2
1 Nga" zoo: we"- nyha" da" Aseing Khristu Yesu moo dadeing: daloem: za: bue" lho: wigi kangso dei khyoo: mo yo" yu da" jeju" moo yoem: bo nyid we.
2 Sagsi: myoo" sho' bang: da" shidkhoin" moo nga" jhang mo nang jhau" yu gyo: yu bye: da" jhoug" myeing" jhoug" thui: ri ci: lho: byu gooji" ri we' yo" doem jhau" byid: wa zi nghoid ein: wigi nang loem, ge" da" byu yi ri doem thoid' ab, byid: wa.
3 Khristu Yesu tho' moo nheigloem: zung" da" gyi zoonu" yhang: ti" kyikhyeug, khyoo: ri bo kham: voin we.
4 Gyimoo" voin vu, nyid da" gyizoo: nu" dayug gi nya: atho' mo da" gyi zoug: phoo' nheig shid: nheig deig sho' zei: noug yoomo gyizoo: yo" asen: da" mungbyu yi khyoo: moo- ayo" bo cang vang lhu: koung" keug, yen" loo.
5 Gei shi' go" da" pui" moo bo vang gei shi nyid da" sarhi phoo' dayug gi nyang: cang ca" da" thung" tarha" yo' dakhyoo" ti" acang lo" nghoid rigi coung" nghei ngi: shab jhungshug ri shau" kham: yu wa zi anghoid.
6 Yoothung" phoug khyam: koid su: we' shivoo: shiloem, xangshid" shau" shab yu wa gam, boem' shau" yu ca" nyid.
7 Ngoo tid nyid khyoo: ri myid soin: yu" we' khasu" wim ga: ri Aseing; gi hau: khyoo: dangain" ri yo" se' da" emyed nang ri byid: loo wa zi nghoid
8 Ngoo kho" kyo" da" ngeibu: lu dang: moo bo ziyo' dakhyoo" ti" shid: byug bye: bang: mo doem dei to'' lo da" David da" akung: ako' nghoid nyid da" Khristu Yesu ri boin: so" nyid we.
9 Khasu" wim ga: ri ngoo gi hau: ngeibu: lu dang: kho" kyoo" yoomo kyikhyeug, zi shau" nyid. Yau: shau" jhen: bo nyid su: yhang: ti" myheug tei" to" zilang" thoung" shau" nyid. Nghoid loug we' hau: Mangso da" mungdang: koem gi myheug tei" too" shau" nyid zi anghoid.
10 Hougsu" nghoid nyid yoomo ngoo gi Mangso khyen: yu shau" nyid da" byu yi shid re" kyikhyeug yau: khe" zi: kham zo: nyid hougsu" kham zo: nyid da" khyoo: gi nyangnu" we' Khristu Yesu da" khoug: moo khyoid yu da" jeju" yo' hau: apyaid atoo: mo da" myonhoo: phung" yoeb, ri shau" kham: yu wa da" khyoo: nghoid.
11 He: dang: khoin" gi deingmain" da" dang: nghoid.
Nyhang" gi nyang: yo' dage" shid: lo" boem nghoid rigi
?nyhang" gi nyang: yo' dage' doem dei to'' lo" boem nghoid rigi
nyhang" gi nyang: yo' dage" doem dei to'' lo boem wa zi nghoid nyid.
12 Ngoonu" xo' lho: wigi kham zeung nyid boem nghoid rigi
ngoonu" nyang: yo' dage" mung" ri shau" vhoeb nyid boem wa zi nghoid.
13 Ngoonu" gi nheigloem: azung" boem
nghoid loug we' nyang: gi nheigloem: zung" su: nghoid nyid.
Khasu" wim gari nyang: gung du: ri nyang: mhau' lho, he: pyam nyid su: anghoid.
14 Byu yi ri khyoo: he: khaid ri tid poin" tid kyeung" nyid we' dang: tid ziyo' ngeug byo, go" khyoo: aboo wa shid re" Mangso da" shidkhoin" moo nyangnu" ri thain: thain: zid" nhang: too" we. Hougsu" hi: go" ngeug byo, go" nyid da" khyoo: gi ce" akyu" we' abo tho' moo agoo"- tam" gyoo: bang: ri lhu: phyo' lhu: shoin byid: da" khyoo: za: bui" nhang: nyid.
15 Nang koem gi nya: da" moozoo" moo ce" gyoug sho' cang abo da" moo" voin su: khyo" we' Mangso mungdang: ri deingmain" jo eung: khyo" kho" kyo" jhau" byid: su: khyo" we' Mangso shoid moo myonhoo: rua loo sho' yoemso bain sho' yoem: kaid nyid we.
