35
Dugno: Ba: Nho: Thung" Tarha"
1 Moshe wa Israel byumyu" phung: geim" re khai: zhang" yu mung: yao: bam re- ce wa naonhaung" cao" kad' nae" qhid' mae" Asang amyin" byid' to" ra" khyo ngad: ra".
2 Naonhaung" nho: mau" zaui: nae" qhid' mae" ba na khyaug' ba naonhaung" qo" ako". Ngadqere: nhad' ba ein: ba wa gyang" lho" ra" ba na- Asang ngore qhaug' byid' to" ra" Dugno: Ba na ngad: qo: ra". Ai: ba na mae mau" zaui" ra" yaug khag' ngadqere: se' pye' ru qhug' ca" ra".
3 Dugno: Ba mae naonhaung" yham jham mae myi: lhao" re: damad ge,- ga: ta" ra".
Gyang" Lho" Zaung Qhid' Mae"Jhaung Qhu" Jham
(Pht 25.1-9)
4 Moshe wa Israel byu alhab' mo, re- ce wa Asang byid' to" ra" amyin" ngad: ra".
5 Asang: qhid' mae" jhaung qhu" kad' ge,- airu kad' nug: ra" mo, yaug khao: ngo" wa qhang jhaung qhu"- ngaui jhaung qhu"- gyid: bo" jhaung qhu"-
6 Jid: mo" pin: gai- mhai: nyhug- amo, jham we' sug' gug ne- cad' be, mug' yang kad' ra" mai bau:-
7 Ane: yang xug' to" ra" yao lo: qid- gai: ra" shoqid- qhoje; sag'-
8 Myikaug' xau- gyad xau qhid' mae" sheim nae ja: jham- sheim nae pyo" ra" ja:-
9 Unug laug we' Khinjaung Yin" nho: bau: lo, kao: mae we' qao nghoe' pye: mae te' nae" gatau phug' de; ra" laug zai- qhang zai jhaung qhu" jham re kad' ge,.
Asang: Zaung Qhid' Mae" Zai Kug Jham
(Pht 39.32-43)
10 Naonhaung" phaung mae" lo, mau" zaui: jhao: ra" mo, alhab' li" mung: Asang amyin" byid' to" ra" gu: ja: khao: ngo" re kad' ge,.
11 Zaung- Zaung mhao: mug:- taung gaung shad' mhao: mug:- anghoe: jham- sag' pye: qae khyao"- zang- zang apan jham-
12 Dao: Thang" Ban"- gyang: yao:- apyid'- go: to: nae" akyo pin: lung:-
13 Saboe"- gyang: yao:- yao" zai kug jham Mao"So re qhaug' byid' ra" mug-
14 Myi: te' nae" myikaug' tao"- myikaug' zai myikaug jham we' xau-
15 Sheim nae pyo" ra" ja: phad' ngaui" nae" phan- yao" gyang: yao:- gyad xau- sheim nae pyo" ra" xau- Zaung kham: dung: qhid' mae" qe, kyo pin: lung:-
16 Xeim: phad' ngaui" ra" phan we' gyid: bo" akyo kyao"- gyang: yao: ai: nho: zai kug jham alhab'- cid' nae" jarung: we' ug' tao"-
17 Qae: lhang" nae" akyo pin lung:- zang jham- apan jham- qae: lhang" ra" kham: dung: qhid' mae" akyo pin: lung:-
18 Zang taui: nae" daung" zang jham- zang qhid' mae" taui: we' qae: lhang" nae" taui:-
19 Gyang" lho" jo, qo mae caung da" byid' au: ve, genae" ra" khinjaung mai bau: jham ngad: ra"- khinjaung Arun we' yao" yauggai zo: qe: qhid' mae" gyang" lho" ra" mai bau: jham re li" kad' geri:- ga: ta" ra".
