4
1 Mangso da" shidkhoin" moo we' dei nyid bang: yo' shid: jo, mo, ri tarha" dang: phyed wa da" Khristu shidkhoin" moo we' hau: Aseing; gi vhoeb khang" wa da" kho: kham" khyo" ju" ri" wa zi nghoid wigi
2 Hau" mungdang: kho" kyoo" wa shid re" se' gyoo; nhang: wa shid re" yooboo toin" shid wa shid re" yoem: foin, byid: wa shid re- nheigloem: sheing:' sheing: jhau" byid: mhoo' byid: wa shid re" ayo, aboin: eung: nghoid loug we' acung: nghoid loug we' yoem: dakhaid nyid we ein: ngoo nang ri doin: nyhin" nyid.
3 Byu yi gi hau" deingmain" ziyo' ca yoo abo da" jhoug" myeing" jhoug" thui: ri atam" gyo: boem wigi nyang: tu: nya: nheigloem: aco' ajhoid khyoo: moo za: te: cang lo" boem ziyo' nyangnu" da" nheigloem: moo nheug yo: loo" sho' nyang: tam" gyoo: nau da" se' jhau" byid: da" sara: yi je" je, myo: lo boem sho' khyu: zheung" yu da" ayo, gi ju" loo wa zi nghoid.
4 Nyangnu" gi hau" deingmain" da" khyoo: ri tam" gyo: nyid jangmo phoug lo" boem wigi byu yi da" byuxeig mhoomyid: ri tid nyid bang: jhang khyoo:- tam" gyo: lho: nheigloem: vang zo: lo" byug boem wa nghoid.
5 Nang koem gi khayhang: te" da" akhyoo: again thoung" shau" loo nghoid loug we' re" da" gungdu: ri zei: zeung" ci: lho: wigi kyikhyeug, khyoo: ri kham zeung: nyid we'. Hau: ngeibu: lu dang: ge ri kho" kyo" da" sara: moozoo" ri voin vu, nyid wigi Mangso deizoo: dayug khyo" wigi- re" da" yoovoin, jo, moojo, ri joeb, byeung" sho' voin vu, nyid we.
6 Nga" shid re" koem gi ngoo nya: kangso ab, byid: pyam wa da" ayo, ju" loo bye:- akhid" hid: moo lang" nga" mougmyid kangso ri to" pyam khoo wa yo, gi ju" lo nyid bye:.
7 Ngoo gi gei, shi go" pui" moo yoemso bain sho' gei loo" bye:. Gei, wa shid re" ke' to" da" laki' bain: zeing: moo ju" sho' gei bye:. Hau: loem" jeing" khyoo: ri ngoo bain cang bye:.
8 Akhid" mo wigi deingmain" da" tarha" agyi ein: da" hau" Aseing gi tarha" dang: phyed da" bidnyid moo ngoo ri byid: wa nghoid da" hau: deing byeung" da" kangso dei khyoo: yo' sen: da" oung: doid lo" bidmug, gi nga" shid re" shoung: too" bye:- ngoo ri za: we' anghoid- nyang: doem ju" ri" wa da" khyoo: ri vho: ngei ziyo' lang" nyid bang: dangain" ri we' ab, byid: wa zi nghoid nyid.
9 Nga" jhang khyoo: myab, myab, yo" ju" ri wa shid re" yoem: bain sho' kaid yu" we.
10 Dema gi he: da" mougmyid ri jheddab yoomo ngoo ri she: pyam khare" lho: Thesaloni voo khyoo: loo" khari" bye:. Kareka gi Galati mung" khyoo: Titu gi dalamati mung" khyoo:- zheung: yhe: lo" boem bye:.
11 Luka za: ngoo yo' dage" nyid nyid Marku ri khe: yu lho: nang yo' dage" shu" ri" we' khasu" wim ga: ri he: moozoo" moo nyang: ngoo ri yo" bo pang" thoug wa zi nghoid.
12 Tukhiku ri koem gi Ephesu voo khyoo: ngoo nhang: kaid.
13 Nang re" lo da" uri Troa voo mo Karu moo to" da" nga" byi sheing: we' mougsoug" joem ri we' hau: lho: je" yhau: gyen: da" shooyid' mougsoug" joem ri we' bo yu ci: ri" byid: we.
14 Ngei byug: koid su: Alesandru gi ngoo ri age khyo" myoo" sho' ja: koid bye:- nyang: koid ziyo' dakhyoo" ti" hau: Aseing gi nyang: ri latoo: doem phug wa zi nghoid.
15 Nanyang: hau: yug ri lhid lho: jang" pyam nyid we' Khasu" wim ga: ri hau: yug gi ngoonu" kho" kyo" da" mungdang: ri gye" tu: lhoin" thug theung nyid su: nghoid.
16 Xang: shed" lheung: ngoo tarha" dang: phyed zi shau" nyid uri nga" da" gung ri ngoo tid goem, yu nyid uri nga" thang: khyoo: bo yab, lho: hang" we' abo tid byid: boem, byu dangain" bang: gi ngoo ri she: pyam to" boem, bye: Mangsoo ri we' nyangnu" hid: su" koid boem yoomo latoo: aphug, byid: baja".
17 Nghoid loug we' Aseing gi ngoo yo' dage" nyid nyid yoomo ngoo ri yoem: lung: byid: nyid wigi ngoo gi tungbau byumyu" yi dangain" bang: shoug" gyoo: sho' hau" ngeibu: lu dang: gi ri joeb joeb, byeung" byeung" yo" tid kyoo" baja"- said pyam wa ga: dang: phyed too" bye: jangmo khyoid yu ziri ngoo shau" kham: yu bye:.
18 Hau" Aseing gi akhyeing" ashoeb khyoo: dangain" jangmo nya: mougkhung: mungdain: moo ju" sho' goem, loem byid: wigi shu" loo" wa zi nghoid nyid. Nyang: moo apyaid atoo: mo myonhoo: phung" yoeb, gi dabo, jo, nyid baja" o". Amen.
19 Priskela yo' Akula eig yug we' Onesiphuru da" yheom: byu yi ri bo vhu" byid: kaid ago".
20 Erastu gi Korinthu voo moo nyid nyid Trophimu gi noo yoomo Melitu voo moo ngoo nyhed: too" kho' bye:.
21 Xung" gung ngam" yo, aju" shi" uri yo" ju" ri" sho' yoem: bain sho' kaid we. Ubulu Puden Linu Klodia yo' gootu: Khristain mangnhung" yi gi nang ri vhu" kaid boem ago".
22 Hau" Aseing gi re" Venyi: yo' dage" danyid nyid baja"- Mangso da" Venyi: gi nanu" yo' dage" dajo, jo, baja" o".