9
Gug' Nyhug' Jham Shid: Ra" Khyo
1 Asang wa Moshe re- kho:kham pho" jhao" ye: mung: yao: bam ngore qo" caung:pa" geshao:- nga" byumyu" re nhao: ke' wa,-
2 Nao: yao: bam re nhao: ke' nae" dam: ha: pye' re wa-
3 Ni" gug'nyhug' jham- ni" myao: jham- loze jham gola:u jham nung: jham- yao jham- cad be, jham: dao: mae qu" gyaug qu" lhaung sho' ra" no re nhao: ke' byid: ra" khyo" ngo wa nao re qobo dae byid: nae".
4 Ngo wa Egutu byu qenho: gug'nyhug' jham we' Israel byu qenho: gug'nyhug' jham agyo: mae gakai: lai majho" dau: ru kad' nae". Israel byu qenho: gug'nyhug' dadau: re: mashid nae".
5 Ngo ceru kad' nae" ayo, ba na khyo" ne, mo" ba re ngo Asang dang: to: va" ga: Hebre qenho: Mao"So Asang ta" ra" ein: yao: re yeta" kyo: wa,- ga: ta" ra".
6 Asang wa yao: ta" to" ru we' dakhyo:- thao: ba re kad' ra". Aimung: Egutu byu qenho: gug'nyhug' jham alhab' shid: lo" ako". Ngadqere: Israel byu qenho: gug'nyhug' jham dadau: re: mashid ngad: ra".
7 Kho:kham pho" wa pe" boe" va" rure myid: mung: Israel byu qenho: gug'nyhug' dadau: re: mashid: rure yao: the' gyo" ra". Ngadqere: yao: wa nhag' lam: qao mung: ai: byumyu" qere manug: nhao: ke' ngad: ra".
Byang Jham
8 Ailao" Asang wa Moshe we' Arun tao re- Myikhyeim" mae" myiqe, zhab' yu mung:- Moshe wa aire kho:kham pho" qid' kheim: mae zhab' sin" ke' wa,-
9 Ai: myiqe: qe wa bodan mug we' dakhyo:- Egutu mung" geim" khyo byo: sin" lo" li" genae" aijham wa khyi" khao: ngo" mae na ko" ra" byu qe we' gug'nyhug' jham: dao mae jad: byo; ra" byang myaug nhao: li" genae"- ga: ta" ra".
10 Airumung: yao: shid' tao wa myiqe, re yu: ci mung: kho:kham pho" qhid' kheim: mae ye; jo; ako". Moshe wa ai myiqe, re la mae zhab' sin" ke' ra". Ai: myiqe, wa mo, byu qere we' gug'nyhug' jham mae jad; byo: ra" byang jham re myaug: li" nho: ra".
11 Man: dan: vha" mo, re Egutu byu gatau qe alhab' we' dakhyo: byang myaug geyang: Moshe qhid' kheim: maqo" thug' ye: ngad: ako".
12 Ngadqere Asang ta" ru we' dakhyo: kho:kham pho" re Asang: yang nhag' lam: qao nhao mung:- Kho:kham pho" Moshe we' Arun tao ta" ra" dao: re matae" gyo: qad ngad: ra".
Lag Qu
13 Ai: thao Asang wa Moshe re thao: ba ne, seim no' mae" kho:kham pho" re ye qhug' mung:- yao: bam ngore qo" caung:pa" geshao: nga" byumyu" qere nhao: ke' wa,-
14 Mug: myid alhab' geim" mae ngo we' dau ru khag' mana: rure nao ta" nae" qhid' mae" celhang ngo wa ni" zug: qere we' ni" mung" byu qere za: qobo dae mabyid: lo:- nao rere: ngo qobo dae byid: nae"-
15 Ngo wa nga" lo, re tau: to' mung: nao re we' ni" mung" byu qere no boe" nhao: re wa naonhaung" alhab' mo, bin sho' byo; qeim: lo" byaug genae".
16 Ngadqere: nga" nho: lahau: wa mug: myid geim" mae hau" nhao" lo" shao:- nga" qam: so' nao re qhu" byid: nae" ngo wa nao re daui: na nhao: to: va".
17 Airu sho' ngadqere: nao wa nhag' lam: qi" jo, shimung:- nga" byu qere nhao: ke' nae" qhid' mae ha: pye' ra".
18 Celhang wa ne, mo" ba mae Egutu mung"dan: nho: mhomyi: mae khonhae" re magyo" qu" ra" gyai thau: ra" lagqu qam" re ngo gyo" nhao nae".
