13
Zoqhid' Re Qhaug' Byid' Ra" Khyo
1 Asang wa Moshe re-
2 Zoqhid' yauggai: zo: we' sao qhid' xao" ra" gug'nyhug' lo: alhab' ngore qhaug' byid: gela,- pe"mung:ga"re- Israel zoqhid' yauggai zo: yaug khao: ngo" we' sao qhid' xao" ra" gug'nyhug' dau: khao: ngo" wa nga" nho: ngad: ra"- ga: ta" ra".
Man" Make' Ra" Mug Poe
3 Moshe wa mo,byu qere- naonhaung" jeim kad' na: ra" jo, qo- Egutu mung" mae" naonhaung" thug' lo: ra" ba na ngad: ra" ce: ba na re myid: beim: ge,. Ce: ba na wa Asang yao" qam: so' mo" khyo" yang naonhaung" re jhui" thug' lo: ra" ba na ngad: ra". Man" ke' ra" mug magai zo: ngad: ra".
4 Lho" sao qhid' khye ngad: ra". Abib khye' ce ba mae naonhaung" Egutu mung" mae" thug' lo: ako".
5 Asang wa Khanan byu Hiti byu- Amori byu- Hivi byu- Yebusi byu qenho: mug: myid re naonhaung" phug' pho" qere byid: nae"- ga: dao:so: byid' to" ra". Yao: wa naonhaung" re myid xau gai: ra" mug: myid gai khyo jhui" lo lao"- zin khao: ngo" lho" sao qhid' khye mae ce poe re naonhaung" kad' qo: ako".
6 Naonhaung" wa nhad' ba lam: lam: man" make' ra" mug re zo: mung:- nhad' ba ein: ba mae Asang re phug' myao: nga: yhe' byid' ra" poe re kad' qo: ra".
7 Naonhaung" wa nhad' ba lam: lam: man" ke' yang: kad' to" ra" mug dajhid' re: magai: zo: ngad: ra". Naonhaung" mung"dan: mae man"- mangad: lao"- man" ke' ra" mug magai: jo; ngad: ra".
8 Poe qhid we'- naonhaung" Egutu mung" mae" thug' lo" ra" au:- Asang naonhaung" qhid' mae" kad' ra" lo, mau" mathao mae naonhaung" ce gu: alhab' re kad' ru ngad: ra" khyo re naonhaung" yauggai zo: qere ta" sho' kyo: byid: genae" ngad: ra".
9 Ce: thung" li wa naonhaung" lo, mae taui" te' to" ra" ja:- mangad: lao"- naonhaung" nga: lao: mae taui" te' to" ra" ja: we' dakhyo:- nhug' peim: byid' ra" khyo ngad: li" nae". Airu wa xo' yang: ta" nae" we' Asang: tarha" re zhao: yu nae" qhid' mae" naonhaung" re nhug' peim: byid' li" nae". Pe"mung:ga"re Asang wa yao" qam: so' mo" khyo" yang Egutu mung" mae" jhui" thug' lo: ruyang ngad: ra".
10 Zin: khao: ngo" dang: to" ra" ayo, mae ce: poe re kad' na ge,.
Zoqhid'
11 Asang wa naonhaung" phug' pho" qere we' naonhaung" re dao:so: byid' to" ra" Khanan byu qe: mung" khyo naonhaung" re jhui" lo: li" nae". Yao: ai: mung" re naonhaung" re byid: lao"-
12 Naonhaung" wa saoqhid' yauggai zo: yaug khao: ngo" re Asang re qhaug' byid: ca" genae" ngad: ra".Sao qhid' xao" ra" gug'nyhug' lo: dau: khao: ngo" wa Asang nho: ngad: ra".
13 Ngadqere: naonhaung" wa sao qhid' xao" ra" loze lo: dau: khao: ngo" re ai yao: nau" re atha" qhaug' byid: yang: Asang lo, mae" gai: dam: vai: yu: li" nae". Naonhaung" ai: loze re manug: dam: vai: yu ngad: re wa yao" lang zang: re khyug' pye' ge,- naonhaung" wa zoqhid' yauggai zo: qe yaug khao: ngo" re gai: tug' vai: yu: ra".
14 Joe" lo nae" ayo, mae- ce: tarha" lajheim: re naonhaung"yauggai zo: qere myid: gelao"- naonhaung" wa ngonhaung" jeim kad' na: ra" jo, qo Egutu mung" mae" Asang wa yao" qi" qhang: ra" qam: so' re ci yang: ngonhaung" re jhui" thug' lo: ra".
15 Egutu kho:kham pho" wa nhag' lam: qao mung: ngonhaung" re nhao: ke' nae" ha: pye' lao" Asang wa Egutu mung" mae" zoqhid' yauggai zo: yaug khao: ngo" re we' sao qhid' xao" ra" gug'nyhug' lo: dau: khao: ngo" re se' pye' ra". Ceru mung: ngonhaung" wa sao qhid' xao" ra" gug'nyhug' lo: re Asang re xeim: ngaui" byid' ru ngad: ra". Ngadqere: ngonhaung" nho: zoqhid' yauggai zo: qere wa gai: tug' vai: yu: ra".
16 Ce: thung" li wa- Naonhaung" lo, mae taui" te' to" ra" ja:- mangad: lao"- naonhaung" nga: lao: mae taui" te' to" ra" ja: we' dakhyo: nhug' peim: byid' ra" khyo ngad: li" nae". Asang wa yao" qam: so' mo" khyo" yang Egutu mung" mae" ngonhaung" re jhui" thug' lo: ra" ai khyo wa ngonhaung" re nhug' peim: byid' li" nae"- ga: ta" ra".
Myi: Zang We' Nhag' Qhid' Zang
17 Egutu kho:kham Israel byu qere nhao: ke' lao"- Mao"So wa khyo ajhao" gau: ngad: ra" Philisti mung" khyo" lai: do, lo" ra" khyodang khyo" yao: bam re majhui" lo" ngad: ra". Yao: bam gyekhe' ca" rure myao gelao"- Israel byu qe yao: bam: nhag' lam: lhai" pye' mung: Egutu mung" khyo dam: tug' phao: lo" genae" rure ngo manug ga: Mao"So myid: ra".
18 Ai: atha" yao: wa yao: bam re Tham: Ne khyo joe" ra" khyo lhang" gau: din"pyad' yo khyo" jhui" ye" lo" ra". Israel byu qe wa gyekhe' poe qhid' mae shae lhae we' ngad: ako".
19 Yoseb yang Israel byu qere kad' genae" qhid' mae" dao:so: byid' to" ru we' dakhyo:- Moshe wa Yoseb nho: mao gaung re yao: we' daga" cilo" ra". Yoseb wa Mao"So naonhaung" re khyad' yu lao"- naonhaung" wa nga" mao gaung re ce: jo, qo mae" naonhaung" we' daga" dao: lo" ca" ra"- ga: ta" to: co' ra".
20 Israel byu qe wa Sukhod mae" to" mung: din"pyad' yo ayae mae" Etham mae thang: ako".
21 Asang wa yao: bam re khyo shid' byid: nae" qhid' mae" na" gaung gyo: mae yao: bam qhid' au: mae nhag' qhid' zang khyo" ye" lo" mung: myi" ayo, gyo: mae wa yao: bam myi" re: na" re: qo" su genae" qhid' mae" yao: bam re bo" bao byid: nae" myi: zang khyo" ye" lo" ra".
22 Nhag' qhid' zang wa na" gaung: gu: mae khonhae" re: mo, byu qenho: qhid' au: mae ngad mung:- myi" re wa myizang ngad: ra".