MHO" PEIM:
(DEUTERONOMY)
Dao: Phung"
Mho" peim: paug' wa- Khanan mung" khyo vao: mung: yesang: yu nae" qhid' mae" din"pyad' yo gyaung: khyo qhang athao" ngad: ra" Moba mung" mae lothang: na ko" ra" Israel byu qere- Moshe yang ta" peim: byid' ra" mung: dao: jham re adai: ato' khyo" tung" zhang: to" ra" apaug' ngad: ra". Ce: jham: paug' mae tung" xam" to" ra"- akhyag: thao" ra" khyo daqhae: wa o mae" we' dakhyo: ngad: ra". 1.Moshe wa- lai: lo: ra" byid xe zin mae boe" lo: ra" khyo aqi: jham: khyo re dam: ta" kyo" ra". Yao: wa amyu" byu qere- Asang wa yao: bam re din"pyad' yo khyo" khoru: jhui" lo: ra" khyo re myid: beim: nae" we' mho dao: gyo: mung: Asang re jhaug' zaug genae" qhid' mae" mho' ra". 2) Moshe wa amyin" dao: Daxe lam: re dam: tung" mung: sao qhid' mae" amyin" dao: re no, no, to: yang: Asang re za: phug' myao: lam khug genae" qhid' mae" ta" ra". Ai: thao yao: wa dao:so: byid' ra" mung" mae Israel byu qe: kao so' daui khyo re eib khang" nae" ngad: ra" tarha" myo: sho' ja: re tung" ra". 3) Moshe wa yao: bam we' kad' to" ra" Mao"So: dao: thang" lajheim: re amyu" byu qere: ta" peim: byid: mung:- aire phug' cao" nae" yao: bam lhang: yu ko" ra" khyo re asag' dam: kad' genae" qhid' mae" yao: bam re ta" ra". 4) Yoshu wa Mao"So: amyu" byu qere dam: jhui" au: she: nae" thao mae" au: jhaung yaug khyo" khyin: yu: ru qhug' ra". Mao"So: jhaug' zaug ra" khyo re nghaui" caung: bin: caung: nghaui" mung:- Israel amyu" kaung qe: dao mae shaman" dao: bin: ta" lao"- Yodan gyaung ba thug' shad' Moba mung" mae Moshe shid: lo" ra" khyo jham ngad: ra".
Ce: jham: paug' nho: dao: au: aqi: wa- Mao"So wa yao: jhid'de; ra" yao" khyin: yu: to" ra" byumyu" re khyad' yu mung: shaman" byid' ra" khyo ngad: ra". Airumung: yao" byumyu" qe wa kao so' we' shaman" jeju re xo' yang: qo" yu genae" qhid' mae" yao: bam wa ceru re myid: beim: mung: jhid'de; ru we' yao: re mho dao: gyo: genae" qhid' mae" ngad: ra".
Ce: jham: paug' nho: adau ngai akao jham wa 6:4-6 ngad mung: amyin" dao: alhab' mae" qi" thao" ra" amyin" dao: ngad: ga: Yesu mhang" to" ra". Ni" Mao"So Asang re ni" aung khug nhag' lam: alhab' we' ni" kao so' alhab' we' ni" qam: o: alhab' we' jhid'de; wa,- ga" ra" dao: jham bobo: ra".
1
Dao: Phung"
1 Ce: jham: paug' mae bo: ra" dao: jham wa Israel byu qe Yodan gyaung: ba thug' shad' mae" din"pyad' yo mae na ko" ra" au: re yao: bam re Moshe yang jhau: ra" dao: jham ngad: ra". Paran vogaung: we' Tophe- La Ban- Hazerod- Dizahab agyo: mae jo; ra" Supha vogaung: nhae mae" Yodan lao:khaung: mae na: jo; ako".
2 (Edom bam mug: khyo khyo" ye" re Sina bam mae" Kade Barne khyo joe" sho' daxe: daba su: qo: ra".)
3 Egutu mung" mae" yao: bam thug' lo gethao re byid xe zin ein: zin- lho" daxe: dakhye' sao qhid' ba ein: ba mae Moshe wa Asang: yang yao: re amyu" byu qere ta" kyo: nae" amyin" byid' to" ra" gu: ja: khao: ngo" re amyu" byu qere ta" kyo" ra".