19 Ana" ni" gug'nyhug' jham re we' pa: din" mae nao qo" ra" gatau alhab' re zaung khug mae keim" ke' to: nae" amyin" byid: wa,- lagqu wa khug jo, qo majo, ra" taung gaung mae na ko" ra" byu qe we' gug'nyhug' dao mae gyo" zag mung: yao: bam alhab' shid: li" genae"- ga: Hebre qenho: Mao"So Asang ta" ra" ein: yao: re yeta" kyo: wa,- ga: ta" ra".
20 Kho:kham pho" nho: zug: qe daqhae: wa Asang ta" to" ra" dao: mathao mae gyaug mung:- yao: bam: jeim qere we' taung gaung mae" gug'nyhug' jham re zaung khyo keim" nha: ako".
21 Ngadqere: gatau daqhae: wa Asang: yang ta" peim" rure pe" shui manho lo:- yao: bam nho: jeim qe we' gug'nyhug' jham re pa: din" mae nha: to" ako".
22 Ailao" Asang wa Moshe re ni" lo, re mug:gaung khyo: tau: to' ke' wa,- ailao" mung" byu qe: dao mae re:- gug'nyhug' jham dao mae re:- yothaung: mae" qhovo: gaje jham: dao mae re:- Egutu mung" geim" mae lagqu gyo" sheim" li" nae"- ga: ta" ra".
23 Airumung: Moshe wa yao" zaung: bao" re mug:gaung khyo tau: to' ke' ra"- ailao" Asang wa mug: gyug: we' lagqu nhao: ke' mung: lhe' cad' wa myid gaung khyo cad' gyo" lo: ra".
24 Asang wa lhe' cad' ru we' lagqu khyo" thoe khyo re khyo cad' ru we' lagqu bo: ra" aug' la mo" zang gyo" nhao: ke' ra". Aiwa Egutu mung" nho: mhomyi: mae khonhae" re: magyo" qu" ra" xo: thao" ra" Aug' La qam" ngad: ra".
25 Ai: lagqu wa byu jham we' gug'nyhug' jham mae" du Egutu mung" geim" re be; phyo' pye' ra". Ai: lagqu wa yothaung: mae" qho vo: gae jham re we' sag' gae jham alhab' re be; khyug' pye' ra".
26 Lag qu magyo" ra" jo, qo wa Israel byumyu" qe na ko" ra" Goshen mang: za: ngad: ra".
27 Kho:kham pho" wa Moshe we' Arun jhao" byu nhao: ke' yang:- celhang ngo qobo shad' lhoe" va". Asang wa jo mung: nga" mung" byu qe we' ngo wa shad' va".
28 Asang re akyu" mho' wa, ce: mug: gyug: we' lagqu ngonhaung" ga" va"- naonhaung" re nhao: ke' nae" ngo dao:so: byid' ra"- naonhaung" cemae na jo, maca" loko" ngad: ra"- ga: ta" ra".
29 Moshe wa yao: re- ngo ce vomo" mae" thug' lo" we' nga" lo, tau yang Asang re akyu" mho' nae". Ailao" mug:gaung wa thang: lo" mung:- lagqu re: magyo" lo nae"- airulao" myid gaung wa Asang: ngad: rure nao ba: li" nae".
30 Ngadqere: nao we' ni" zug: qe wa Asang Mao"So re magyaug shiko" rure ngo ba: ra".
31 Jid: mo" we' bali gaug jham wa lagqu: yang be; qheim" pye' ra". Pe"mung:ga"re bali gaug wa mhang" mung: jid: mo" wa athaung: thaung" na: ruyang ngad: ra".
32 Ngadqere: jung: gaug wa- pe" maqeim ngad: ra". Pe"mung:ga"re ai wa thao re mhang" yang: ngad: ra".
33 Moshe wa kho:kham pho" mae" phao: lo" mung:- vomo" mae" thug' lo" ra". Amung: yao" lo shid' lo, geim" re tau yang Asang re akyu" mho' ra". Mug: gyug:- lagqu- mug: qu: ru alhab' thang: lo" byaug: ra".
34 Boe" ra" khyo re kho:kham pho" the' myao lao" yao: wa qobo dam: shad' lhoe" ra". Yao: we' yao" zug: qe wa ga-au: we' dakhyo: yao: nhag' lam: qao: jo; ako".
35 Asang wa gau: qhid' khae" yang: Moshe nhad' khyo" ta" to: va" ru we' dakhyo:- kho:kham pho" wa Israel byumyu" qere manhao ke' qad ngad: ra".