3
Caung:pa" Mau" Dam: Qhid Ra" Khyo
1 Lho" nhad' khye' ein: khye' joe" re Israel byu qe alhab' wa yao: bam: vogaung: mae te" na: ako". Aimung: yao: bam alhab' wa Yerusalem mae phaung: ham: ako".
2 Aimung: Yehozadag nho: yauggai zo: Yoshu- yao" khinjaung byin cao: qe we'- Shealtie nho: yauggai zo: Zerubabela bam wa yao" amyu" ba nam we' daga" za: Mao"So: byu Moshe nho: tarha" mae tung" to" ru we' dakhyo: cao" yang: xeim: phad' ngaui" byid: nae" qhid' mae" Israel nho: Mao"So: phan re dam: kad' to" ako".
3 Pyaung" nha: to" rumae" dam: tug' lo: ra" Israel qe wa ai: mug: mae na: jo; ra" byu qere gyaug gesho' ngadqere: phan re sao qhid' zhaug' to" ra" khu mae dam: zhaug' to" ako". Aimung: yao: bam wa ne, kao we' myi" thao mae abang mabyid ngaui" byid' ra" xeim: jham re dam: ngaui" byid' qhid: ako".
4 Yao: bam wa tarha" thung" li re cao" yang: zaung poe kad' ako". Ba khao: ngo" ai: ba na: qhid' mae" ngaui" byid: ca" ra" xeim: re byid' ako".
5 Aitho' mago" dau: geim" phad' ngaui" ca" ra" xeim: we' lho" xin: poe ba mae qhaug' byid: ca" ra" xeim: jham Asang re caung:pa" ra" khyo mae" phaung qham jao: jham alhab' mae qhaug' byid: ca" ra" gu: rere: myid bug: ngaui" xeim: jham we' dakhyo: za: Asang re qhaug' byid' ako".
6 Mo,byu qe wa Caung:pa" Yham re madam: zhaug' shi: gengadqere: lho" nhad' khye' ein: khye' sao qhid' lho" xin: daba: ba mae Asang re ngaui" xeim: phad' ngaui" byid' ako".
caung:pa" Yham Dam: Zhaug' Qhid: Lo" Ru
7 Mo,byu qe wa laug zao zao mo, we' lagsama qere byid: nae" ngaui ke' mung: zo:ve- shaug' pho: we' zhanlun xau re Lebanon mae" shaug' gae jham we' jho" tha" yang: panglai: qid khyo: khyo" Yopa gau: khung: khyo tai: yu nae" qhid' mae" Ture we' Sidon vomo" jham khyo dai" byid' ako". Cegu: alhab' re Persia khosin" Kuru nho: akhang" khyo" yang kad' ru ngad: ra".
8 Aimung: Yerusalem mae" Caung:pa" Yham qo khyo yao: bam joe" lo thao shid' zin ein: zin lho" shid' khye' ein: khye' mae yao: bam mau" zaui" qhid: ako". Zerubabela- Yoshu we' dang: ra" yao: bam mao:nhaung: mang: byu qe alhab' khinjaung qe we' Levi byu qe- gaigai: ga" re pyaung" nha: to" rumae" Yerusalem khyo dam: tug' lo mo, alhab' wa mau" ceim" qhan" zaui" ako". Apyad shid' xe zin we' ai: tho' qi: mo, Levi byu alhab' re Caung:pa" Yham dam: zhaug' ra" mau" mae au: she nhao: ako".
9 Levi byu Yeshua we' yao" yauggai zo: qe yao" amyu" ba nam sang: cao: qe we' Kadmie we' yao" yauggai zo: qe ngad ko" ra" (Hodavia kaung) wa Caung:pa" Yham dam: zhaug' ra" mau" re bo: qu" ako". (Yao: bam re Henadad kaung mae" Levi byu qeyang bobao" byid' ako".)
10 Yham kad' mo, Caung:pa" Yham apan aqao: kyae: qhid: lo" au: re- bau: qhang ve; ci: ra" khinjaung qe wa lo, mae labo" jham ci mung: yao: bam yao" jo, qo yu: ako". Aimung: Asab kaung mae" Levi qe wa jhe' cang" jham ci mung: aimae ye; jo; ako". Yao: bam wa Davi kho:kham pyad mae" gyo" lo: ra" tarha" we' dakhyo: cao" yang: Asang re caung:khin" ako".
11 Yao: bam wa- Asang re caung:khin" ra" nghaui" caung: re dam: paug' yang: yang:- Asang wa gai: ra". Amung: yao" jhid'de; myid wa Israel qe: qhid' mae" apyad ato ngad: ra" wo" ga: nghaui"caung" ako".
Yaug khao: ngo" wa Asang re caung:khin" mung: yao: yaug yao: qam: bo: thao" qhi" hug' ako". Pe"mung:ga"re Caung:pa" Yham apan aqao: kyae: ra" mau" re qo" qhid: to: yang: ngad: ako".
12 Je: mao: va" khinjaung qe- Levi byu qe we' byumyu" kaung au: jhaung qe wa sao qhid' mae" Caung:pa" Yham re the' myao: qu" gemung:- ce: Caung:pa" Yham apan aqao: re kyae: rure li" laug' qu" na: ko" au: yao: bam wa gyi: ngug mung: ngug yao" yao" ako". Ngadqere: aimae joe" na: bam ko" ra" gaje: gu: wa ngaui bau: ngaui lho" hug' ako".
13 Ngaui bau: ngaui lho" hug' ra" thoe we' gyi: ngug: ra" thoe re khag' maqo" ba: gyo" kho' ngad: ra". Pe"mung:ga"re yao: bam gyi: hug' ra" thoe wa va: va: mae" the' gyo: naeqhi" ngad: ra".