10
Noa Nho: Yauggai Zo: Qe Nho: Myid:zo: Qe
(1 Km 1.5-23)
1 Cebam wa Noa nho: yauggai zo: Shem- Ham- Yaphed tao ho' nho: myid:zo: qe ngad: ako". Daqid bin thao re ce: yauggai zo: qe wa zo: dau myhung: ako".
2 Yaphed nho: yauggai zo: qe wa- Gema- Magog- Madai- Yavan- Tuba- Mesheg- Tira ngad mung: yao: bam: mang vin: ra" mo, nho: phug' pho" qe ngad: ako".
3 Gome nho: myid:zo: qe wa Ashkena- Riphad- Togarma- byumyu" qe ngad: ako".
4 Yavan nho: myid:zo: qe wa Elishaha- Spain- Kupru- Rhode byumyu" qe ngad: mung:-
5 Yao: bam wa gagyo: kao" jham mae we' qid yae na ko" ra" mo, nho: phug' pho" qe ngad: ako". Cebam wa Yaphed myid:zo: qe ngad mung: byumyu" kaung gatau tau- mung"dan: gatau tau mae na yang yao: myan" yao: jhau mo, ngad: ako".
6 Ham nho: yauggai zo: qe wa Kusha- Egutu- Libya- Khanan bam ngad: mung:- yao: bam: mang vin: ra" mo; nho: phug' pho" qe ngad: ako".
7 Khusha nho: yauggai zo: qe wa Seba- Havila- Sabta- Raama- Sabtekha byumyu" qe ngad: ako". Roma nho: myid:zo: qe wa Sheba we' Dedan byumyu" qe ngad: ako".
8 Khusha wa mug:myid dao mae sao qhid' mae" qi" qhang: ra" gye aung doe, yaug boe" li" ra". Nimrod ga: mhang" ra" yauggai zo: dayaug qo" ra".
9 Yao: wa Mao"So: yang bao" thaug' byid' ruyang sho: kung" byu aqi: dayaug ngad: ra". Ce: mathao mae byu qe wa- Mao"So wa nao re Nimrod ru: qi" ra" shokung" byu boe" nhao vashao: ga:- lhaung" ta" ako".
10 Sao qhid' mae yao" mung"dan: wa Babelon Ereg- Akhad mang: jham ngad mung: ai: mang: sam mang: geim" Babelon mung"dan: mae bobo: ako".
11 Yao: wa ai: mang: mae" Asuri khyo ye: mung:- Nineve vomo"- Rehobod- Ira vomo" Kala vomo" we'
12 Resen vomo" jham re yete" ra". Ai: Resen vogaung: wa Nineve vogaung: we' Kala vogaung: mo" agyo: mae jo, ra".
13 Egutu myid:zo: qe wa Ludia- Anam- Lehab- Nabhtu-
14 Pathru- Kaslu- Krete byumyu" qe ngad mung: ce: byumyu" qemae" Philisti byumyu" qe na: gyo" li" ako".
15 Khanan nho: yauggai zo: qemae" zoqhid' yaug wa- Sidon ai: dao Hed ngad mung: yao: shid' tao: nho: mang vin: ra" mo; nho: phug' pho" tao ngad: ako".
16-18 Khanan wa Yebusi- Amori- Girgashid- Hivi- Arki- Sinid- Arvadid- Zemarid- Hamathid- byumyu" qenho: phug' pho" re: ngad: ako". Khanan byumyu" qe wa yao: kaung yao: na: byo: lo" ako".
19 Khanan byumyu" qenho: mug: kyo: wa- Sidon mae" mug: thao shad' Gaza nhae mae" Gera joe" sho'- ba thug' shad' khyo Sodom- Gomora- Adma- Lasha nhae mae" Zeboiim joe" sho' ngad: ra".
20 Cebam wa- Ham: nho: myid:zo: qe ngad: ako". Byumyu" kaung mung"dan: gatau tau mae na mung: yao: yao" myan" jhau mo, ngad: ako".
21 Yaphed yao: mao: Shem wa Hebre byumyu" qe alhab' mo; nho: phug' pho" ngad: ra".
22 Shem nho: yauggai zo: qe wa Elam- Ashu- Arpakshad- Lud- Aram bam ngad mung: yao: bam: mang vin: ra" mo; alhab' qenho: phug' pho" qe ngad: ako".
23 Aram nho: myid:zo: qe wa- Uza- Hula- Getha- Mesheg byumyu" qe ngad: ako".
24 Arpakshad wa Shela nho: yao: pho" ngad: mung: Shela wa Eber nho: yao: pho" ngad: ra".
25 Eber wa yauggai zo: shid' yaug qo" ra". Dayaug re Peleg ga: mhang" ako". Pe"mung:ga"re yao" pyad mae mug: myid byu qe wa jho" kho' gemung: airu: mhang" ru ngad: ra". Gatau dayaug re Yoktan ga: mhang" ako".
26 Yoktan nho: myid:zo: qe wa- Amod- Sheleb- Hazamaved- Yera-
27 Hodoram- Uzala- Digla-
28 Oba- Abimae- Sheba-
29 Ophi- Havila- Yobab byumyu" qe ngad: ako". Yao: bam alhab' mo, wa Yoktan mae" na: gyo" li" mo, ngad: ako".
30 Yao: bam na: ra" mung" re Mesha mae" ba thug' shad' bam mug: Sepha joe" sho' na: byo: lo" ako".
31 Cebam wa Shem nho: myid:zo: qe ngad mung:- yao: bam yao" byumyu" kaung gatau tau mung"dan: gatau tau mae na mung: yao" myan" yao: jhau: ako".
32 Ce: byu qe alhab' wa Noa nho: myid:zo: qe ngad mung:- yao: bam yao: na: gyo" li" ra" byumyu" kaung re cao" yang: byumyu" daja: we' daja: ngad: ako". Daqid bin: shi: thao re myid gaung dao mae byumyu" alhab' wa Noa nho: yauggai zo: qe mae" na: gyo" li" mo, ngad: ako".