LAGYO:
(ACTS)
Dao: Phung"
Lagyo: mugsug' wa Luka tung" ra" Ngaui Bau" Lau Dao" nho: axo' ngad: ra". Lagyo: mugsug' nho: au: qang khyo ajhaung wa Gyang" Lho" Byo: yang khyoqhid' au: she byid' ra" khyo" yang sao qhid' mae" Yesu thao cao" mo, wa Yerusalem - Yuda mung" geim" we' Samari mung" we'- myidgaung thao" sho' mae Yesu khyo Ngaui Bau" Lau Dao: Gai re khoru: hau" pyo: ke' ra" khyo re ta" kyo: nae" qhid' mae" ngad: ra". (1.8) Lagyo: mugsug' mae bo: ra" khyo jham wa Yuda byu qe: phaung mae qhid: ra" Khristan daui: na: ra" khyo ngad mung:- xo' yang: mug:myid byu alhab' geim" nho: lam khug: khyo boe" lo: ra" khyo ngad: ra". Mugsug' tung" yaug wa Khristan qe wa Roma khosin" mung" re phyo' qheim" pye' nae" tau: lhan: ko" ra" mo, mangad: ko" ra" khyo re we' Khristan lam khug: khyo wa Yuda caung:pa" thung" re jab byang" li" nhao: ra" caung:pa" thung" ngad: ra" khyo re yao" nho: mugsug' nghe' ra" mo, jhaug' za: ba: gyo: genae" rure re:- myid: qang yang: tung" ra". Yesu khyo Ngaui Bau"Lau Dao: Gai re ta" hau" kyo" rumae Phung: jham te" lo" ra" jo, qo jham wa je yang: byo: lu: lo" ra" khyo re qhu" byid' ra". Lagyo: mugsug' re sam dau gai: khyo" ra". Aijham wa (1) Yesu mug:gaung khyo do, lo" thao re Yerusalem mae Khristan lam khug: khyo qhid: to" li" ra" khyo (2) Palestina mung" mae" gatau jo, qo jham khyo byo: joe" lo" ra" khyo we' (3) Roma vogaung: joe" sho' Mug:gaung: panglai: mung" khaung: khyo xo' yang: byo: je" lo" ra" khyo jham ngad: ra".
Lagyo: mugsug' mae akhyag: ra" khyo dalam: wa Pentikoti ba na mae Yerusalem vogaung: mae lam khug: ra" mo; dao khyo qam: so' bo: ra" khyo" joe" li" ra" Gyang"Lho"Byo: nho: mau" zo" khyo ngad: ra". Gyang"Lho"Byo wa phung: re we' phung: jhui: mo, re xo' yang: khyoqhid' au: she- qam: so' bo nhao: ra" khyo jham re Lagyo: paug' mae jab sho' ta" to" ra". Khristan mungdao: akao ajhaung wa ce: Lagyo: mug sug' mae bo: ra" mung dao: kho" ra" dao: jham mae bobo: ra". Aimung: lam khug: ra" mo, kao so' daui khyo we' phung: byu qe jho" zam" khug: ra" khyo jham wa ce: mung dao: wa qam: so' bo: ra" khyo re qhu" byid' rure Lagyo: mugsug' mae tung" xam" to" ra".
1
1 Phug' myao" ra" Theophilu we"- Yesu wa yao" mau" zo" re zaui" qhid: ra" ba na mae" yao: re mug:gaung khyo to' yu: ru qhug' ra" ba na joe" sho' Yesu zaui: so" lo: ru we' mho" shid' lo: ra" khyo alhab' re nga" tung" paug' sao qhid' paug' mae botung" to: va".
2 Yesu wa mug:gaung khyo to' yu: ru maqhug' shimae" yao" lagyo: qe ga:- yao: khyin: yu: to" ra" mo, re yao: wa Gyang" Lho" Byo: qam: so' khyo" yang pin dao: jham byid: co' ra".
3 Yao: shid kham thao byid xe ba gyo: mae yao: wa myo: sho' lhang lagyo: qejhao" yena: qhu" mung:- yao: daui: na: ra" khyo re lam ga" ra" sagse: jham qhu" byid' ra". Lagyo: qe wa Yesu re the' myao mung:- Yesu wa yao: bam re Mao"So: mung"dan: khyo re ta" kyo" ra".
4 Yao: bam zang" ham: na ko" au:- Yesu wa lagyo: qere- Yerusalem vogaung: mae" dathug' lo" ge,- naonhaung" re ta" kyo" to: gau ngad: ra" nga" Pho" dao:so: byid' to" ra" jhaung qhu" re lao" na ge,.
5 Yohan wa qid: yang qid nyhab' byid' ra"- ngadqere: khonho" ba mangad: re naonhaung" wa Gyang" Lho" Byo: yang qid nyhab' byid' rure qhug' li" genae"- ga: amyin" byid' ra".
Yesu Mug:gaung Khyo To' Yu: Ru Qhug' Ru
6 Lagyo: qe wa Yesu we' daga" zang" ham: na ko" au:- yao: bam wa Yesu re Asang we"- Israel byu qere ai: mung"dan: ce: akhyin: mae nao dam: te: byid: nae" i? ga: myid' ako".
7 Yesu wa yao: bam re- Nga" Pho" yao" kheim: so' khyo" yang mhai" so" to" ra" ba na we' yo, khyin: khonhae" ngad: rure naonhaung" ba maqo ngad: ra".
