9
Yerusalem Qobo Dae Byid: Qhug' Ru
1 Ailao" Mao"So hug' rure ngo the' gyo" ke' va". Ai: vomo" re qobo dae byid nae"- naonhaung" ce: khyo li" qu" shige,. Naonhaung" nho: gyezai jham re cili" ge,- ga: hug' ra".
2 Ailao" jao"- taung gaung Caung:pa" Yham: mug: am: shad' kham: mo" mae" yauggai khyaug' yaug thug' li" ako". Yaug khao:ngo" wa gyezai dalam: lam: ci: ako". Yao: bam we' daga" jid: mo" pin: mai bau: ve, mung: tung" zai daja: ci: ra" byu dayaug bobo: ra". Yao: bam alhab' li" mung: gyid: bo" phan nhae mae ye; jo; ako".
3 Aimung: Israel nho: Mao"So bo" bao qhi qhi mung: ru wa- daung de; ra" gug'nyhug' jham mae" thug' li" yang: yao: jo; ru mae" Caung:pa" Yham kham: dung: khyo qui" ye" lo" ra". Asang wa jid: mo" mai bau: ve; ci yaug re khai: ke' ra".
4 Yerusalem vomo" geim" jao: sho' ye: mung: vomo" khug mae maca' majhad' kad' na ko" ra" lo, mau" alhab' mathao mae nhag' lam: gyug: qam: shan mung: myid: qug: sang: kho" na mo, yaug khao:ngo" nho: nga: lao: mae axam: kad' ke' wa,-
5 Aimung: gatau dayaug re Mao"So dao: jhau: rure ngo the' gyo" ke'- yao" thao mae vomo" khyo cao" vao ye: mung: se' tam" pye' wa,- khag' dayaug rere: datang" to:- khag' dayaug rere: nhag' dakhyag'- ga: ta" ra".
6 Mao: zo: qere- zolau: qere- zomyi: qere- myhi" zang qere we' zoshao qere se' pye' wa,- ngadqere: nga: lao: mae aso: tung" ci yaug khag' rere: datin: wa,- ce: nga" nho: Caung:pa" Yham mae" se' qhid wa,- ga: ta" ra". Ai mung: yao: bam wa- ai: Caung:pa" Yham mae ye; jo; ra" au: jhaung qe mae" se' qhid: ako".
7 Mao"So wa yao: bam re- Caung:pa" Yham re phoe nhao: pye' ge,. Ai: vang" mae sushid maogaung byang" byaug nhao ge,- mau" zaui: gese,- ga: ta" ra". Aimung: yao: bam wa ai: vomo" mae" byu qere se' qhid lo" ako".
8 Airu: se' lo" na: au: re- ai: jo, qo mae ngo yao: za: na: jo;- ngo wa myid gaung mae lamhaung: lagoe, goe; lang" jo, mung: hug' ra". Kho:kham Asang we"- nao wa Israel mae" na: dang: ra" yaug khao:ngo" re se' pye' nae" qhi" yao: Yerusalem re nhag' yo: va" i? ein: hug' ra".
9 Mao"So wa- Israel we' Yuda mung" byu qe wa gyaug: din ja: qobo jham qo" ako". Yao: bam wa damug: myid: geim" mae byu se' mau" shad' gemung:- Yerusalem re lhad' se' mau" byang" jo, nhao: ako". Yao: bam wa ngo: yang yao: bam: mung"dan: re shapye' to: co' va" rumung: yao: bam re ngo mathe' myao byid:- ga: ta" ako".
10 Ngadqere:- ngo wa yao: bam re nhag' makhyag' nae". Yao: bam: yang su gaje qere kad' lo va" ru yao: bam re ngo kad' nae"- ga: ta" ra".
11 Ailao" jid: mo" pin: mai bau: ve, yaug dam: tug' lo mung: Asang re ni" nho: amyin" dao: jham re ngo kad' cao" bin va"- ga: lau lota" shid' ra".