42
Egutu Mung" Khyo Zo:ve Vai Ye" Ru
1 Yaku wa Egutu mae gaug zo jo, rure ba lao"- yao: wa yao: zo: bam re pe"mung: jho" zhaug' qu" na: bam ko" i?
2 Egutu mung" mae gaug zo jo, rure ngo the' gyo" ra"- ai: khyo ye: mung: ngonhaung" bao" khug' beim nae" qhid' mae" gaug zo: yevai: lo geri:- ga: ta" ra".
3 Airumung: Yoseb nho: yao: mao: daxe zo: wa Egutu mung" khyo gaug vai ye" lo" ako".
4 Ngadqere: Yaku wa Yoseb nho: yao: nhaung: co' xo' Benyamin re wa yao: bam we' manhao: ke' ngad: ra". Pe"mung:ga"re Yaku wa Benyamin daja: ja: boe" nae" rure gaung yug yang: ngad: ra"-
5 Khanan mung" mae bao" khug' khug' ruyang Yaku nho: yao: zo: qe wa su gaje qe we' daga" gaug zo vai ye" ako".
6 Yoseb wa Egutu mung" zug: pho" dayaug khyo" mug: myid geim" mae" byu qere gaug zo aung" na: ra". Airumung: Yoseb nho: yao: mao: bam wa joe" li" mung: Yoseb nho: qhid' kheim: mae yao: bam: myo,khung: re myid gaung khyo goe; gyo" ako".
7 Yoseb wa yao: mao: bam re myao lao"- yao: bam re qu" se" ra". Ngadqere: yao: wa yao: bam re maba geim kad' ra". Yoseb wa yao: bam re thoe qao qao kad' ci mung:- naonhaung" khai: mae" joe" li" mo, ngad ko" i? ga: myid' ra".
Yao: bam wa ngonhaung" wa Khanan mung" mae" gaug zo vai: li" mo, ngad:- ga: tau" ako".
8 Yoseb wa yao: mao: bam re se" sho' ngadqere: yao: bam wa Yoseb re mase" ko" ngad: ra".
9 Yoseb wa yao: bam: khyo re yao: yab mo, mo, va" rure myid: beim: mung:- yao: bam re- naonhaung" wa jin" byu qe ngad: ako"- naonhaung" wa ngonhaung" mung"dan: khodau mae qam: nang" rure qu" nae" joe" li" mo, ngad: ako" ga:- ta" ra".
10 Yao: bam wa zug: pho" we"- airu: mangad: wo"- ngonhaung" wa ni" jeim qekhyo" gaug vai joe" li" mo, angad:-
11 Ngonhaung" alhab' danhae tao ho' qe za: ngad:- zug: pho" we"- ngonhaung" wa jin" byu qe mangad:- ngonhaung" wa myid din:man: mo, za: angad:- ga: tau" ako".
12 Yoseb wa yao: bam re- mangad: ngad: ra". Naonhaung" wa ngonhaung" mung"dan: khodau mae qam: nang" rure jo" qu" nae" qhid' mae" joe" li" mo, ngad: ako"- ga: ta" ra".
13 Yao: bam wa- zug: pho" we" ngo tao ho' alhab' wa daxe: shid' yaug ngad:- Khanan mung" mae" dapho" zo: qeza: angad:- Dayaug wa shid va"- ngai: thao" yaug wa ngonhaung" yao: pho" we' daga" na: ra"- ga: ta" ako".
14 Yoseb wa ngo azhao ta" ru we' dakhyo:- naonhaung" wa jin" byu qe ngad: ako".
15 Naonhaung" re ceru: jham" qu" nae"- naonhaung" yao: nhaung: ngai thao" yaug cekhyo majoe" li" li" wa naonhaung" cemae" khonhae" re: maqo" thug' lo" genae" ein: kho:kham pho" mang re lao: yang: ngo jham tang" ra".
16 Naonhaung" mae" dayaug phao: lo" mung: yao: re lo" jhui" yu ca" genae". Dang: ra" mo, wa naonhaung" ta" ru dang madang: rure jham" qu" ru bin: qhug' sho' gug: gam qe: lo, mae lhaung" to: nae". Airu: mangad: re wa kho:kham pho" jho: na: ru we' dakhyo: naonhaung" wa jin" byu qe ngad: ako"- ga: ta" ra".
17 Aimung: yao: bam re thaung: mae sam ba lhaung" to" ra".
18 Sam ba ein: ba re Yoseb wa yao: bam re- ngo wa Mao"So re gyaug phug' ra" yaug ngad:- khyo dalam: khyo" ngo wa naonhaung" kao so' re beim nhao nae".
19 Naonhaung" byu gai qe ngad: rure sag se: qhu" byid: nae" qhid' mae" naonhaung" mae" dayaug lam: naonhaung" lhaung" ra" thaung: khug mae na: jo, ca" li" nae".
Dang: ra" mo, gu: wa naonhaung" vai: to: vako" ra" gaug re vae:moe na ko" ra" yham byu qejhao" vin: lo" byid: ge,-
20 Ai: thao naonhaung" wa naonhaung" yao: nhaung: ngai: thao" yaug re ngojhao" jhui" li" ca" ako". Ceru: kad' ru wa naonhaung" ta" ra" dao: dangman" rure sagse: qhu" byid' li" nae"- aimung: ngo wa naonhaung" re mase' pye' nae"- ga: ta" ra". Yao: bam wa ceru re myid vang" ako".
