17
Laug: Mho" Baui Mae" Qid
(Gys 20.1-13)
1 Israel byu phung: geim" wa Sin din"pyad' yo mae" to" mung: Asang amyin" byid' ra" dajo, qo mae" dajo, qo khyo qui" lhau: ako". Yao: bam Rephidim mae jamu kad' ako". Ngadqere: ai tau mae shaug' qid majo, ngad: ra".
2 Yao: bam wa Moshe re nyhung mung:- ngonhaung" re shaug' qid byid: la,- ga: ta" ako".
Moshe wa- naonhaung" pe"mung: nyhung ko" i? Asang re naonhaung" pe"mung: jham" qu" na ko" i? ga: tau" ra".
3 Ngadqere: mo,byu qe wa qid gyai shab' gemung: Moshe re xo' yang: nyhung: ako". Yao: bam wa Nao ngonhaung" re Egutu mung" mae" pe"mung: jhui" thug' lo: i? Ngonhaung" re we' ngonhaung" zoshao qere we'- ngonhaung" gug'nyhug' jham rere: qid shab' shid nhao nae" qhid' mae" ngad: i? ga: ta" ako".
4 Moshe wa Asang re kyid kyid ga: akyu" mho' mung:- ngo wa ce: byu qere pe" kad' byid: nae" i? Yao: bam wa ngore laug baui: yang pye' se' nae" seim" na: avako"- ga: ta" ra".
5 Asang wa Moshe re- Israel byu qenho: au: jhaung qe daqhae re nao we' daga" jhui: mung: mo,byu qe: gau: qhid' khyo ye: wa,- Nila gyaung: re nao be; ra" zaung: bao" ciye: wa,.
6 Ngo wa Sina bam laug byo; tau ni" qhid' kheim: mae ye; jo, nae" laug byo, re be; ke' wa,- ailao" mo,byu qe: qhid' mae" shaug' qid aimae" yug: thug' lo: li" nae"- ga: ta" ra". Moshe wa Israel byu qenho: au: jhaung qe: qhid' kheim: mae airu kad' ra".
7 Ai: jo, qo re Masa we' Meriba ga: mhang" ako". Pe"mung:ga"re Israel byu qe nyhung gemung: yao: bam wa- Asang wa ngonhaung" we' daga" na: i? Mana i? ga: myid: mung: Asang re jham" qu" geyang: mhang" ru ngad: ra".
Amaleg Byu Qe we' Jho" Zin" Ra" Gyekhe' Poe
8 Amaleg byu qe wa Rephidim jo, qo mae Israel byu qere li" lhe" ako".
9 Moshe wa Yoshu re- byu daqhae: re khyin: yu mung: ne, mo" ba Amaleg byu qere gye yezin: wa,- ngo wa Mao"So yang: zaui" ci nae" ta" to" ra" zaung: bao" re zaui" ci yang: bug gaung gaung: mae ye; jo, nae"- ga: ta" ra".
10 Yoshu wa Moshe yang yao: re amyin" byid' ru we' dakhyo:- Amaleg byu qere gye yezin: nae" thug' ye" lo" ra". Ai: au: mae Moshe- Arun- Hura bam wa bug gaung au: khyo do; ye" lo" ako".
11 Moshe yao" lo, re tau: to' ci: ra" myhao" gu: mae Israel byu qe gye aung: ako". Ngadqere: yao" lo, khyo" ke' lao" wa Amaleg byu qe gye aung: li" ako".
12 Moshe nho: lo, myaung" li" lao"- Arun we' Hura wa Moshe zaung nae" laug baui dalam: gaug: byid: mung:- yao: shid' yaug wa yao" nhae mae ye; jo, yang: Moshe nho: lo, re tau: to' mung: ba vao sho' malab lo: zaui" ci byid' ako".
13 Ceru: Yoshu wa Amaleg byu qere bin sho' zin" aung: pye' ra".
14 Ai: thao Asang wa Moshe re thao phyao: myid: beim: nae" qhid' mae" ce: aung doe; ra" khyo re tung" xam" to: wa,- ngo wa Amaleg byu qere bin sho' se' tam" pye' nae" ein: rure Yoshu re ta" kyo: wa,- ga: ta" ra".
15 Moshe wa phan dalam: kad' mung: aire- Asang wa nga" khyi ngad: ra"- ga: mhang" ra".
16 Yao: wa Asang: khyi re myhao sho' tau: to' ge,- Asang wa Amaleg byu qere apyad ato gye kad' mung: xo' yang: gye zin" li" nae"- ga: ta" ra".