13
Lapa Pho" Apyag' Qere Ngag: Thaug' Ra" Lapa Dao:
1 Asang wa ngo re jhau: ra"-
2 Shid ba: ra" yaug we"- yao: bam yao" lapa dao: re mhug' pa ko" ra" Israel nho: lapa qere ta" phoe: pye' wa,- Asang: nho: mung dao: re tae" gyo: nae" qhid' mae" yao: bam re ta" shid' wa,-
3 Ceru wa kho:kham Asang ta" ru ngad:- ai wa nhag' magyang" ra" lapa jham wa byuxa: voqoe, qhug' ako". Yao: bam wa yao: bam yao" alo zo: re vhao" yu mung: yao: bam yao" nho: qhu" lho re kad' ta" thug' ako".
4 Israel byumyu" qe we"- naonhaung" nho: lapa jham wa byo; qeim: jo; ra" vomo" mae na: ra" zag ne jham we' dakhyo: pe" yao: akyu" mabo ngad: ako".
5 Yao: bam wa vang byo; jad: lo" ra" jo, qo jham mae malhaug' zaung" ngad: ako". Yao: bam wa vang jham rere: madam: qo" zhaug' ngad: ako". Aimung: Asang: nho: ba na mae mang: zin" ru joe" lo: au: Israel re gyevha gug: gam maqo" byid ngad: ako".
6 Yao: bam: qhu" lho jham wa apyag' jham ngad: ako". Aimung: yao: bam ta" to" ru wa mhug' ra" dao: jham ngad: ako". Yao: bam wa nga" nho: mung dao: re ta" hau" na: ga: ta" gengad yang: re: yao: bam re ngo manhao: ke' va" re- ngadqere:- yao: bam wa yao: bam: dao: jham jo; dang: lo nae" rure myid: lao" ako".
7 Ngo wa yao: bam re- naonhaung" myao: ra" ai: qhu" lho jham wa apyag' ngad: ra". Aimung: naonhaung" ta" to" ru jham wa mhug' ra" dao: jham ngad ako". Naonhaung" wa ai jham nga" nho: dao: jham ngad ga: ta" ako". Ngadqere: naonhaung" re ngo majhau va" re- ein: ta" va".
8 Aimung: kho:kham Asang wa yao: bam re- naonhaung" nho: dao: kheim: jham wa madang: ru ngad: ako". Aimung: naonhaung" nho: qhu" lho jham wa amhug' apyag' jham ngad: ako". Ngo wa nao re ngag: thaug' ra".
9 Ngo wa- qhu" lho apyag' we' khyonghung: jhui" nghung" ra" dao: ta" mo, lapa naonhaung" re qobo dae byid nae" za: angad lo". Nga" byumyu" qe myid: phyid' ra" au: naonhaung" mana genae". Naonhaung" nho: mang jham wa Israel byumyu" qenho: japhin: mae mabo genae". Naonhaung" wa ai mug: myid khyo khonhae" re: madam: tug' phao: lo genae". Ailao" ngo kho:kham Asang ngad: rure naonhaung" ba: li" genae".
10 Lapa qe wa- alhab' gai: ga: ta" mung: nga" nho: byumyu" qere khyo nghung: jhui" nghung" ako". Alhab' wa mayao: gai ngad: ra". Nga" byumyu" qe wa matang: ra" laug zao: yang vang zhaug' mung:- lapa qe wa ai re shaqhui: li" xug' to" ako".
11 Lapa qere- yao: bam: vang wa byo; gyoe; gyo" lo" naeva" myao: ein: ta" kyo: wa,- ngo wa mug: qu: khyo" ke' nhao nae". Ai: dao mae lag qu jham gyo" mung: ai re thin: ra" la hug' zao" li" nae".
12 Vang wa byo; gyoe; gyo" byaug: li" nae". Aimung: yaug khao:ngo" wa naonhaung" re ai: shaqhui: xug' to" ru pe" akyu" bo: i? ga: myid' li" genae"- ga: ta" ra".
13 Ana" ceru wa Asang kho:kham ta" ru ngad: ra". Ngo nhag' yo" ru: yang ngo wa- thin: ra" la- mug: qu we' lag qu re ai: vang re phyo' qheim" pye' nae" qhid' mae" nhao: ke' byid: nae".
