11
Zoqhid' Yauggai Zo: Shid: Nae" Rure Moshe Ta" Ru
1 Ai: thao Asang wa Moshe re- ngo wa Egutu kho:kham we' yao" mung" byu qere qobo dae daja: za: nhao byid: lo nae".
2 Ana"- Israel qere dao: jhau mung:- yao: bam: yham kyo: cao: qere qhang we' ngaui zai jham re mho' yu genae" qhid' mae" yao: bam alhab' mo, re ta" wa,- ga: ta" ra".
3 Asang wa Egutu byu qere Israel byu qere phug' myao: nhao: ra". Gai: gai: yao:- zug: qe we' mung" byu qe alhab' wa Moshe re gyai akhyag: ra" qi" qhang: yaug ga: jho: ako".
4 Ai: thao Moshe wa kho:kham pho" re- ngo wa myi" gae gaung: re Egutu mung" geim" khyo jao: sho' ye: mung:-
5 Kho:kham xo' kad' nae" ra" kho:kham pho" nho: yauggai zo: mae" gaung gyag: ra" jeim myhi" yauggai zo: joe" sho' Egutu mung" mae" zoqhid' yauggai zo: qe yaug khao: ngo" shid: li" genae". Qhid' xao" ra" nung: jham alhab' re: shid: li" genae".
6 Khonhae" re: maboe" qu" ru we' khonhae" re: maboe" nae" ra" gyi: hug' ngug: ru wa Egutu mung" geim" mae boe" li" nae".
7 Ngadqere: Israel byu qere we' yao: bam gug'nyhug' jham re wa lakha" yang lhao" re: maqe, nae". Ailao"- ngo Asang wa Egutu byu qe we' Israel byu qe: agyo: mae gakai lai jho" shai" nhao: to" rure nao ba: li" nae" ga: Asang ta" ra"- ga: ta" ra".
8 Moshe wa dao: pin" khyo"- ni" zug: qe alhab' wa ngojhao" joe" li" gemung:- nga" qhid' kheim: mae li" goe; gyo" gemung:- yao: bam wa nga" byu qe alhab' re jhui: yang: hug' lo" nae" ngore mho' li" genae". Ai: thao ngo wa to" thug' lo" nae" ga: ta" co' mung: Moshe wa gyai qi: sho' nhag' yo" ru we' kho:kham pho" mae" thug' lo" ra".
9 Asang wa Moshe re- Egutu mung" mae ngo je yang: mug' pho: qo" kad' qhu" nae" qhid' mae" kho:kham pho" wa ni" dao: re tae" gyo: nae" xo' yang: ha: pye' li" nae"- ga: ta" to" ra".
10 Moshe we' Arun tao wa ce: mug' pho" alhab' kho:kham pho" qhid' kheim: mae kad' qhu" ako". Ngadqere: Asang wa yao: re nhag' lam: qao nhao mung:- yao: wa Israel byu qere yao" mung"dan: mae" manug: nhao: ke' ngad: ra".