11
Yerusalem Dao: Phyid' Qhug' Ra" Khyo
1 Mao"So: byo wa ngo re to' yu mung: Caung:pa" Yham: nho: ba thug' shad' kham: mo" khyo jhui" ye" lo" ra". Ai: kham: mo" nhae mae yauggai shid' xe: ngo" yaug re the' myao:- Yao: bam mae- byumyu" nho: au: jhaung shid' yaug- Azu nho: yauggai zo: Yazani we' Benaia nho: yauggai zo: Pelatia bobo: ako".
2 Mao"So wa ngo re- shid ba: ra" yaug we"- ce: yauggai qe wa makhyang: mashab: ra" mau" re kyae mung: ce: vomo" khug mae magai: ra" pha,jhi" byid' ako".
3 Yao: bam wa- ngonhaung" khomyhao" makyo re yham jham dam: zhaug' naeva". Ai: vomo" wa zoxeim: ug' we' dakhyo: ngad: jo, mung:-ngonhaung" wa ai: khug mae" sho: we' dakhyo: ngadqere:- airu wa mathae: thao" ngonhaung" re myi: mae" gug: gam byid' ra"- ga: ta" ako".
4 Aimung: shid ba: ra" yaug we"- ana" yao: bam re ta" phoe: pye' se,- ga: ta" ra".
5 Asang: nho: byo wa ngo re jaung" mung: ai: byumyu" re ce: lau dao: ta" kyo: wa, ga: Asang: yang ngo re ta" ra". Israel byumyu" qe we"- naonhaung" pe" ta" na: ru we' naonhaung" pe" kad' nae" yaung: na: rure ngo ba:-
6 Naonhaung" wa ce: vomo" khug mae byu saung" se' mung: hau" mo" khyo jham wa sushid mao gaung byang" jo; ava".
7 Aimung: ceru wa- naonhaung" re kho:kham Asang ngo ta" na: ru ngad:- ce: vomo" wa gaigai: yao: zoxeim: ug' ngad: ra". Ai re sho: wa pe" ngad: ra" i? Naonhaung" se' pye' ra" sushid mao gaung jham ngad: ako". Naonhaung" wa cemae maqo" na genae" ngo wa naonhaung" re vomo" taunggaung shad' khyo shapye' pye' nae".
8 Naonhaung" wa shae pyang: jham re gyaug ko" i? Ngo wa naonhaung" re khe' zin: nae" shae pyang: jham ci: ra" yauggai qere jhui" lo byid: nae".
9 Ngo wa naonhaung" re vomo" khug mae" taung gaung shad' khyo jhui" thug' ye: mung: taungbug: byumyu" qenho: lo, khug khyo naonhaung" re ke' pye' nae". Ngo wa naonhaung" re shid nae" dao: kho' va".
10 Aimung: naonhaung" wa naonhaung" yao" mung"dan: khug mae" mang: zin: jao: mae se' pye' ru qhug' li" genae". Ailao" yaug khao:ngo" wa- ngo Asang ngad: rure ba: li" genae".
11 Ce: vomo" wa- ug' khug mae" sho: re ug' yang gug: gam byid ruru: naonhaung" re gug: gam byid' li" nae" mangad:- naonhaung" Israel mung" khokhyi" mae na ngadqere: ngo qobo dae byid: nae".
12 Naonhaung" wa ngo Asang ngad: rure ba mung:- ai: yham kyo: mung"dan: jham mae" tarha" jham wa naonhaung" phug' cao" na ko" au:- naonhaung" wa nga" tarha" jham re phyo' mung: nga" amyin" jham re maphug' cao" ngad: ako"- ga: ta" ra".
13 Ngo lapa pa: na: au: re- Pelatia shid: lang" lo" ra". Ngo wa myidgaung khyo lamhaung: lagoe, goe; gyo" mung: kho:kham Asang we"- nao wa Israel mae" dang: ra" yaug khao:ngo" re se' pye' naeva" i?- ein: hug' va".
Pyaung" Nha: To: Qhug' Mo, Re Byid' Ra" Mao"So: Nho: Dao:so:
14 Asang wa ngo re-
15 Shid ba: ra" yaug we"- Yerusalem mae na: ra" mo, wa ni" khyo we' pyaung" nha: to: qhug' ra" Israel byumyu" sang: cao: qenho: khyo re ta" na: ako". Yao: bam wa- pyaung" nha: to: qhug' mo, wa Asang re caung:pa" nae" qhid' mae" saung" va" na: ako". Yao: wa ngonhaung" re ce: mug: myid sang: yu nhao va"- ga: ta" ako".
16 Ana" ngo ta" na: rure- ni" byumyu" sang: cao: qere ta" kyo: se,- ngo wa yao: bam re va" ra" mung"dan: jham khyo ye: na nae" qhid' mae" nhao: ke' mung:- yao: bam re gatau: mung"dan: jham: khug mae khe' sin" to: yaug ngad:- ngadqere:- ana" au: wa- yao: bam ye: na: bam ra" mug: myid: jham mae yao: bam we' daga" ngo bo: na byid: nae".
17 Aimung:- kho:kham Asang ngo ta" na: rure yao: bam re ta" kyo: wa,- ngo wa yao: bam re khe' sin" to" ra" mung"dan: jham mae" yao: bam re khai: zhang: thug' yu mung: Israel mug: myid yao: bam re dam: tug' byid: nae".
18 Yao: bam dam: tug' phao: lo: au: re- yao: bam wa yao: bam qhug' myao: yu: ra" maca' majhad' abe, alhau: mung: ra" so alho jham re shalhaui" pye' ca" li" genae".
19 Ngo wa yao: bam re nhag' lam: asag' we' myid asag' byid: nae". Ngo wa yao: bam: qao: ra" laug zang nhag' lam: re yu: pye' byid: mung: phug' cao" ra" nhag' lam: byid: nae".
20 Ailao" yao: bam wa nga" nho: tarha" jham re cao" mung:- nga" amyin" jham re jhaug' zaug taung" phug' cao" li" genae". Yao: bam wa nga" byumyu" ngad mung: ngo wa yao: bam: Mao"So ngad: li" nae".
21 Ngadqere: ngo wa maca' majhad' qu" ca' sho' ra" so alho jham re caung:pa" nae" ngaui mo, re qobo dae byid: nae". Ngo wa yao: bam re yao: bam kad' lai: lo: ru qhid' mae" qobo dae byid: nae"- ga: kho:kham Asang ta" to: va".
Mao"So: Nho: Phungbao Wa Yerusalem Mae" Thug' Lo" Ra" Khyo
22 Kaoso' daui: ra" gug'nyhug' jham dao" phao: qhid: lo" mung:- lhin" ce' jham wa yao: bam we' daga" lo" ako". Israel nho: Mao"So: qhid' kheim: mae" qhi qhi mung: ra" bo" bao wa yao: bam: dao mae jo; ra".
23 Ailao" qhi qhi mung: ra" bo" bao wa ai: vomo" mae" phao: thug' lo" mung: ai: nho: ba thug' shad' mae" bam jham khyo qui" lo" ra".
24 Qhu" lho mae- Mao"So: byo wa ngo re to' yu mung:- Babelon mae" pyaung" nha: to: qhug' mo, jhao" dam: jhui" tug' lo" ra". Ailao" qhu" lho sham: byaug: ra".
25 Aimung: ngo wa- ngo re Asang qhu" byid ru ja: khao:ngo"- pyaung" nha: to: qhug' mo, re ta" kyo: va".