4 Ceru wa Heshabon vogaung: re eib: ra" Amori kho:kham Sihon we' Ashterod we' Edri vogaung: re eib: ra" Bashan kho:kham Oga re Asang: yang aung: pye' thao re boe" ru ngad: ra".
5 Moshe wa amyu" byu qe Yodan gyaung: ba thug' shad' mae" Moba mug: kyo: mae na: jo, ko" au: Asang: tarha" jham we' mho" shid' khyo jham re ta" sho' kyo: byid' ra".
6-7 Yao: wa- ngonhaung" Sina bam mae na: jo; au:- ngonhaung" Mao"So Asang wa ngonhaung" re- naonhaung" ce: bam mae na: jo; ru myao" va"- amung: jamu re phyo' mung: to" lo" ge,. Amori bam mug: we' ai: lhang" gam: mae" Yodan lao:khaung: bam mug: khaung:- jao: dae khaung:- mug: thao shad' mug:myid we' Mug:gaung: panglai: ayae cao" khyo ye: ge,-Khanan mug: we' Lebanon bam lai yang:- Uphrad qid gyaung: mo" joe" sho' ye: ge,.
8 Ce: mug:myid alhab' wa ngo Asang: yang naonhaung" phug' pho" qe ngad ko" ra" Abraham- Isag- Yaku we' yao" myid:zo: qere byid: nae" ein: dao:so: byid' to" ra" mug:myid re yesang: yu ge,- ga: ta" ra".
Moshe- Tarha Agyi Jham Re Khyin: San: Ra" Khyo
(Pht 18.13-27)
9 Moshe wa amyu" byu qere- ngonhaung" Sina bam mae na: jo, shi" au:- ngo naonhaung" re khyo qhid' au: she: ra" mau" wa nga" qhid' mae" gyai qola: ngad: ra" ein: naonhaung" re ta" va". Ce: mau" zo" ngo yao: za: maqo" kad' ngad: ra".
10 Naonhaung" Mao"So Asang wa naonhaung" re mug:gaung mae" kyi nho" myo" je" li" nhao: ava".
11 Naonhaung" phug' pho" qenho: Asang Mao"So wa dao:so: to" ru we' dakhyo:- anho" dataung nho" myo" laug: je" li" nhao mung:- na: dai ye; dai nhao vashao:-
12 Ngadqere: naonhaung" jho" ta" ngag: byo, ko" ra" mau" re ta" sho' byid: nae" qola: re ngo dayaug za: khoru: qo" vin vo; nae" i?
13 Amung: amyu" kaung khao: ngo" mae"- pha,jhi" bo- laba lajhao bo- myo: sho' ja: thaung" qhug' qu" va" ra" mo, daqhae: re khyin ge, ngo wa yao: bam re naonhaung" dao mae au: jhaung kad' nhao nae" ein: ta" va".
14 Ceru wa kad' gai: ra" mau" ngad: ra" ga: naonhaung" myid vang" ako".
15 Airumung: ngo wa naonhaung" amyu" kaung mae" naonhaung" khyin: san: yu ko" ra" pha,jhi" bo mung: aja: ja: thaung" qhug' qu" va" mo, jhui" yu mung:- yao: bam re naonhaung" dao mae au: jhaung qe kad' nhao va". Daqhae: wa byu dataung zo: dao mae- daqhae: re byu dayo zo: dao mae- daqhae: re ngo" xe zo: dao mae- daqhae: re daxe zo" dao mae qu" ra" au: jhaung qe kad' nhao va". Amung: ngo wa gatau aya: rere: amyu" kaung alhab' mae san to: byid: va".
16 Ai: ayo, mae ngo wa yao: bam re- naonhaung" phaung mae jho" ta" ngag: byo; ru boe" thug' li" rure tae" gyo: ge,- jho" ta" ngag: byo; ra" mau" ja: khao: ngo" re naonhaung" yao" amyu" byu qe we' sin: yang: za: mangad:- naonhaung" phaung mae na: ra" taung bug byu qe we' sin: yang: re: tarha" nyang nyang za: dao: kho' ge,.
17-18 Naonhaung" myid: phyid' rumae myo, nho dakhyin ge,- yao: khag' ngad: re ngad- yaug khao: ngo" re dakhyo: za: dao: kho' ge,- khag' rere: dagyaug ge,- pe"mung:ga"re naonhaung" myid: phyid' ru wa Mao"So mae" joe" li" ru ngad: ra". Mau" daja: naonhaung" qhid' mae" gyai qug: yang: ngad: re- ngojhao" cili" geri:- aire ngo dao: phyid' byid: nae" ai: ayo, mae yao: naonhaung" kad' nae" khyo gatau ja: khao: ngo" rere: ngo naonhaung" re mho" byid: va".