21 Amung: yao: bam wa ngad va"- ana" ngonhaung" wa ngonhaung" yao: nhaung: re kad' lai: lo: ra" akyu" kham zo" na: bam va"- yao: ngonhaung" re bao" thaug' yu nae" mho' ra" au: yao: gyai qi: sho' qug: khai: jam: jau qhug' na: rure ngonhaung" myao: bam va". Ngadqere: ngonhaung" wa yao: re manug tae"gyo: byid: ce: mathao: yang ana" ngonhaung" ce: qug: khai: mae ngad: bam va"- ga: yao: cao: jho" ta" ako".
22 Rubin wa- ngo wa ai: zolau: re dae mate' genae" qhid' mae" naonhaung" re ta" va"- ngadqere:- naonhaung" matae" gyo: ko" ngad: ra"- ga: ta" ra".
23 Yao: bam ta" rure Yoseb ba: gyo" ra"- ngadqere: ai: khyo re yao: bam maba ko" ngad: ra". Pe"mung:ga"re yao: bam wa yao: re myan" dai" dai" byid: yaug khyo" jhau: to: geyang: ngad: ra".
24 Yoseb wa yao: bam mae" thug' lo" mung: ngug: ra". Yao: dao: dam: qo" gai: jhau lao" tug' vao lo mung:- Simon re khyin: yu yang: yao: bam qhid' kheim: mae taui" to" ra".
Khanan Mung" Khyo Dam: Tug' Lo: Ru
25 Yoseb wa yao: mao: bam: thaung jham mae gaug ke' byid: mung: yaug khao: ngo" ngaui jham re yao: yao" thaung mae dam: ke' to: byid: yang:- gyaung: khyo mae" zokho re byid: nae" qhid' mae" amyin" byid' ra". Airu: kad' byid' ako".
26 Yao: tao ho' wa yao: bam: loze dao mae yao: bam vai: to" ra" gaug zo jham seim" vhin mung: to" lo" ako".
27 Yao: bam thang: yab nae" jo, qo mae yao: bam mae" dayaug wa yao" loze re zo zho: nae" ga: yao" thaung re phung" ke' re- thaung nhad' mae yao" ngaui re the' myao: ra".
28 Yao: wa yao: mao: yao: nhaung: bam re nga" ngaui ngore dam: tug' ke' to: byid' ra". Qu" shige,- ce: nga" thaung khug mae- ga: ta" ra". Yao: bam sang: made, losho' mung: pye' gemung:- gyaug: ru we' ngonhaung" re Mao"So pe" kad' va" laug i? ga: yao: cao: jho" ta" ako".
29 Yao: bam wa Khanan mung" khyo yao: bam: yao: pho" Yaku jhao" joe" lo gelao"- yao: bam mae boe lai: lo: ra" khyo alhab' yao: re ta" kyo" ako".
30 Egutu mung" mae" mug" zug: pho" wa ngonhaung" re dao qao we' jhau mung: ngonhaung" re yao" mung"dan: re gyekhe' yang: jin" byu kad' mo, ngad: ga:- qobo zhaug' ra".
31 Ngonhaung" wa jin" byu qe mangad:- myid din:man: mo, za: angad:-
32 Ngotao ho' alhab' wa daxe: shid' yaug ngad:- dapho" zo: qeza: ngad: dayaug wa shid: byaug mung:- ngai: thao" yaug wa Khanan mung" mae ngonhaung" yao: pho" we' daga" na: jo; ashi"- ein: ngonhaung" phaug' tau: byid'-
33 Ai: mung" zug: pho" wa- naonhaung" myid din: man: mo, ngad ko" ra" khyo re ceru: kad' yang: ba: yu li" nae"- naonhaung" mae" dayaug ngo we' thang: na ca" nae"- dang: ra" mo, wa vae: moe' na ko" ra" naonhaung" yham byu qejhao" gaug yu: vin mung: lo" ge,-
34 Amung: naonhaung" yao: nhaung: ngai: thao" yaug re ngojhao" jhui" li" geri:- ailao" naonhaung" wa jin" byu qe mangad:- myid din:man: mo, ngad ko" rure ngo ba nae". Ngo wa naonhaung" yao: nhaung re dam: tug' byid: nae". Aimung:- naonhaung" wa cemung" mae qo" na yang: phaga: qo" ga: zo" ra"- ga: ta" ra" ga:- ta" kyo" ako".
35 Ai: thao yao: bam wa yao: bam nho: thaung jham mae" gaug re vhe' yu gelao"- yao: bam yaug: kho: ngo" yao: bam yao" ngaui thaung re myao: ako". Yao: bam ngaui re the' myao gelao"- yao: bam we' yao: bam yao: pho" Yaku wa gyaug: pye' ako".
36 Yao: tao ho' yao: pho" wa yao: bam re- naonhaung" wa nga" zo: qe alhab' re zai" jheim" pye' byid: nug: ko" i? Yoseb wa mana lo:- Simon re: mana lo:- ana" naonhaung" wa Benyamin rere: jhui" yu: pye' nug: ako". Dayin dayo: kham zo: yaug wa ngo angad:- ga: ta" ra".
37 Ailao" Rubin wa yao: pho" re ngo Benyamin re nao jhao" madam: jhui" tug' lo byid: yang: ngad: re- nga" yauggai zo: tao re nao qo" se' pye' ra". Ngo re lam: ke' la,- ngo wa yao: re nao jhao" dam: jhui" tug' lo byid: nae"- ga: ta" ra".
38 Ngadqere: Yaku wa nga" zo: re naonhaung" we' maqo" ye: nhao nae"- yao: mao: wa shid: byaug va"- yao: dayaug za: dang lo" ra". Yao: wa khyole; mae daja: ja: gai: boe" ra". Ngo wa mao: zo: ngad mung: naonhaung" kad' ra" nhag' kaug' ja" yang shid: li" nae"- ga: ta" ra".