33
Sina Bam Mae" To" Nae" Asang Amyin" Byid' Ru
1 Asang wa Moshe re nao we' nao: yang Egutu mung" mae" jhui" thug' lo: ra" mo, byu qe- cetau mae" to" lo" ge,. Aimung:- Abraham- Isag- Yaku bam re we' yao: bam: myid:zo: qere byid: nae" ein: ngo dao:so: byid' to" ra" mung" khyo ye" lo" ge,.
2 Ngo wa naonhaung" re khyo qhid' she nae" nga" mug: lagyo: dayaug re nhao byid: nae". Ngo wa Khanan byu- Amori byu- Hiti byu- Perizi byu- Hivi byu Yebusi byu qere khe' thug' pye' nae".
3 Naonhaung" wa myid xau gai: ra" mung" khyo ye" lo" nae" ngad: ako". Ngadqere: ngoyao: wa naonhaung" we' daga" maye: nae". Pe"mung:ga"re naonhaung" wa nhag' lam: qao: ra" byumyu" qe ngad gemung:- ngo wa khyole; mae naonhaung" re se' pye' li" nae".
4 Mo,byu qe wa cedao: re the' gyo: gelao"- yao: bam wa kaug' ngug mung:- phug' de; ra" laug qhang zai mave, maci loko" ngad: ra".
5 Pe"mung:ga"re Asang wa Moshe re yao: bam re- naonhaung" wa nhag' lam: qao: ra" byumyu" qe ngad: ako". Ngo wa dazab zo: za: naonhaung" re bin sho' se' tam" pye' nae". Ana" naonhaung" phug' de; ra" laug qhang zai jham re khyad' pye' mung: naonhaung" re pe" kad' nae" ein: rure ngo myid: phyid' nae"- ga: ta" kyo: nae" amyin" byid' to" ruyang ngad: ra".
6 Airumung: yao: bam Sina bam mae" to" lo" thao- Israel byu qe wa phug' de; ra" laug- qhang zai maci ko" ngad: ra".
Asang: Qhid' Kheim: Mae" Zaung.
7 Israel byu qe thang nae" tab re kad' khao: ngo" Moshe wa ai: gyang" lho" Zaung re yu mung:- thang nae" tab taung gaung shad' dajhid' va" ra" jo, qo mae kad' nae" ngad: ra". Aire Asang: qhid' kheim: Zaung ein: mhang" mung:- Asang we' jho" te' qham nug ra" yaug khag' ngadqere: ai: zaung khyo ye: genae" ngad: ra".
8 Ai: zaung khyo Moshe ye: khao: ngo"- mo,byu qe wa yao: bam: kham: dung: mae ye; jo, mung:- Moshe ai: khyo vao ye" lo" sho' lhaug' na genae" ngad: ra".
9 Moshe ai: khug khyo vao ye" lo" byaug thao- nhag' qhig' zang wa ai: khyo gyo" li" mung: ai: Zaung kham: dung: mae li" thang: na: jo, yang:- Asang wa Moshe re ai: nhag' qhig' khug mae" dao: jhau nae" ngad: ra".
10 Mo,byu qe wa nhag' qhig' zang ai: Zaung kham: dung: mae thang: jo; rure myao we'- yao: bam wa goe; gyo" genae" ngad: ra".
11 Asang wa Moshe we' myo, khung: jho" zhaung: mung: byu dayaug wa yao" ba nam pho" we' dao: jho" jhau: ruru:- dao: lhaung" jhau: ra". Ai: thao Moshe wa tab khyo lhaung" dam: tug' lo ra". Ngadqere: yao: re bao" thaug' byid: ra" Nun nho: yauggai zo: zolau: pho" Yoshu wa ai: Zaung mae na: jo; nae" ngad: ra"- ga: ta" ra".
Yao" Byu Myu" We' Daga" Na Nae" \Dao:so: Byid' Ru
12 Ailao" Moshe wa Asang re- Ce: byumyu" re ai: mung" khyo jhui" ye: nae" qhid' mae" nao ngore ta" to" ru wa dang va". Ngadqere: ngo we' daga" nao khag' re nhao byid: nae" rure wa ngore nao mata" ngad: ra". Nao wa ngore nyang" za: ba mung:- ngore o ngaui: ga: ta" ava".
13 Ana" ngo nao re- caung da" byid: mung: xo' yang nao re qo" ngaui nhao sho' ni" nho: yaung: to" ra" khyo jham re ngore ta" kyo: la,- ce: byumyu" re naoyao" byumyu" kad' nae" nao khyin: yu: to: va" khyo rere: myid: beim: wa,- ga: ta" ra".
14 Asang wa ngo nao we' daga" ye: nae". Amung: ngo nao re aung doe; ru byid: nae"- ga: ta" ra".
15 Ailao" Moshe wa nao ngo we' daga" maye: nae" ngad: re wa ce: jo, qo mae" ngonhaung" re dato" nhao la,-
16 Nao ngonhaung" we' daga" maye: ngad: re nao wa ngore we' ni" byumyu" re ngaui: ra" ga" rure dayaug yaug khoru: qo" ba: yu nae" i? Nao ngonhaung" we' na: jo; ru wa myid gaung dao mae" byumyu" gatau mae" ngonhaung" re shai" nhao: li" nae"- ga: tau" ra".
17 Asang wa Moshe re- nao mho' ru we' dakhyo: ngo kad' nae". Pe"mung:ga"re ngo wa nao re nyang" ba mung:- nao re ngo o ngaui: yang: ngad: ra"- ga: ta" ra".
18 Ailao" Moshe wa jeju khyo" ni" qhid' kheim: mae" bao qhui: ra" bo" bao re ngore myao nhao la,- ga: mho' ra".
19 Asang wa nga" phungbao alhab' ni" qhid' au: khyo" lai: lo" nhao mung:- ni" qhid' kheim: mae nga" gyang" lho" mang re ngo ta" kyo: nae". Ngo wa Asang ngad mung:- ngo khyin: yu: ra" mo; dao mae nhag' khyag' shagu: rure ngo qhu" byid: nae".
20 Nga" myo, khung: re nao re ngo mamyao nhao nae" pe"mung:ga"re khag' re: nga" myo, khung: re myao yang: kao so' magai: daui yang: ngad: ra".
21 Ngadqere: ce: nga" nhae- laug zang dao mae nao qo" ye; jo; ra".
22 Nga" qhid' kheim: mae bao qhui: ra" bo" bao aikhyo" lai: lo" au:- ngo wa nao re laug zang gyo: mae ke' mung: ngo bin: lai: lo" sho' nga" lo; yang nao re nghoe' to: nae".
23 Ai: thao ngo wa nga" lo, re yu: pye' nae". Ailao" nao wa nga" myo, khung: re mamyao ngadqere:- nga" dao kao" re nao myao: li" nae"- ga: ta" ra".