Kade Banea Mae" Jin" Byu Jham Re Nhao: Ke' Ra" Khyo
(Gys 13.1-33)
19 Ngonhaung" Mao"So Asang: yang ngonhaung" re amyin" byid' ra" khyo re ngonhaung" kad' lo va". Ngonhaung" wa Sina bam mae" to" mung: damung" dadin" ngad mung: gyaug ci" ca" ra" din"pyad' yo re lai: phyid' lo" mung:- Amori bam mug: khyo joe" ra" khyo khyo" ye" lo" bam va". Ngonhaung" Kade- Banea khyo joe" lao"-
20-21 Ngo wa naonhaung" re- ana" naonhaung" wa ngonhaung" phug' pho" qenho: Mao"So ngad: ra" ngonhaung" Mao"So Asang: yang ngonhaung" re byid: nae" ngad: ra" Amori bam mug: khyo lojoe" na: jo, va"- qu" ge,- thoe mae ngad: ra". Yao: amyin" byid' to" ru we' dakhyo: aire yesang: na ge,- dayam" na ge,- gyaug re: dagyaug ge,- ein: ta" ra".
22 Ngadqere: naonhaung" ngo jhao" joe" li" mung:- ngonhaung" re gai: thao" ra" khyo qo" khyin: yu nae" we' aimae pe" ru" ra" vogaung: jham jo; rure ngonhaung" re qo" ta" kyo: genae" qhid' mae"- ai: mug:myid re jo" qu" nae" ngonhaung" qhid' au: khyo byu qere nhao: ke' gelang: ga: ta" ako".
23 Airu wa kad' nae" gai: ruru: ngad mung: ngo wa amyu" kaung dalam: mae" dayaug yaug- daxe: shid' yaug re khyin: yu va".
24 Yao: bam wa bam mug: Eshko lao:khaung: khyo joe" sho' ye: mung: aire yejo" qu" ako".
25 Yao: bam aimae yemyao: ra" shi: daqhae: re ngonhaung" jhao" cilo mung: ngonhaung" Mao"So Asang ngonhaung" re byid: nae" ngad: ra" mug:myid wa myid xau gyai gai: ru ngad: ra" khyo re lau lazhao: kyo" ako".
26 Ngadqere: naonhaung" wa naonhaung" Mao"So Asang: amyin" dao: re tau: lhan: geyang: naonhaung" wa ai: mung" khyo maqo" vao ye: ngad: ako".
27 Naonhaung" wa- Asang wa ngonhaung" re nghang" ava"- ngonhaung" re se' pye' geshao: ga:- yao: wa ce: Amori byu qe: lo, khyo ngonhaung" re byid: nae" qhid' mae" Egutu mung" mae" ngonhaung" re jhui" thug' lo: ru ngad: ra".
28 Ngonhaung" pe"mung: yang: aikhyo ye zai i? Ngonhaung" gyaug: ra". Aimae na ko" ra" byu qe wa ngonhaung" tho' je: qam: bo- je: qi: je: qhang mo, ngad ko" ru we' yao: bam wa mug:gaung khyo myhi: ra" vang bo: ra" vogaung: jham mae na ko" ra" khyo ngonhaung" yang nhao: ke' ra" mo; yang ngonhaung" re lota" kyo" ako". Yao: bam wa aimae byuqi: byuzang qere yemyao: ako" ga: naonhaung" yao: cao: nyhung: ako".
29 Ngadqere: ngo wa naonhaung" re- ai: byu qere dagyaug ge,.
30-31 Naonhaung" Mao"So Asang wa naonhaung" re Egutu mung" mae we' din"pyad' yo mae yao: pe" ru: kad' rure naonhaung" myao vako" ru we' dakhyo:- yao: wa naonhaung" re khyoshid' au: she mung: naonhaung" qhid' mae" gyekhe' byid' li" nae". Yao: pho" wa yao: zo: re vo; ru we' dakhyo:- ce jo, qo khyo joe" sho' khyo cao" yang: yao: naonhaung" re gug: gam za: jhui" lo: rure naonhaung" myao: lo: ako".
