20
Tarha" Zang Daxe Ja:
(Mpm 5.1-21)
1 Mao"So wa dao: jhau mung:- cejham wa yao" dao: thoe ngad: ra".
2 Ngo wa naonhaung" jeim kad' ra" jo, qo Egutu mung" mae" jhui" thug' lo: ra" yaug naonhaung" Mao"So Asang ngad:-
3 Ngo mae" je yang: so gatau re dacaung:pa".
4 Mug:gaung dao mae mangad: lao" myid gaung dao mae- myid gaung agyid' mae mangad lao"- qid khug mae jo; ra" pe" ja sulho rere: naonhaung" qhid' mae" dakad'-
5 Pe" ja" sulho rere: au: pa" dapa"- mangad: lao"- aire dacaung:pa"- pe"mung:ga"re ngo wa ni" Mao"So Asang ngad mung:- ngo wa mai qhi" cao: qere maqo" zang:- ngore nghang" ra" mo, re ngo wa qobo dae byid: mung:- yao: bam: myid:zo: qe sam xag'- byid xag' joe" sho' zao" li" nae".
6 Ngadqere: ngore jhid'de; mung:- nga" tarha" jham re phug' cao" ra" mo, dao mae wa nga" jhid'de; myid re yao: bam: myid:zo: xag' ataung atug xag' joe" sho' qhu" byid: nae".
7 Nga" mang re makhyang" ra" khyo qang yang: daci- pe"mung:ga"re ngo ni" Mao"So Asang wa nga" mang re mangad' ra" khyo" ci: ra" yaug khag' re ngadqere: qobo dae byid' li" nae".
8 Dugno: Ba re phug' cao" mung: ai ba re gyang" lho" sho' kad' ca".
9 Naonhaung" wa naonhaung" mau" zaui: nae" khyaug' ba ayo, qo" ako".
10 Ngadqere: nhad' ba ein: ba wa ngore qhaug' byid' to" ra" Dugno: Ba na ngad: ra". Ai ba mae khag' re: mau" dazaui:- nao we' ni" zo: dau qe- ni" jeim qe- ni" gug'nyhug' jham- ni" mung"dan: mae na: jo; ra" taung bug byu qe khag' re: mau" dazaui:-
11 Ngo Asang wa- khyaug' ba mae myid gaung- mug:gaung- panglai: we' ai: khug mae na: ra" gu: re phan" to" ra". Ngadqere: nhad' ba ein: ba mae wa ngo myaung: ngho" na: ra". Ai: mathao mae ngo Asang wa ai: Dugno: Ba re shaman" byid: mung:- ai ba re gyang" lho" nhao va"-
12 Nao re ngo byid' ra" mung"dan: mae ayo, myao" sho' qo" na nae" qhid' mae"- ni" myhi" we' ni" pho" re phug' myao: ca"-
13 Byu dase'-
14 Myi: shad' lao dashad'-
15 Dakhug'
16 Khag' rere: majo: ra" khyo" qobo dazhaug'-
17 Su gaje: yham re o: dabyid- yao" yham sang myhi" rere:- yao" jeim qere re:- yao" nung: rere:- yao" loze rere: mangad: lao"- yao: sang: ru gatau pe" rere: o: dabyid- ga" ra".
Mo,byu Qenho: Gyaug Myid
(Mpm 5.22-33)
18 Mo,byu qe wa mug: gyug: thoe- Labo" mad thoe re the' gyo: mung: lhe' cad' cad' ru- myikhug' khug' ra" bam re myao gelao"- yao: bam gyaug: nin" gemung: va: va: mae" ye; jo; ako".
19 Yao: bam wa Moshe re- nao ngonhaung" re dao: jhau: re wa ngonhaung" ni" dao: re tae" gyo: nae"- ngadqere: Mao"So ngonhaung" re jhau: re: wa ngonhaung" shid: li" nae" rure gyaug: ra" ga: ta" ako".
20 Moshe wa dagyaug ge,- naonhaung" qobo makad' geshao: ga: Mao"So wa naonhaung" re jham" qu" mung:- naonhaung" yao: re xo' yang: yao: re phug' cao" genae" qhid' mae" kad' ru za: angad: ra"- ga: tau" ra".
21 Ngadqere: mo,byu qe wa va: mae xo' yang: ye; jo, mung:- Moshe wa Mao"So na: ra" jham no, thaui: khyo te' ye" ra".
Phan We' Sin" Ra" Tarha"
22 Asang wa Moshe re- Asang ngo wa mug:gaung mae" naonhaung" re khoru: dao: jhau: rure- naonhaung" myao: avako".
23 Ngo re caung:pa" rumae" je yang: naonhaung" yao" qhid' mae" ngaui so alho- qhang so alho jham re dakad' ge,.
24 Nga" qhid' mae" myid phan re kad' mung: ai: dao mae naonhaung" yao- nung: re bin sho' phad' ngaui" byid' ra" xeim: khyo" we' zam" khug: ra" xeim: khyo" xeim: ngaui" byid: gela,- ngore caung:pa" nae" qhid' mae" naonhaung" qhid' mae" san: to" ra" jo, qo khao: ngo" mae ngo wa naonhaung" jhao" li" mung:-naonhaung" re shaman" byid: nae".
25 Naonhaung" nga" qhid' mae" laug phan kad' yang: ngad: re kho' nyhang" to" ra" laug: yang dazao ge,. Pe"mung:ga"re naonhaung" laug zang kho' rumae co' vo: ci gelao"- naonhaung" wa aijham re ngo magai: cilo: sho' kad' pye' ru ngad: ako".
26 Nga" qhid' mae" phan re ai: khyo do; ye" ra" zam thao dakad' wa,- nao ai khyo nao" do, ye" au:- naoyao" qho' zai re myao nhao: li" nae" ein: Israel byu qere ta" wa,- ga: ta" ra".