Mo,Byu Qe Jhaung Qhu" Jham Cilo" Ko" Ru
20 Israel byu qe alhab' to" lo" gemung:-
21 Airu: jhaung qhu" kad' byid: nug: ra" mo, yaug khao: ngo" wa Asang: qhid' kheim: Zaung kad' nae" qhid' mae" Asang jhao" jhaung qhu" cili" byid' ako". Yao: bam wa caung:pa" byid' rumae ci ca" gu: ja: khao: ngo" we' khinjaung bau: jham kad' rumae ci ca" ra" gu: ja: khao: ngo" cili" ako".
22 Nao airu: kad' mung: kao bau mo, myiqe: yauggai qe alhab' mo, wa- shaung: to" ra" nghe' tum:- no xaui: jham- lo, pin: jham- qhui: jham- phug' de; ra" qhang zai aja: ja:- cili" gemung: Asang re li" qhaug' byid' ako".
23 Jid: mo" pin: gai anyug- amo, we' sug' gug ne- cad' be, mug' yang qo; to" ra" mai bau:- ane xug' to" ra" yao lo: qid- gai: ra" Shoqid- qo" ra" mo, yaug khao: ngo" cili" ako".
24 Ngaui mangad: lao"- gyid: bo" qo" byid' ra" mo, alhab' wa yao: bam: jhaung qhu" re Asang jhao" cili" mung:- lo, mau" gai: ci: ra" qhoje; sag' qo" ra" mo, re: cili" ako".
25 Lo, mau" de; ra" myiqe: alhab' wa yao: bam nai" to" ra" gai: ra" jid: mo" khyang- anyug mung: ra" khyang- khyang amo, we' sug' gug khyang ne jham re cili" ako".
26 Yao: bam wa cad' be, mug' khyang rere: nai" ako".
27 Au: jhaung qe wa bau: lo, kao: mae we' qao nghoe' pye: mae te' nae" qhid' mae" unug laug we' gatau: laug zai jham re cili" ako".
28 Amung: sheim nae pyo" ra" ja: we' myikaug' jham qhid' mae" xau- gyad xau- sheim nae pyo" ra" ja: jham rere: cili" ako".
29 Jhaung qhu" byid: nug kao bau ko" ra" Israel byu qe Moshe re kad' nae" qhid' mae" amyin" byid' to" ra" mau" qhid' mae" yao: bam: jhaung qhu" jham Asang jhao" cili" byid' ako".
Asang: Zaung Qhid' Mae" Lo,mau" Zaui: Mo,
(Pht 31.1-11)
30 Moshe wa Israel byu qere Asang wa Yuda kaung mae" Hura yao: myid: Uri nho: yauggai zo: Bezale re khyin: yu: ava".
31 Asang wa Bezale re yao" qam: so' byang" sho' ke' byid' ava". Amung: ba jhao: ru- qam: o:- lo, mau" ja: khao: ngo" qhid' mae" ba: gyo" ru-
32 Azung yaung: rumae jhao: ra" pha,jhi"- qhang- ngaui- gyid: bo" we' kad' ra" lo, mau" pha,jhi"-
33 Laug sin" kho' jaung: ra" pha,jhi"-sag' sho: re ba: kyaung" ra" pha,jhi"- gatau: lo, mau" ja: khao: ngo" qhid' mae" pha,jhi" jham yao: re byid' to" ava".
34 Asang wa yao: re we' Dan kaung mae" Ahisamag nho: yauggai zo: Oholiab re yao: shid' yaug: nho: lo, mau" pha,jhi" jham re su gaje qere qo" mho" shid' byid; nae" qam: o: byid' to" ava".
35 Asang wa yao: shid' yaug re co' kyaung" ra" lo, mau"- azung kad' ra" lo, mau" jid: mo" pin: gai jham re qo, ra" lo, mau"- anyug mung: ra" pin:- amo, mung: ra" pin:- sug' gug ne nai" ra" lo, mau" we' gatau mai bau: khyab' shaung: ra" lo, mau" ja: khao: ngo" kad' rumae jhao: ra" pha,jhi" re byid' to" ra". Yao: shid' yaug wa lo, mau" cao jab alhab' re qo" kad' gemung: azung kad' rumae jhao: ru tao ngad: ako".