16 Mangsoo yo' gang: go" loo" nhang: da" avoid avhu: anyhoin: athoung" moozoo" koid ziyo' akoo" afang: ga: tid da" dang: ri jang" pyam nyid we.
17 Houg: yhang: ti" jhau" byid: da" khyoo: gi gungshoo" ri zo: toung" lo" da" mang: gam: nooboug: yo' du nyid. Hougsu" jhau" byid: jang" moo bo da" byu eig yug gi Humeno yo' Philetu zheung: nghoid nyid ago".
18 Nyangnu" gi hau: deingmain" khyoo: mo vhang: lo" wigi ngoonu" da" dei to'' lo khyoo: gi bain" bue" lid loo" bye: ga: tid nyid ziyo' byu dayham" bang: da" loem" jeing" nheigloem: ri lhu: nhung' lhu: phyo' byid: pyam bye:.
19 Nghoid loug we' Mangsoo zhoug too" byid: bye: geingteing da" apoem: ayang; koem' gi dei loeb, yu: yen" nhang: zi anghoid. Hau" apoem: ayang: da" atho' moo hau: Aseing gi nya: da" byu yi nghoid bang: ri se' yu" nyid? ga: wigi we' Aseing yo' sen: su: nghoid? ga: wigi tid bang; dangain" mo, gi shoid vhang: da" moo" dangain" ri she: pyam khoo' goo" baja" ga: wigi laxoem" dazid' lhid" tab to".
20 Gyi: sheung; da" yhoem: daloem: moo khu, bain aja: ja: jo- dayham" gi ngei khu, yo' sheing: khu,- dayham" gi seig yo' koid zi myid zhoo" yo' koid da" khu, joem dayham" gi myonhoo: ngeilang: shid re" yhau: gyen: uri ci: wigi dayham" rigi khyi khang" moo" moo ci: da" zi joem nghoid nyid.
21 Byu dayug yug gi tid lid loo bye: da" akhyeing" ashoeb khyoo: mo nyang: nya: da" gungdu: ri cid" shang pyam nghoid rigi hau: yug gi Aseing yhau: gyen: khyo" soin nyheung' to" da" khyoo: moo yo" bo ci: yhoung: da" zi bue" lo khasu" wim ga: ri nyang: gi ge da" moozoo" ja" khang" moo" moo bo zei: wa shid re" jen" jen" nghoid nyid .
22 Zoolu: ayo, mo nheigloem: aco' ajhoid khyoo: ri jang" pyam lho: Mangsoo ri gyeungshang: da" nheigloem: yo' pang" thoug wa ga: mho' nyid mo, yo' dage" deing byeung" khyoo:- jheddab da" khyoo:- ngei pyo: myen, jham" khyoo: joem ri yoem kaid cang sho: nyid we.
23 Nghoid loug we' akoo" afang: koid ziyo' athung" azhug koid ngeug goo" da" dang: khoin" joem ri jang pyam nyid we. Houg: yhang: te" mo, da" lo" thang jang" moo gi myeing" myoo; yhoo: she: da" khyoo: za: bue" lo nyid ziri nang se' nyid gu nghoid.
24 Hau" Aseing da" deizoo: yug koem gi myeing" myoo: yhoo: she: khyoo: age koid loo: za: nyang: gi byu dangain" ri nheig se' khyeug ziyo' nheigloem: sheung; wigi se' jhoug" se' mhoo' byid: da" sara: nghoid ca".
25 Nyhang" nyang: ri ngeug se: doin: lhoem" keung" lo da" byu yi ri so' koid so' nyheung: jang" moo nu" nham' sam" dab khyoo: se' koid su: nghoid ca" nyid. Khasu" wim ga: ri nyangnu" gi nheigloem: thid lo lho: hau" deingmain" da" khyoo: ri se' gyo: loo wa da" akhang"- Mangsoo gi nyangnu" ri byid: ri byid: loo wa zi nghoid.
26 Houg: lang" nyangnu" gi jo da" khyoo: ri doem myang lo wigi boin: gyeung: lo lho: satan da" lhid mo yo" loid lo boem wa zi nghoid. Hau: gyeung: lo lho: satan da" hid' mo yo" loid lo boem wa zi nghoid hau; satan gi nyangnu" ri myeug, yu wigi nyang: myid vho: da" khyoo: moo cang loo" nhang yu" bye: su: nghoid.