KOLOSE
BAO: RE POLU NHO: VHIN TUNG"
(COLOSSIANS)
Dao: Phung"
Kolose bao: re Polu tung" vhin: ke' ra" vhin tung" wa Asia Ngai mung" Ephesu vogaung: ba thug' shad' mae jo; ra" Kolose vogaung: phung: re tung" vhin: ke' ra" mugsug' ngad: ra". Ce: vogaung: phung: wa Polu yang te" to" ra" phung: wa mangad:- ngadqere: Polu wa ai: vogaung: khaung: mae yao: sasana qo yu ang: ra" mung"dan: mae" vogaung: dalam: ngad: ra". Polu wa Roma Khosin" mung"- Asia mung"dau mae" vogaung: mo" ngad: ra" Ephesu vogaung: mae" sasana mau" vin mo, re lhaung" nhao: ke' ra". Kolose vogaung: mae mho" pho" apyag' qe wa- Mao"So re ba nae" we' jab byang" sho' khyad' yu: rure qo" yu nae" qhid' mae" Byo we' sin: yang: eib: ra" mo, re we' kheim: so' qo" ra" mo, re caung:pa" ca"- ga: ta" na ko" rure the' gyo" ra". Ai: tho' mago" ai: mho" pho" apyag' qe wa au: qid lhai: khyo kham: yu: ruru" ra" caung:pa" thung" li rere: zo:ve we' gatau: khyo jham we' sin" ra" macao" magai: ra" thung" li jham re phug' cao" ca" ga: re: mho" byid' ako".
Polu wa dangman" ra" Khristan mungdao:re ceim: yang: ai: mho" shid' khyo jham shad' rure tung" ke' ra". Ajhaung to: yang: tung" ke' ra" khyo wa Khristu wa khyad' yu: rure jab byang" sho' qo" byid: yaug ngad mung: ai: gatau: lam khug: ra" khyo we' phug' cao" ra" khyo jham wa Asang we' dang za: va" lo" nhao: ra" khyo jham ngad: rure ta" ra". Mao"So wa Khristu khyo" yang mug:myid re phan" to: mung:- Khristu khyo" yang yao: wa ai: mug:myid re yao:- yao: jhao" dam: jhui" tug' yu: ra". Khristu we' dadang: dalam: doe; ra" khyo dakhe' khyo" yang za: mug:myid byu qe wa khyad' yu: ru qhug' nae" myid: lao" khyo jo; ra". Ai: thao re Polu wa ce: qi" qhang: ra" mho" shid'khyo re lam khug: ra" mo, kaoso' daui khyo mae khoru: ci yhung: nae" rure sho' kyo" to" ra".
Ce: vhin tung" re Kolose phung: byu qejhao" vin: lo byid: yaug Tukhiku we' daga" Onesimu re: bocao: lo: ra" khyo wa xam" to: tho' ra" khyo dalam: ngad: ra". Onesimu wa Philemon nho: jeim dayaug ngad mung: Polu wa Onesimu nho: gaung tha" Philemon re vhin tung" tung" ke' qu" ava".
1
1 Mao"So myid o: ra" khyo" yang Yesu nho: lagyo: ngo Polu we' ngonhaung" mao:nhaung: pho" Timothi wa-
2 Khristu we' dadang: dalam: za: doe; rumae kyid: ra" ngonhaung" mao:nhaung: qe ngad ko" ra" Kolose vogaung: mae" Mao"So: byu qere mugsug' tung" ke' ra".
Ngonhaung" nho: pho" Mao"So wa nhag' myan" ra" jeju we' ngaui pyo: yaug yo: ru naonhaung" re shaman" byid: vashao: wo".
Jeju Caung:khin" Akyu" Mho' Dao:
3 Ngonhaung" wa naonhaung" qhid' mae" akyu" bao" mho' byid: khao: ngo" khonhae" re: ngonhaung" Asang Khristu nho: yao: pho"- Mao"So re jeju caung:khin" byid' ra".
4 Pe"mung:ga"re Khristu Yesu re naonhaung" lam khug myid bo ko" rure we' Mao"So: byu qere naonhaung" jhid'de; ko" ra" khyo re ngonhaung" the' gyo" bam va".
5 Dangman" ra" mungdao: ngad: ra" Lau Dao: Gai naonhaung" jhao" sao qhid' joe" li" au:- ai: yang byid' ra" myid: lao" khyo re naonhaung" the' gyo" yu: avako". Airumung: naonhaung" lam khug: myid we' jhid'de; myid wa mug:gaung dao mae naonhaung" qhid' mae" shaung: to: byid' ra" naonhaung" myid: lao" khyo mae apan zaug: jo; ra".
