6
Khristan Mao:nhaung: Yao: Cao: Yung" Jho" Do, Ra" Mau"
1 Naonhaung" mae" Khristan mao:nhaung: dayaug yaug wa- Khristan yao: cao: we' mung khyo jho" ta" nae" bo: ngad: re pe"mung: Mao"So: byu qere mata" sho' nhao lo:- ai: Khristan mangad: ko" ra" tarha" zug: qe: qhid' kheim: khyo yao: vae" ye" ra" i?
2 Mao"So: byu qe wa mug: myid re dao: kho' nae" ngad: rure naonhaung" maba ko" i? Airu: mug: myid re dao: kho' genae" ra" mo, naonhaung" wa ngai: ra" mung mau" re lhao" dao: maqo" kho' ko" i?
3 Ngonhaung" wa mug: lagyo: jham re dao: kho' nae" ngad: rure naonhaung" maba ko" i? Airumung: ce: pyad mae" mung mau" re khoqhi" je yang: dao: qo" kho' genae" i?
4 Airu" mung mau" bo: thug' li" lao"- Khristan phung: mae mang maqo" thao" ra" mo; yang ta" sho' vhang" nae" qhid' mae" aijham re ciye: genae" i?
5 Naonhaung" qhid' nae" aqho' axag' ngad: ra". Khristan mao:nhaung: yao: cao" agyo: mae mung mau" bo: thug' li" lao"- aire ta" kho' byid: nae" pha,jhi" bo: ra" byu dayaug khalhao" naonhaung" phaung mae gaigai: yao: qo" ko" mangad: i?
6 Ai: atha" Yesu re malam khug: ra" tarha" zug: pho" yang dao: kho' byid: nae" qhid' mae" Khristan mao:nhaung: yao: cao: yung" jho" do, genhaung i?
7 Airu: naonhaung" yung" jho" do, ko" ru yao: Khristan qenho: ave, lo, mau" re naonhaung" gyoe; gyo" lo" nhao: ru ngad: ako". Ai: atha" matarha" ra" khyo kad' rure kham zo" ru wa- naonhaung" qhid' mae" je: gai: ra" mangad: i? Lhad' zo: qhug' ru wa naonhaung" qhid' mae" je: magai: i?
8 Airu: kham zo: nae" atha" naonhaung" wa Khristan mao:nhaung: yao: cao: yao: lhao" re: matarha" ru kad' mung: jho" lhad' zo" na: ako".
9 Makhyang" ra" mo, wa Mao"So: mung"dan: re maqo" sang genae" rure- naonhaung" jhaug' za: ba: ako". Aimung: naonhaung" gaung re dapyag' vhan" ge,- Gaung sho" nho: gintho' mau" cao" mo,- sulho re caung:pa" ra" mo,- su: myi: shad' mo,- yauggai yao: cao: myiqe: yao: cao: gaung sho: jho" zam" ra" mo,-
10 Khug' mo,- myo, no, so' kho' ra" mo,- yhid shaug' ya: mo,- su re gaui mho mo,- khug' hab' qe- khag' ngadqere: Mao"So: mung"dan: re qo" sang genae" mangad:.
11 Naonhaung" mae" damyo" wa airu" ra" mo, ngad: lo: ako"- ngadqere: naonhaung" wa qobo kyang" shao: pye' ru qhug' avako". Mao"So re qhaug' byid' to: va" mo, ngad: ako"- naonhaung" wa Asang Yesu Khristu nho: mathao mae re: ngonhaung" Mao"So: Byo mathao mae re: jo: ra" mo, ngad:- ga: Mao"So: yang sun" yu byid' ru qhug' va" mo, ngad: ako".
Naonhaung" Gaung Khyao Re Mao"So: Phung Bao Qhid' Mae" Ci Ge,
12 Naonhaung" mae" dayaug yaug wa- ngo wa pe" ja: kad' nae" akhang" re: qo" yaug ngad:- ga: ta" li" nae". Ngadqere: ja: khao: ngo" wa ni" qhid' mae" akyu" mabo ngad: ra"- ngo pe" ja: kad' ngadqere: maqo ein: qo" ta" ngadqere:- nga" gaung re ngo kad' ra" mau" daja: ja" nho: jeim doe, nhao nae" mangad:.
13 Gatau dayaug wa- zo:ve wa vae: dug' qhid' mae" ngad mung: vae: dug: wa zo:ve: qhid' mae" ngad: ga: ta" li" nae". Ngad: ra"- ngadqere: Mao"So wa ai shid' ja" geim" re jeim" lo" nhao nae"- Gaung khyao wa gaung sho" ra" gintho' mau" cao" nae" qhid' mae" mangad:- Asang re caung da" byid: nae" qhid' mae" ngad: ra". Asang wa ai: gaung khyao qo ca" ra" gu: re bao" thaug' byid: yaug ngad: ra".
14 Mao"So wa- Asang re shid: rumae" dam: daui: to" li" nhao: ru we' dakhyo:- yao: wa ngonhaung" rere: yao" qam: so' khyo" yang dam: daui: to" li" nhao: li" nae".
15 Naonhaung" gaung khyao jham wa- Khristu nho: gaung khyao: nho: gaung dau jham ngad ko" rure naonhaung" ba: ako". Ngo wa Khristu nho: gaung khyao- gaung dau dalam: re yu: yu mung:- shava myhi" nho: gaung khyao- gaung dau kad' pye' byid: nae" i? Dajhid' re: magai: boe" ngad: ra".
16 Yao" gaung khyao re shava myhi" we' zam" khug: ra" yaug wa gaung sho: khyo" yang ai: shava myhi" we' dagaung dasho: za: boe" rure naonhaung" ba ko" mangad: i? Jham: mugsug' wa- yao: shid' zo: wa dagaung dasho: za: doe; li" genae"- ga: de: de: za: ta" to" ra".
17 Ai: Asang we' zam" khug: ra" yaug wa- byo khyo" yang ai: Asang we' dagaung dasho: za: boe" lo: ra".
18 Gaung sho" nho: gintho' mau" re jao" pye' ge,- Byu kad' ra" qobo myo: sho' wa byu: gaung khyao re mazao" ngad: ra". Ngadqere: gaung sho" nho: gintho' mau" cao" ra" yaug wa yao: yao" gaung khyao re qobo de, nhao: ra" yaug ngad: ra".
19 Naonhaung" gaung khyao wa- Mao"So: yang byid' to: mung: naonhaung" khug mae na: jo; ra" Gyang" Lho" Byo: nho: yham mo" ngad ko" rure naonhaung" maba ko" i? Naonhaung" wa naonhaung" yao" gaung khyao re masang ko" ngad: ra"- Mao"So she, asang: ra".
20 Yao: wa naonhaung" re aphug' byid: yang: vai: yu: to" ra". Airumung: naonhaung" gaung khyao re Mao"So: phungbao bao: thug' li" nae" qhid' mae" ci yhung" na ge,.