32-33 Yao: wa naonhaung" qhid' au: khyo naonhaung" thang: na nae" jo, qo- ngadqere: naonhaung" thang: na mung: jo, qo qho: yu: ru we' ye" lo" nae" khyo re qhu" byid nae" qhid' mae" myi" mae myizang:- na" mae jham thaui: zang naonhaung" qhid' au: mae yao: khonhae" re: ye" lo" na: ra" ein: ngo naonhaung" re ta" sho' ngadqere: Asang re naonhaung" malam mangha ngad: ako".
Israel Byu Qere Asang Qobo Dae Byid' Ra" Khyo
(Gys 14.20-45)
34 Asang wa naonhaung" nyhung: ra" thoe re gyo: mung: nhag' yo" ra". Amung: yao: wa-
35 Ce: makhyang" ra" byu qae: mae" naonhaung" dayaug re: naonhaung" phug' pho" qere byid: nae" ein: ngo dao:so: byid' to" ra" myid xau gai: ra" mung" khyo maqo" vao ye: genae".
36 Yephune nho: yauggai zo: Khaleb za: ai: khyo qo" vao ye" li" nae" yao: wa ngore jhaug' zaug: jo, mung: ngo wa yao: yejo" qu" va" ra" mug:myid: yao: we' yao" myid:zo: qere byid: nae".
37 Asang wa naonhaung" mathao mae Asang wa ngo rere: nhag' yo: mung: Moshe nao lhao" re: ai: mung" khyo maqo" vao ye: nae"- ga: ta" ra".
38 Ngadqere: nao re bao" thaug' byid: yang: Nun nho: yauggai zo: Yoshu nho: myid: phyid' mung: qam: bo nhao wa,- yao: wa ai: mung"dan: re Israel byu qere au: jhaung kad' yang:- yejhui" sang: na: li" nae"- ga: ta" ra".
39 Ai: thao Asang wa ngonhaung" alhab' mo, re- jo: ru we' shad' rure ba: kho' nae" saung" ngai shiko" ra". Naonhaung" zo: dau qe naonhaung" gyevo qeyang taung" yu: pye' ru qhug' li" genae"- naonhaung" ta" ko" ra" zoshao qe wa ai: mung"dan: khyo qo" vao ye' li" genae". Ngo wa yao: bam re ai: mung"dan: byid: nae"- amung: yao: bam wa aire qo" sang: na: li" genae".
40 Ngadqere: amyu" byu qe naonhaung" wa- lhang: lo: mung: Tham: Ne khyo joe" ra" khyodang din"pyad' yo khyo dam: tug' phao: lo" ako".
41 Naonhaung" wa- Moshe we"- ngonhaung" wa Asang re qobo shad' va". Ngadqere: ana" Asang: yang ngonhaung" re amyin" byid' ru we' dakhyo:- gye yezin: nae" ga: phaug' tau" ako". Ai: thao naonhaung" yaug khao: ngo" wa bam mug: khaung: khyo jhin" vao ye: nae" qhid' mae" laui nae" ga: myid: jho yang: gyekhe' nae" jin" jin" seim" ci: ako".
42 Ngadqere: Asang wa ngore- gye maye: zin: genae" qhid' mae" yao: bam re ta" peim: wa,. Pe"mung:ga"re ngo wa yao: bam we' daga" maye: nae". Yao: bam: gyevo qe wa yao: bam re aung: pye' li" genae"- ga: ta" ra".
43 Asang ta" ra" dao: ngo naonhaung" re ta" kyo: va". Ngadqere: naonhaung" wa yao: re tau: lhan: mung:- ngad beim" ra" myid bo yang: bam mug: khaung: khyo to" ye" lo" ako".
44 Ailao"- ai: bam jham mae na ko" ra" Amori byu qe wa byo: thaui we' dakhyo: naonhaung" gye li" khe' ako". Yao: bam wa naonhaung" re Horma joe" sho' cao" khe' li" mung: Edom bam mug: mae naonhaung" re aung: pye' ako".
45 Airumung: naonhaung" wa bao" thaug' yu nae" qhid' mae" Asang re mho' yao: ako". Ngadqere: yao: wa naonhaung" dao: manug: tae" gyo: byid:- pe" masun: byid: ngad: ra".
Din" Pyad' Yo Mae Na: Ra" Zin Na Jham
46 Airu: ngonhaung" Kade mae ayo, myao" sho' bin: na thao-