7
Khyag' Phaung" Qhu" Lho
1 Ngo wa Qam: so' bo: thao" ra" Asang mae" qhu" lho re the' myao va". Ai: qhu" lho mae kho:kham nho: khovho bin: yad: yu thao vohau: dam: tad' li" au: re Asang: yang khyag' phaung" dajham phan" phaug' ke' ru the' myao:-
2 Ai: nga" qhu" lho mae khyag' phaung" jham wa ai: mug: mae" mhin: zo: nyug alhab' re zo" jhad' pye' mung: ngo wa- Qam: so' bo: thao" ra" Asang we"- Ni" byumyu" qere qobo khyad' byid: wa,. Yao: bam khoru: ba: na: dang lo: genae" i? Yao: bam wa ngai: ru we' qam: gyai nang: mo, ngad: ako"- ein: ta" ke' va".
3 Asang wa yao" nhag' lam: dam: lhai" pye' mung: nao the' myao: ru boe" li" nae" mangad:- ga: ta" ra".
Myi: Qhu" Lho
4 Kho:kham Asang mae" gatau qhu" lho dalam: re ngo the' myao:- ai: rumae yao: wa yao" nho: byumyu" qere myi" yang qobo dae byid: nae" ga: yaung: to" rure ngo myao:- ai: myi: wa myidgaung gyid' mae" nammugdara tham: re nga" pye' mung: myidgaung taung gaung khyo nga" joe" lo: na: ra".
5 Alao" ngo wa Qam: so' bo: ra" Asang we"- tam" pye' wa,- ni byumyu" qe khoru: mashid qo" na: dang genae" i? Yao: bam wa gyai ngai mung: gyai: qam: nang: mo, ngad: ako"- ein: ta" ke' va".
6 Ailao" Asang wa yao" nhag' lam: re dam: lhai: mung:- Ceru re: boe" li" nae" mangad:- ga: ta" ra".
Ka" Taui: Qhu" Lho
7 Ngo wa Asang mae" qhu" lho gatau dalam: re the' myao: va". Ai: qhu" lho mae ka" taui: re ci mung: zhaug' to" ra" khinqae mae yao: ye; jo, rure ngo wa the' myao: ra". Yao" nho: lo, khug mae ka" taui: ci: ra".
8 Yao: wa ngore- Amo we"- nao pe" the' myao: i? ga: myid' ra".
Ngo wa- Ka" taui: re myao:- ein: tau: va".
Ailao" yao: wa- nga" byumyu" qe wa mavang" ra" vang ru: ngad ko" rure qhu" byid: nae" qhid' mae" ai: rure ci: na: ru ngad:- yao: bam re qobo dae byid: nae" ru we' sin: yang: nga" myid re malhai: lo nae"-
9 Isag' nho: myid:zo: qe caung:pa" ra" jo, qo jham wa phyo' qheim" pye' qhug' nae". Israel mung" mae" gyang" lho" jo, qo jham wa byo: qeim: jao: mae shapye' to: qhug' nae". Kho:kham Yeroboam nho: kho" re amyug: thao" nhao nae"- ga: ta" ra".
Amo We' Amazia
10 Bethela mae khinjaung Amazia wa Israel mung" kho:kham Yeroboam re lau dao: kyo" ke' ra". Amo wa mung" byu qe: phaung mae nao re tau: lhan: nae" yaung: na: ra". Yao: ta" ra" dao: jham wa mung"dan: re byo; lo" nhao: li" nae".
11 Yao: ta" qin" ra" dao: wa ceru: ga"- Yeroboam wa gyekhe' jao: mae shid nae". Aimung: Israel byumyu" qe wa yao: bam: mug: myid mae" gamang: khyo pyaung" yu: pye' ru qhug' li" genae"- ga: ta" ra".
12 Ailao" Amazia wa Amo re- Lapa pho" we" ga" shi: va"- Yuda mung" khyo dam: tug' lo" mung: aimae lo" kho" kyo: wa,. Aimae" mo; yang nao re ai: qhid' mae" yao: bam aphug' byid: vageshao:-
13 Ce: Bethela mae lapa dapa lo:- Ce: jo, qo wa kho:kham pho" caung:pa" ra" jo, qo- byumyu" geim" nho: caung:pa" yham ngad:- ga: ta" ke' ra".
14 Amo wa- Ngo wa aphug' ngaui qhid' mae" lapa pa zo: yaug mangad:- ngo wa gug'nyhug' zam: zo: yaug we' pho' ham" shigae qho: zo: yaug ngad:-
15 Ngadqere: Asang wa ngore yao zam: mau" mae" jhui" yu mung: yao" byumyu" Israel qere lapa li" pa nhao: ra".
16 Aimung: ana" Asang ta" rure tae" gyo: ge,- Nao wa ngore lapa pa: ru thang: pye' nae" qhid' mae"- Israel byumyu" qere nhag' yo" ru to" pye' nae" qhid' mae" ta" ra".
17 Aimung: Amazia we"- Asang wa nao re ta" na: ra"- Ni" yham sang myhi" wa hau" mo" khyo mae" shava myhi" boe" lo: li" nae"- ni" zo: qe re: mang: zin: jao: mae se' pye' ru qhug' li" genae". Ni" mug: myid rere: kho' pye' mung: su gaje re byid' pye' li" genae". Naoyao: re: taungbug: mang: mae shid: li" nae". Aimung: Israel byumyu" qere: yao: bam yao" mug: mae" dang za: gamang: khyo pyaung" yu: pye' ru qhug' genae"- ga: ta" ra".