6 Mao"So: nhag' myan" ra" jeju khyo re naonhaung" the' gyo" yu ko" ra" ba na mae" aire jhaug' za: ba: kham zo" yu gemung:- ai: Lau Dao: Gai wa naonhaung" mae byo: sin" lo" ru we' dakhyo:- ngaui bau" Lau Dao: Gai wa shaman" jeju byid: yang: mug:myid jao: sho' byo: sin: lo" ra".
7 Naonhaung" wa Mao"So: nhag' myan" ra" khyo re naonhaung" jhid'de; ra" daui daui cao: ngad mung:- ngonhaung" gaung tha" jhaug' zaug za: Khristu mau" zo" re vin vo; yaug ngad: ra" Epaphra mae" zhao: yu: ru ngad: ako".
8 Byo: yang naonhaung" re byid' to" ra" jhid'de; myid khyo re yao: wa ngonhaung" re ta" kyo" ra".
9 Ce: khyo mathao mae ngonhaung" wa naonhaung" khyo re the' gyo: mae" khonhae" re: naonhaung" qhid' mae" akyu" bao" mho' byid' ra". Yao: bam: yang byid' ra" nyan: pha,jhi" alhab' we' laba lajhao we' daga" yao: myid o: rure ba jhao: ra" laba lajhao wa naonhaung" re pyang" byid: vashao:- ngonhaung" wa Mao"So re mho' ra".
10 Airulao" naonhaung" wa Asang o: ru we' dakhyo: kaoso' daui mung:- khonhae" re: yao: re ngaui nhao: ra" mau" zo" re qo" zaui: so" li" genae". Naonhaung" kaoso' daui: ru wa gai: ru aja: ja: re qo" zaui" thug' ke' mung:- Mao"So re ba: jhao" ra" laba lajhao khug mae qi" qhang: li" li" genae".
11-12 Naonhaung" wa ja: khao: ngo" re nhag' lam: qhang qhang za: qo" zang: qhao" geshao:- yao" phungbao qi" qhang: ra" qam: so' alhab' yang qam: bo nhao vashao:- amung: mug: bo" mung"dan: khug mae yao" byu qe: qhid' mae" Mao"So jhaung qhu" to: byid' ra" naonhaung" gae bam re qo" khae: yu nae" man: qi" ra" mo, boe" nhao: ra" Pho" re ngaui bau: ngaui yao we' jeju caung:khin" byid: geshao.
13 Yao: wa mug: cad' nho: qam: so' khug mae" naonhaung" re khyad' yu mung:- yao" jhid'de; ra" yao: zo" nho: mung"dan: khug khyo gug: gug: za: jhui" vao ye" ava".
14 Ai: yao: zo: khyo" yang ngonhaung" wa loe; beim qhug' ra". Airu wa ngonhaung" qobo jham re khyad' pye' byid' ru ngad: ra".
Gaung Dau: We' Khristu Nho: Mau"
15 Khristu wa myo; yang magai: myao: ra" Mao"So: gaung khyao we' dau: ra" myo; yang gai: myao: ra" khyao dau ngad: ra". Yao: wa zoqhid' ngad mung: phan" to" ra" ja: alhab' tho' mae qi" qhang: thao" ra" yaug ngad: ra".
16 Pe"mung:ga"re Mao"So wa yao: zo: khyo" yang mug:gaung we' myidgaung jo; ra" gu: alhab' we' myo; yang gai: myao: ru we' myo; yang magai: myao: ra" ja: alhab' Byo qam: so' jham- Asang zug: we' kheim: so' qo" mo, rere: bophan" to" ra". Mao"So wa mug: kin myid kin alhab' geim" re yao: zo: khyo" yang phan" to: mung: yao: zo" qhid' mae" phan" to" ra".
17 Khristu wa ja: cao jab majo, shimae" na: jo, yaug ngad: ra". Ja: cao jab wa Khristu we' dadang: dalam: za: doe; jo, mung:- yao: bam we' dau ga" ra" jo, qo qo" avako".
18 Khristu wa yao" gaung khyao ngad: ra" ai: phung" nho: au: ngad: ra". Yao: wa zoqhid' ngad mung: yao: dayaug za: cao jab alhab' au: dao mae qo" na nae" qhid' mae" shid: rumae" dam: daui: to" li" nhao: ru qhug' ra".
