26
Ture Re Qobo Zhaug' Yang: Lapa Pa: Ru
1 Ngonhaung" pyaung" nha: to: qhug' ru daxe: dazin ein: zin lho" xin: daba: ba mae Asang wa ngo re li" jhau: ke' ra".
2 Shid ba: ra" yaug we"- ceru wa- Ture vomo" mae" byu qe bau" ra" khyo ngad: ra". Yao: bam wa- Yerusalem wa mhan" ngad: ava". Yao: nho: aung: zo: aung: shaug' phaga: kheim: so' baui" byaug va". Yao: wa ngonhaung" we' jho" mai qhi" nae" yaug mangad: lo:- ga: ta" ako".
3 Ailao" ana" ceru wa- ngo Asang ta" na: ru ngad: ra". Ture vomo" we" ngo wa ni" nho: gyevo ngad:- ngo wa nao re khe' zin: nae" byumyu" myo: sho' re jhui" lo byid: nae". Aimung: yao: bam wa panglai: bang: lhung" jham we' dakhyo: lo: li" genae".
4 Yao: bam wa ni" nho: vomo" vang khyae bao jham re phyo' qheim" pye' mung: ni" gyebyu zaung jham re phyo' khyo" pye' byid' li" genae". Ailao" ngo wa phalhug alhab' re sham" jhad' pye' mung: laug zang cin cin za: tang" to: byid: co' nae".
5 Airu: panglai: mae jo; jo; ra" jo, qo gu: mae- ngo: kung" mo, wa yao: bam: geim jham re lhe' ho: li" genae". Kho:kham Asang ngo ta" to: va". Byumyu" qe wa Ture re khe' zin" lhad' yu: pye' li" genae".
6 Aimung: yao: bam: shae pyang: jham: yang mung"dan: akao" khug mae jo, ra" yao" vogaung: jham mae na ko" ra" mo, re se' pye' li" genae". Ailao" Ture wa ngo Asang ngad: rure ba: li" nae".
7 Kho:kham Asang ta" ra". Ngo wa kho:kham alhab' mae" qi" thao" yaug Babelon mae" kho:kham Nebugkhaneza re jhui" li" mung: Ture re khe' zin: nhao nae". Yao: wa mug: am: shad' mae" myao: jham myao: lhin" jham we' myao: dab bobo: ra" gyetab aqi: datab we' lo: li" nae".
8 Mung"dan: mae" vogaung: jham mae na mo, wa gyekhe' jao: mae se' pye' ru qhug' li" genae". Gyevo wa gyab lhao: jham dau: mung: myid zhai: bam" dau" bam" yang: nao re kyae" jhid' nae" qhid' mae" tang: ra" vang khyae bao jham kyae" zao: li" nae".
9 Yao: bam wa ni" nho: vang khyae bao jham re vang phyo' sag' thaung: jham: yang deim" thaung: mung:- ni" gyebyu zaung jham re yao: bam: jo,to' khyaung: jham: yang phyo' khyo" pye' li" genae".
10 Yao: bam: myao: jham: yang zab: pug: thug' ke' ra" phalhug thaui: jham wa nao re nghoe' pye' li" nae". Byo; qeim: jo; ra" vomo" kham: mo" khyo" yao: bam keim" lai: lo" ko" ra" au: zai tho lhin" jham we' gyekhe' myao: lhin" jham re she: ra" yao: bam: myao: jham: thoe wa ni" vang khyae bao jham re laui" nan" nhao: li" nae".
11 Yao: bam nho: myao: jui: mo, wa ni" hau" mo" khyo khyo" dam: lo" zo" re" yao: bam: shae pyang: jham: yang ni" byu qere se' pye' ako". Ni" nho: gyag: ra" zang baung: jham wa myid gaung khyo pye' khyo" pye' ru qhug' genae".
12 Ni" nho: gyevo qe wa ni" nho: jo,nho" we' aung: xan: jham re yu: sang: zo" pye' li" genae". Yao: bam wa ni" nho: vang khyae bao jham re phyo' khyo" pye' mung: yaung" ra" ni" yham jham re phyo' sin" pye' byid' li" genae". Yao: bam wa laug baui jham- sag' thaung: jham we' laug zo: zhoyid jham re sham" yu mung: panglai: khyo tai: khyo" pye' li" genae".
13 Ngo wa ni" nghaui" caung: alhab' re thao" nhao: pye' mung:- ngo wa ni" tang: jham: nho: nghaui" thoe jham re tae" byaug nhao nae". Ngo wa- ngo: kung" mo, yao: bam: geim qo" lhe' ho nae" qhid' mae" laug thin za: to: byid: co' nae".
14 Ai: vomo" re khonhae" re: madam: zhaug' te" to: lo nae". Kho:kham Asang ngo ta" to: va".
15 Kho:kham Asang wa Ture vomo" re ta" nae" cedao: qo" ra". Nao re gyekhe' aung: pye' ra" au: re panglai: tham: yae khaung: cao" yang: na: ra" mo, wa- se' pye' qhug' mo, hug' gyi: ra" thoe: yang kyaug' tin" ru qhug' li" genae".
16 Pang:lai: mae qho: zo" ra" byumyu" qenho: kho:kham alhab' mo, wa yao: bam: kho:kham zaung tao" jham mae" gyo" lo" li" genae". Yao: bam wa yao: bam: bau: qhang jham we' thug' nag: shaung: to" ra" yao: bam: mai bau: jham re khyad' pye' mung:- myid gaung mae nin" zaung: bam: li" genae". Yao: bam wa nao de, zo" ra" au: pa re saung" qu" gyaug mung: yao: bam wa nin" ru maqo" thang genae".
17 Yao: bam wa ni" qhid' mae" ce: sushid nghaui" caung: re caung: byid' li" genae".
Lahau: qi" ra" vomo" wa- phyo' qheim" pye' qhug' va".
Yao" nho: sang pho jham wa-
panglai: mae" sham" pye' qhug' ava". Ce: vogaung: mae na: ra" byu qe wa panglai: re eib mo, ngad: ako".
Aimung: panglai: tham: yae mae na: ra" mo, alhab' re gyaug: din nhao: ava".
18 Ana" ai: vomo" gyang: gyo" ra" ba mae
gagyo: kao" jham wa nin" na: ako".
Aimung: yao: bam: byu qe wa airu" ra" byo; qeim: rure qu" din: mo; byaug: ako".
19 Kho:kham Asang ta" ra" ngo wa nao re khag' mana lo" ra" vomo" jham we' dakhyo: cae: jhug tag kad' pye' nae". Ngo wa nao re- nammugdara tham: kao" jham mae" qid: yang nhai" pye' nae".
20 Ngo wa nao re- ganhae" gaco' pyad mae" na: jo, ko" ra" byu qe we' daga" lo" na nae" qhid' mae" shid: ra" movo: mug: khyo nao re nhao: khyo" ke' nae". Ngo wa nao re apyad ato mae byo; qeim: jo; ra" mug: myid agyid'- shid mo, re nha: to" ra" jo, qo mae nao re na nhao nae". Ai: mathao mae nao wa khonhae" re: byu madam: na: ra" jo, qo boe" mung:- daui: na mo; nho: mug: myid mae ni" jo, qo maqo" yu lo nae".
21 Ngo wa nao re- gyaug din ja: dao: tau" boe" nhao mung: airu wa ni" nho: athao" ngad: li" nae". Supe" wa nao re qho: li" genae". Ngadqere:- nao re khonhae" re: maqhug' myao genae"- kho:kham Asang ta" to: va".