Yoahaza nho: mao:nhaung: qe dang: ra" yao: pho" nho: yham byu qe alhab' ye" ako".
9 Myao: lhin" keim" ra" mo,- myao: jui" ra" mo, we' daga" cao" ye: mung:- byu phung: mo" zang ngad: ako".
10 Yao: bam wa- Yodan gyaung: ba thug' shad' Atad gaug nao: jao: mae joe" gelao"- yao: bam wa- thoe qi: we' myao" sho' kaug' ngug gemung:- Yoseb wa- aimae kaug' ngug: ra" poe nhad' ba kad' ra".
11 Khanan mung" byu qe wa ai: mo, byu qe Atad mae kaug' ngug: na ko" rure myao gelao"- yao: bam wa Egutu byu qe kaug' ngug poe kad' na genhaung- ga: ta" ako". Ai: mathao mae ai: jo, qo re Abela Mizraim ga: mhang" ako".
12 Airumung: Yoseb nho: yauggai zo: qe wa Yaku yao: bam re amyin" byid' to" ru we' dakhyo: kad' ako".
13 Yao: bam wa yao" mao gaung re Khanan mung" khyo dao: lo" mung:- Abraham yang Hiti byu Ephron nho: lo, mae" lab kad' nae" qhid' mae" vai: to" ra" Mamre ba thug' shad' mae" Magphela pa: din" mae" laug khyaung mae yao: re nyhab' ako".
14 Yoseb wa yao: pho" re bin: nyhab' pye' thao- yao: wa yao" yao: mao: yao:nhaung: qe we' nyhab' shaung poe khyo yao: we' daga" cao" ye: ko" ra" mo, alhab' we' daga" Egutu khyo tug' lo: ako".
Yoseb Yao: Mao: Bam Lam Sho' Dam: Ta" Ru
15 Yao: tao ho' nho: yao: pho" shid thao re Yoseb nho: yao: mao: yao: nhaung: bam wa- Yoseb wa ana" joe" sho' ngonhaung" re nghang" jo, mung:- ngonhaung" yao: re dae te' ra" gu: alhab' ngonhaung" re lage, phaug' nae" yaung: na: ngad: re khoru: ngad nae" i? ga: ta" ako".
16 Airumung: yao: bam wa Yoseb jhao" dao: pyang: ke' mung: ngonhaung" nho: yao: pho" mashid shire-
17 Yao: wa ngonhaung" re- jeju khyo" ni" mao: ni" nhaung: qe nao re magai kad' geyang: shad' lhoe" to: ko" ra" yug: re qobo khyad' byid: wa,- ga: nao re mho' nhao co' ra"- ana" jeju khyo" yang ni" pho" nho: Mao"So: daui daui mo, ngonhaung" kad' shad' to" ra" qobo re khyad' byid: la,- ga: ta" nhao: ke' ako". Yoseb ce: lau dao: re the' gyo: lao" ngug: ra".
18 Ai: thao yao" yao: mao: yao: nhaung: qe yao: yao: joe" li" gemung:- Yoseb qhid' kheim: mae li" goe; gyo" mung:- yao: bam wa ngonhaung" wa ni" jeim qekhyo" ce: ni" qhid' kheim: mae na: jo; bam va"- ga: ta" ako".
19 Ngadqere: Yoseb wa yao: bam re dagyaug ge,- ngo yao" gaung re Mao"So: jo, qo mae maqo" to: ngad: ra".
20 Naonhaung" wa ngore makhyang" ra" khyo" gye kad' lo: ako". Ngadqere: Mao"So wa ai: boe" ra" khyo mathao mae- ana" ba kao so' daui: na ko" ra" byu myo: sho' mo; nho: kao so' re ngo zam" to: byid: nae" qhid' mae" aire agai kad' pye' ava".
21 Naonhaung" pe" gyaug maca" ko" ngad: ra". Ngo wa naonhaung" re we' naonhaung" yao:zo: yao: dau qere gun caung byid: nae"- ga: ta" ra". Airumung: Yoseb yang yao: bam re nhag' khyag' dao: we' lam" sho' ta" ru wa yao: bam: nhag' lam: mae gyo" zao" ako".
Yoseb Shid: Ra" Khyo
22 Yoseb wa Egutu mung" mae yao: pho" nho: yham byu qe we' daga" xo' na: ra". Yao: shid' ra" au: yao" apyad wa dayo: daxe zin ngad: ra".
23 Yao: wa Ephrim nho: yao: zo: qere we' yao: myid: qere the' myao sho' daui: na: ra". Yao: wa Manashe nho: yauggai zo: Mikhi nho: zo: dau bam khau sho' re: daui: na: ra".
24 Yao: wa yao" yao: mao: yao: nhaung: qere ngo wa shid: nae" ngad: va"- ngadqere: Mao"So wa naonhaung" re dang za: gun caung byid: mung: yao" yang Abraham- Isag- Yaku bam re dao:so: byid' to" ra" mung"dan: khyo ce: mung"dan: mae" naonhaung" re jhui" thug' lo" li" nae"- ga: ta" ra".
25 Ai: thao Yoseb wa yao" byu qere thao: ce' daja: to: genae" qhid' mae" mho' ra". Yao: wa ai: mung"dan: khyo Mao"So naonhaung" re jhui" lo" ra" au: naonhaung" wa nga" mao gaung re naonhaung" we' daga" dao: lo" nae" ein: ngore dao:so: byid: gela,- ga: ta" ra".
26 Arumung: Yoseb apyad dayo: daxe zin re Egutu mung" mae shid: lo" ra". Yao: bam wa yao" mao gaung re mocid' gyad mung: thaung: khug mae ke' to" ako".