14 Ngo wa- yao: bam shaqhui: xug' to" ra" vang re phyo' pye' nae"- aje, aman" kad' pye' mung: apan aqao: laug zang re myao: thug' jo, nhao nae" myid: to: va". Airu wa byo; gyoe; gyo" lo" mung: naonhaung" alhab' mo, re nhai" se' pye' li" nae". Ailao" yaug khao:ngo" wa ngo Asang ngad: rure ba: li" genae".
15 Ai: vang khyae bao we'- ai re shaqhui: xug' mo, wa nga" nho: nhag' yo: aso' re the' de, zo" ba: li" genae". Ailao" ngo wa naonhaung" re- ai: vang khyae bao baui" byaug mung:- ai re shaqhui: xug' ra" mo,- alhab' magai: ra" au:-
16 Alhab' gai: ga: Yerusalem re ta" lam" byid' ra" ai: lapa jham re: baui" byaug: avako"- ein: ta" kyo: nae" kho:kham Asang ta" va".
Lapa Myhi" Apyag' Jham Re Ngag: Thaug' Ra" Lapa Dao:
17 Asang wa- shid ba: ra" yaug we"- ana" ni" byumyu" qe: phaung gaung: mae lapa dao: kad' ta" mung: geim: phan" phan" ra" myiqe: qere qu" wa,- yao: bam re ta" phoe: pye' wa,-
18 Aimung: yao: bam re kho:kham Asang ta" na: ru ta" kyo: wa,- myiqe: naonhaung" wa byuxa: voqoe, qhug' ako". Naonhaung" wa yaug khao:ngo" qhid' mae" mandan: lo,thang: jham nag byid: mung:- yao: bam wa byu gaje qe: nho: kao so' gyaung: khyo jham: dao mae kheim: so' qo" nae" qhid' mae" yao: bam: au: dao mae ve; ci nae" qhid' mae" lang yang" re kad' byid' ako".
Naonhaung" wa- nga" nho: byumyu" qenho: dao mae daui nae" we' shid nae" kheim: so' re qo" yu: to: mung: naonhaung" yao" nho: akyu" qhid' mae" ai: kheim: so' re ci nug: ako".
19 Naonhaung" wa- bale gaug dajhid' we' mug dajhid' za" ru qo" the' yu nae" qhid' mae" nga" byumyu" qe: qhid' kheim: mae ngo re nga: yeim nhao: ako". Naonhaung" wa shid nae" maman qi" ra" byu jham re se' pye' ako". Aimung: naonhaung" wa daui: na nae" maman: qi" ra" mo, re daui: na: jo, nhao: ako". Aimung: naonhaung" wa- nga" byumyu" qere mhug' ta" yang: yao: bam wa naonhaung" re lam" ako"- ga: ta" ra".
20 Ana" ceru wa- kho:kham Asang ta" ru ngad: ra". Kao so' daui: ru we' shid: rure zaui" ci nae" phin: yang: naonhaung" ci: ra" ai: lo,thang: jham re ngo nghang" ra". Ngo wa ai jham re lo,pau" jham mae" khyad' pye' mung: naonhaung" zaui" to" ra" byu jham re pheim: nhao: ke' nae".
21 Ngo wa ai: lang yang" jham re khyad' pye' mung: nga" byumyu" qere naonhaung" nho: kheim: so' mae" dalhang: dae bin sho' phao: loe; lo" nhao: pye' nae". Ailao" naonhaung" wa ngo Asang ngad: rure ba: li" genae".
22 Naonhaung" wa- naonhaung" nho: mhug' ta" ra" dao: jham: yang ngo manug: no nhao: ra" byugai qere qam: shan nhao: ako". Naonhaung" wa- makhyang: mashab mo, re makhyang: mashab: ru to" pye' mung: yao: bam: kao so' jham re maqo" khyad' yu nae" khyo: jhid' tam" ako".
23 Aimung: ana" naonhaung" nho: mhug' ta" ra" qhu" lho apyag' jham we' khyonghung: jhui" nghung" ra" lapa dao: jham thao" byaug va". Naonhaung" wa ngo Asang ngad: rure ba vageshao: ein: ngo wa nga" byumyu" qere naonhaung" nho: kheim: so' mae" khyad' yu naeva"- ga: ta" ra".