37
Shoqug: Kyaug' Jham Jo; Ra" Lao: Khaung:
1 Asang: nho: kheim: so' wa nga" dao mae jo; jo; ra". Aimung: yao" nho: byo wa ngo re jhui" lo" yang: myid gaung mae shoqug: jham byang" jo; ra" lao: khaung: mae lo" nha: to" ra".
2 Yao: wa ngo re lao: khaung: gam: sho' jhui" du" qin" mung:- ai: jo, qo mae shoqug: myo: sho' jo; ru we' ai: shoqug: jham wa gyai kyaug' jo; ru the' myao:-
3 Yao: wa ngo re- shid ba: ra" yaug we"- ce: shoqug: jham wa kao so' dam: qo" daui: lo: li" genae" i?- ga: myid' ra".
Ngo wa- kho:kham Asang we"- ai re wa nao yao: za: aqo" phyid: ra" ein: ta" va".
4 Yao: wa- ai: shoqug: jham re qang yang: lapa pa wa,- ce: shoqug: jham re Asang: nho: mungdao: tae" gyo: nae" qhid' mae" ta" kyo: wa,-
5 Yao: bam re- kho:kham Asang ngo ceru: ta" na: ru ta" kyo: wa,- ngo wa naonhaung" khug khyo so' mad: zaui: ke' mung:- naonhaung" re kao so' dam: daui: li" nhao nae".
6 Ngo wa naonhaung" re shogyi: shomhaung" jham ke' byid: mung: naonhaung" re shoqid lham: byid: nae". Ngo wa naonhaung" khug khyo so' mad: ke' byid: nae". Ailao" naonhaung" wa ngo Asang ngad: rure ba: li" genae"- ga:ta" ra".
7 Aimung: ngo wa- ngo re ta" to: va" ru we' dakhyo: lapa pa va". Ngo jhau: na: au: re kug kug kag kag ga: myang thoe the' gyo"- ai mung: shoqug: jham jho" xo' taui" lo" ako".
8 Ngo lhaug' qu" na: au: re- shoqug: jham mae shogyi: we' shomhaung" jham de; li" mung: ai: thao shoqid lham" lo: ako". Ngadqere:- ai sushid mao gaung jham mae kao so' mabo ngad: ako".
9 Mao"So wa ngo re ceru: ta" ra"- shid ba: ra" yaug we"- la re qang yang: lapa pa wa,- ai: la hug' re- kho:kham Asang wa shad' khao:ngo" khyo" lo mung:- ai: sushid maogaung jham: akhug khyo mad: hug' vao lo" ru: yang- yao: bam re kao so' dam: daui nhao wa,- ga: amyin" byid' ra" ein: ta" kyo: wa,- ga: ta" ra".
10 Aimung: ngo wa ngo re ta" to: va" ru we' dakhyo: lapa pa va". Kao so' wa sushid maogaung jham khyo vao lo" mung:- aijham wa kao so' daui yang: to" ye; li" ako". Yao: bam wa gyetab datab qo" boe" nae" nho" myo" ako".
11 Mao"So wa ngo re ceru: ta" ra". Shid ba: ra" yaug we"- Israel byumyu" qe wa ce: shoqug: jham we' dau: ako". Yao: bam wa- kyaug' ho: byaug mung:- myid: lao" jo, qo maqo" ru we' joe" lo nae" ayo, ga: ru majo, lo: ga: ta" ako".
12 Aimung: nga" byumyu" Israel re qang yang: lapa pa wa,- aimung: kho:kham Asang ngo wa yao: bam: lab jham re phung" ke' nae" ga" ein: ta" kyo: wa,- ngo wa yao: bam re phoe' thug' yu mung: yao: bam: re Israel mug: myid khyo dam: jhui" tug' lo" nae".
13 Ngo wa nga" nho: byumyu" Israel re nyhab' to" ra" lab jham re phung" ke' mung: yao: bam re jhui" thug' yu: ra" au:- yao: bam wa ngo Asang ngad: rure ba: li" genae".
14 Ngo wa nga" nho: so' re yao: bam mae ke' byid: mung: yao: bam re kao so' dam: daui nhao: ru we' yao: bam yao" mug: myid mae na nhao nae". Ailao" yao: bam wa ngo Asang ngad: rure ba: li" genae". Ngo wa ceru re kad' nae" ein: ta" to: va". Aimung: ngo kad' ke' nae" ein: ngo Asang ta" to: va"- ga: ta" ra".