8 Ngadqere: naonhaung" dao mae Gyang" Lho" Byo joe" li" lao"- naonhaung" wa qam: so' byang" lo: li" genae". Amung: naonhaung" wa Yerusalem vogaung:- Yuda mung" geim"- Samari mung" we' myid gaung thao" sho' mae nga" khyo re sagse: kham byid: mo, ngad: li" genae"- ga: ta" ra".
9 Ceru: bin: ta" thao lagyo: qe qu" na: reyao:- Yesu wa mug:gaung khyo to' yu: ru qhug' ra". Ai: thao yao: bam: myo,jao: mae" jham thaui: wa yao: re nghoe' cilo" ra".
10 Lagyo: qe wa Yesu do, lo" na: au:- mug:gaung khyo zhaug' qu" na shiko" au: re mai bau: phyu ve; ra" byu shid' yaug nyag din taung" yao: bam: nhae mae li" ye; ke' gemung:-
11 Galile byu qe we"- naonhaung" ai:tau mae pe"mung: mug:gaung khyo qu" ye; jo; bam ko" i? Naonhaung" mae" mug:gaung khyo to' yu: ru qhug' ra" Yesu wa- naonhaung" myao: na: au: mug:gaung khyo do, lo" ru we' dakhyo:- airu: dam: joe" gyo" li" nae" ngad: ra"- ga: ta" ako".
Yuda Khu Mae Vao Yaug
12 Ai: thao re lagyo: qe wa Yerusalem we' khyoman: agaung: daqi" ko za: jho" va" ra" Zhan:lun: bam mae" Yerusalem khyo dam: phao: lo" ako".
13 Yao: bam wa vomo" khug khyo vao lo" mung:- Yao: bam thang: na: ra" yham- tho' pyae: qe, khyo do, lo" ako". Yao: bam wa Petru- Yaku- Andre- Philib- Thoma- Batholame- Mathe- Alphaeu yao: zo: Yaku- byumyu" jhid' myid qi" ra" Simon we' Yaku yao: zo: Yuda bam ngad: ako".
14 Yao: bam wa Yesu yao: myhi" Mari we' gatau myiqe: qe we' re:- Yesu yao: nhaung: bam we' re:- dazab makyo ham: phaung mung:- akyu" mho' yang: na: ako".
15 Ai: thao mataung" myao" re lam khug: ra" mo, dayo: shid' xe zo: ko zang" ham: na: bam: ako". Ailao" Petru wa to" ye, mung:-
16 Nga" mao:nhaung: qe we"- Yesu re taung" ra" mo, re khyo jhui" ra" yaug Yuda we' sin: yang: Gyang" Lho" Byo wa Davi nhad' dao: thoe khyo" ta" to" ra" jham: dao: jab byang" li" nae" ngad: ra".
17 Pe"mung:ga"re Yuda wa ngonhaung" we' daga" mau" zaui: nae" khyin: yu: to" ra" yaug ngad yang: yao: wa ngonhaung" phung: mae bobo: ra" yaug ngad: ra".
18 (Yao: wa makhyang" ra" lo,mau" khyo" yang the' ra" ngaui: yang yo myid dakhyao: vai: yu mung: ai: yo myid mae atug' khyo" byid: gyo" shid: ra". Yao" vae: dug: baug: go; lo" mung:- au jham alhab' baug: thug' lo" byaug: ra".
19 Yerusalem vogaung: mae na: ra" mo, alhab' wa ai: khyo re the' gyo" ako". Airumung: yao: bam wa ai: yo myid cug' re yao: bam yao" myan" khyo" Akeladama ga: mhang" ako". Akeladama ga" ru wa- Sa: Mug: Myid ga" ru ngad: ra".)
20 Pe"mung:ga"re Caung:khin" paug' mae-
Yao" yham wa cae: jhug tag boe" mung:
aimae khag' re: mana vageshao:- ga: re:-
yao" aya: rere: gatau dayaug yu: pye' vashao:- ga: re: tung" to" ra".
21-22 Aimung: Asang Yesu wa shid: ru mae" dam: daui: to" li" ra" khyo re ngonhaung" we' daga" sagse: kham nae" byu gatau dayaug ngonhaung" qo: ra". Ai: yaug wa Yohan Qid nyhab' kham byid: mung:- mungdao: kho" qhid: ra" ba na mae" ngonhaung" qhid' kheim: mae" Yesu mug:gaung khyo to' yu: ru qhug'ra" ba na joe" sho' Asang Yesu ngonhaung" we' daga" su" qin" du" qin" na: qin" rumae yo, byang" bobo: ra" yaug ngad ca" ra".
23 Aimung: yao: bam wa Yustu ga: re: mang zo: qo" mung: Barsaba ga: mang: ra" Yoseb we' Mathia tao mae" dayaug yaug re dam: khyin: yu nae" qhid' mae" dao: vhao" ako".
24-25 Ai: thao re yao: bam wa- Asang we"- Nao wa yaug khao: ngo" nho: nhag' lam: re ba yaug ngad: ra". Yuda wa yao: we' sin" ra" jo, qo khyo ye" lo" nae" to: co' ra" Yuda khu mae lagyo: dayaug khyo" mau" zo" vin vo; nae" qhid' mae" ce shid' yaug mae" khoyaug lam: re nao khyin: yu va" rure ngonhaung" re qhu" byid: la,- ga: akyu" mho' ako".
26 Alao" yao: bam wa ai shid' yaug mae" khyin: yu nae" pha" ce' khyo" ako". Mathia re pha" ce' ang mung: yao: wa ai: lagyo: daxe: dayaug: phaung mae bobo: ra".