19 Pe"mung:ga"re Mao"So yao: yao: myid: phyid' ru khyo" yang- yao: zo: wa Mao"So: ve, yaug: byang" sho' kham: yu: to" ra".
20 Airumung: Mao"So wa yao: zo: khyo" yang mug: kin we' myid kin alhab' geim" re yao: we' dam: jho" nyang: lo nhao nae" qhid' mae" myid: phyid' ra". Mao"So wa yao" yao: zo: pyao: zang dao mae shid kham: ra" khyo" yang mang: dae mau" kad' mung:- myidgaung we' aimae jo; ra" gu: alhab' re yao: we' dam: jho" nyang nhao: ra".
21 Lai: lo" va" ayo, mae naonhaung" wa Mao"So mae" va" na: ra" mo, ngad: lo ko" ru we' makhyang" ra" myid lo,mau" re kad' cao" geyang: naonhaung" wa Mao"So: gyevo qe boe" qu" avako".
22 Ngadqere: ana" Mao"So wa yao: zo" nho: gaung khyao shid: kham byid' ra" khyo" yang naonhaung" re yao" ba nam kad' yu: ava". Naonhaung" re gyang" lho" yaung" shab: ru we' yug: no made, lo: yao" qhid' kheim: khyo qo" vao ye: genae" qhid' mae" airu: kad' ru ngad: ra".
23 Naonhaung" wa gang" tang: ra" aqao: apan mae xo' yang: tang za: ye; jo, qo: ako". Naonhaung" wa ai: Ngaui Bau: Lau Dao: Gai re the' gyo" yu ko" au:- qo" yu ko" ra" ai: myid: lao" ru khyo mae" naonhaung" yao" myid re dalaui: nhao ge,- ngo Polu wa mug:myid byu yaug khao: ngo" re bin: kho" kyo: byid: va" ra" Lau Dao: Gai ceru: nho: daui daui yaug boe" lo: ra".
Phung: Re Daui Daui Byid' Ra" Yaug Khyo" Polu Mau" Zaui" Ru
24 Ana" ngo wa naonhaung" qhid' mae" ngo qug: khai: kham zo" ruyang ngaui bau" ra". Yao" gaung khyao ngad: ra" phung" nho: gaung tha" qug: khai: kham zo: nae" dang: jo, shi" ra" Khristu nho: qug: khai: kham zo" rure nga" gaung khyao mae qug: khai: kham zo" ra" khyo" yang bobao" pin" byid' na: ru ngad: ra".
25 Naonhaung" akyu" qhid' mae ce: mau" zo" re zaui so: nae" qhid' mae" Mao"So: yang daui daui byid: yaug khyo" yang ngore san: to: byid' ra". Nao re byid' to" ra" mau" zo" wa yao" mungdao: re bin sho' ta" hau" kyo: nae" ru ngad: ra".
26 Yao: wa ai: no; thao" ra" mungdao: re lai: lo: ra" pyad gu: mae byu alhab' mo, re maba nhao lo: nyham" to" lo ngadqere: ana" wa yao" byu qere ai: mungdao: qhu" byid' ava".
27 Mao"So myid: yaung: to" ra" khyo wa byu alhab' mo, qhid' mae" jaung: to" ra" magan: mago" ru we' phungbao bo: ra" no; thao" ra" mungdao: khyo re yao" byu qere qhu" byid: nae" qhid' mae" ngad: ra". Ai: no; thao" ra" mungdao: wa naonhaung" khug mae Khristu na: jo; ga" ru ngad: ra". Aimung: naonhaung" wa Mao"So: phungbao mae qo" bokham: yu genae"- ga" ru ngad: ra".
28 Airumung: ngonhaung" wa byu yaug khao: ngo" re Khristu nho: khyo kho" kyo: byid' ra". Yaug khao: ngo" re Khristu mae zoqao" khyo" Mao"So: qhid' kheim: khyo qo" jhui" vao ye: nae" qhid' mae" nyan: pha,jhi" bo: ra" gu: alhab' we' yao: bam re ta" peim: ta" kyang: yang: yao: bam re mho" shid' byid' ra".
29 Ce: mau" zo" re qam: ke' yang: qo" zaui: so" ru wa Khristu yang byid' ra" qi" qhang: ra" qam: so' yang ngad: ra". Ai: qam: so' wa ngo mae bo: jo, mung: mau" zaui" na: ra".