Damung" Dan: Za: Ngad: Ra" Yuda We' Israel
15 Asang wa ngo re dam: jhau: ra".
16 Shid ba: ra" yaug we"- sag' khyaung: dakhyaung: yu mung: ai: dao mae ce: dao: kheim: jham re Yuda kho:kham mung"dan:- ein: tung" te' to: wa,- aimung: sag' khyaung: gatau dakhyaung: re dam: yu mung: ai: dao mae ce: dao: kheim: jham re- Israel kho:kham mung"dan: ein: tung" te' to: wa,-
17 Ailao" ai: sag' khyaung: shid' khyaung: geim" mae" athao thao re- jho" zaui" zhaung: mung: sag' khyaung: dakhyaung: za: ru: ci: to: wa,-
18 Ni" byu qere nao re- ceru wa pe" ta" nug: ru ngad: i? ga: myid: gelao"-
19 Yao: bam re- Kho:kham Asang ngo wa Israel re gaung tha" ke' ru sag' khyaung: re yu mung:- Yuda re gaung tha" ke' ra" sag' khyaung: we' xo' to: nae". Ngo wa- ai: sag' khyaung: shid khyaung: re dakhyaung: za: kad' pye' mung:- ai: re nga" nho: lo,mae zaui" ci nae".
20 Ai: sag' khyaung: shid' khyaung: re ni" nho: lo,mae zaui" ci mung: mung" byu qere myao nhao wa,-
21 Ai: thao- kho:kham Asang ngo wa nga" nho: byumyu" alhab' mo, re- yao: bam yena: lae" jo, ko" ra" byumyu" qe: khug mae" jhui" thug' yu mung:- yao: bam re khai: zhang: to" ru we' yao: bam: mug: myid khyo dam: jhui" tug' lo nae".
22 Ngo wa yao: bam re Israel mung" mae" bam jham mae ai mug: myid mae byumyu" damyu" za: qhan" pye' nae". Aimung: yao: bam wa yao: bam re eib nae" kho:kham dayaug za: qo" genae". Aimung: yao: bam wa byumyu" shid' ja: khyo" khonhae" re: makho' lo: genae". Kho:kham mung"dan: shid' lam: khyo" re: mabyo; gao: lo: genae".
23 Yao: bam wa yao: bam yao" gaung re maca' majhad' sulho jham khyo" yang khonhae" re: masan masin" boe" nhao lo: genae" mangad:- yao: bam yao" gaung re qobo: yang re: byo; qeim nhao lo: genae" mangad:- ngo wa yao: bam re- yao: bam: qobo shad' ra" khyo alhab' mae" we'- ngo re gye tug' kad' ru mae" loe, beim nhao: ke' nae". Ngo wa yao: bam re kyang" san: yu nae". Yao: bam wa nga" nho: byumyu" qe boe" mung:- ngo wa yao: bam: Mao"So ngad nae"-
24 Nga" nho: daui daui yaug Davi ru"ru kho:kham dayaug wa yao: bam: kho:kham ngad: li" nae". Yao: bam alhab' mo, wa mung" eib zug: dayaug: qao: mae za: zang" qham mung: nga" nho: tarha" jham re jhaug' zaug taung" phug' cao" li" genae".
25 Yao: bam wa- nga" nho: daui daui yaug Yaku re ngo byid' ra" mug: myid dao mae- yao: bam: phug' phyid' qe na: lai: lo: ra" mug: myid dao mae na: li" genae". Yao: bam wa ai: mae apyad ato na: li" genae". Yao: bam: zoshao qe we' yao: bam: myid:zo: qe alhab' re: ai we' dakhyo: apyad ato na: li" genae". Nga" nho: daui daui yaug Davi ru"ru kho:kham dayaug wa- yao: bam: adao mae apyad ato eib: na: li" nae".
26 Ngo wa- apyad ato mae gug: gam jo, qo qhid' mae" dao: thang" dalam: re yao: bam we' kad' to: nae". Ngo wa yao: bam re tau: to' mung:- yao: bam: byulam: re myo" je" li" nhao nae". Aimung: yao: bam: mug: myid mae apyad ato jo; jo, nae" qhid' mae" nga" nho: Caung:pa" Yham re to: byid: nae".
27 Ngo wa ai: jo, qo mae yao: bam we' daga" na nae"- ngo wa yao: bam: Mao"So boe" mung: yao: bam wa nga" nho: byumyu" ngad: li" genae".
28 Ngo wa nga" nho: Caung:pa" Yham re ai: mae apyad ato jo; jo, nae" qhid' mae" yao: bam: phaung gaung: mae to" to: byid' au:- byumyu" qe wa- ngo Asang yao: Israel byumyu" re nga" nho: byumyu" boe" nae" qhid' mae" khyin: yu: rure ba: li" genae".