6
1 Join, koid nyid bang: gi nyang: nya: da" yhoem: seing: ri phau" myang: moin: bang: nghoid ein: kham: yu ca" nyid boem- houg: lang" hang" we' Mangso myeing khyang" yo' ngoonu" da" jhoug" myeing" jhoug" thui: ri age khyo" juang" yi goo" wa zi anghoid.
2 Khristain join seing: yi da" lo, khoug: moo nyid da" join yi gi nyang: nya: da" yhoem: seing: bang: ri- dakhyoo" te" da" mangnhung" yi nghoid ein: aphoug" akhyoid age koid. Khasu" wim gari nyang: zei: byid: jangmo akyu" shau" kham: zoo: mo, gi nyang: tu: nyang: loemkhau: jheddab nyid bang: nghoid yoomo nyangnu" rilang" je" wigi pang" dei: byid: ge nyid.
Nang gi he: khyoo: ri jhau" shed kho" kyo" nyid ca"
3 Hang" nghoid loug we' adu go" khyo" atoug" khyo" shoid vhang: khyoo: ri jhau" byid: nyid su: gi ngoonu" Aseing Yesu Khristu da" deingmain" joeb, byeung" da" mungdang: joem yo' ngoonu" loem" jeing" da" khyoo: jhau" byid: ziri abo cang soo" loo za:
4 Nya: gung ri nyang: nghoidboin: phau: khuang lho: wigi ci" asi su: nghoid. Nyang: gi dang: tid jang" moo ngei goo" wa shid re" myeing" myo: lho: byo, goo" wa shid re" age nheigloem: boo su: nghoid. Hau: tho' moo gootu: houg: su" koid yoomo noo" goo" zoo, go" da" khyoo:- phung kho' go" khyoo:- atheung: anoo: loo: ngeug byo, go" khyoo:- aphoug" amyang: loo: gei, yu" go" khyoo:- age da" aloem" atho: khyoo: ze thu' loo nhang: nyid.
5 Hau: tho' moo gootu:- nheig abo ziyo' deing: main" khyoo: ri amyang ase' bang: jangmo ngeug, goo" byo, go" da" khyoo: gi daso' so' bue" thu lo nyid. Loem, khau: da" noku thung" eing: zigi yoo" zoo: yoo" shug da" de lo khyoo: nghoid- ga: nyangnu" myid yu ago".
6 Gyeing" nyang: ga: rigi nyang: nyang: yo" gu: ri nheig se' deig nghoid rigi loem khau: noku thung" gi byu dayug ri yo" loo de loo nhang: wa zi nghoid nyid.
7 Khasu" wim gari ngoonu" gi he: mougmyid moo ci" we' aci: loo vang re" boem- he: mougmyid mo doem, thu' lo" ri we' ce" noem ci: thu' loo" wa lha"- ci" we' ayo" ci: thu loo".
8 Houg: su" nghoid yoomo ngoonu" gi zoo: noem yo' voidmi void, byi: yoo" lang" gi hau: gu: yo' nheigdeig nyid ge boem bye:.
9 Nghoid loug we' yoo" noug di noug mo, gi mhoid" jhuphyo' da" zi shau" boem ziyo' akoo" afang: koid boem ziyo' shidgyoin noogyoin ze" bui" nhang: da" vhoo: boo myo, no, da" khyo: myoo" sho' ja: mo joem: duang: khuang" moo gyoo" loo" se' boem ago". Hau: zigi nyangnu" ri byo, yoin" soem" lo" joem: duang: khyoo: she: vang lo" boem abye: go".
10 Khasu" wim ga: ri ngei myo, no, da" khyoo: gi akhyeing" ashoeb khyoo: aja: ja: ri bue" thu' loo nhang: da" nei yang: nyang: nghoid bye:. Byu dayham" bang: gi hau" ngei ri yoo" wa shid re" nheigloem: gye" zhu: vho: ngei nyid boem yoomo loem" jeing" khyoo: mo vhang: lo" boem ziyo' kougshu: khyoo: aja: ja: yo' nyangnu" da" nheigloem: ri gyau: moin" loo" nhang: nyid boem ago".
11 Nang koem gi Mangso da" byu phoo' we"- he: khyoo: dangain" ziri yoem: kaid nyid we. Deing byeung" khyoo:- tarha" phau" cang khyoo:- loem" jeing" khyoo: jheddab khyoo: moo yoem: kaid lho: thoug shang" ziyo' nu" nham' da" nheigloem: yo" yu sho' yoem: kaid nyid we.
12 Loem" jeing" khyoo: yo" sen: da" tang" shi go" pui" moo yoem: bain sho' kaid lho: gei lo" wigi apyaid ato: da" kangso ein: da" jhungshug yo" yu sho' tang" we. Khasu" wim ga: ri hau: kangso dei nyid da" khyoo: moo nang ri Mangsoo khe: yu da" uri nang gi sagsi myo" sho' bang: da" shid moo yhen: yu abye:.
13 Jo, moo jo, ri kangso yo" kaid byid: da" phoo' Mangso shid' khoin" moo we' Pilaid' da" shidkhoin" moo we' nyang: loem" jeing" da" khyoo: ri geing: geing: teing teing yhen: yu bye: da"Khristu da" shidkhoin" moo we' He: da" moozoo" yoovoin, ri voin vu, wa shid mo ngoo nang ri amyeung" byid: kaid.
14 Nang gi nang ri amyeung" byid: to" da" khyoo: ri tam" gyo: wigi Khristu doem thu myang loo wa da" ayo, bidnyid ju" sho' jhug' zug, kyed za: cang pyeung nyid we.
15 Dayug kyeing" nghoid lho: myonhoo: phung" yoeb, bo wigi vhoeb khang" nyid da" kho: kham" yi tho' mo khokham Aseing yi tho' mo Aseing- Mangsoo gi ayo, akhyeing: ju" lang" Aseing Yesu ri dalheung: doem thu' myang: loo wa zi nghoid nyid.
16 Nyang: kyeing" za: ashid: abyug su: nghoid wigi nyang: gi hang" we' ayo" tain" tab yhe: da" bidbang moo loung" jo. Hang" we' nyang: ri amyang yu" ziyo' hang" we' nyang: ri age myang. Nyang: moo ngi bo ziyo' apyaid atoo: moo myonhoo: phung" yoeb, dajo, jo, baja" o"- Amen.
17 He: mougmyid moo kangso dei nyid shi" baja"- ageing: ateung' da" ziyoo jonu" yo' nyid gi nyid de da" khyoo: moo nanu" da" nheig nhei: joyoo akoid loo: za: ngoonu" goug, goug, yi yi yo" kham: yu wa shid re" ziyoo jonu" dangain" ri yo" byid: da" Mangsoo moo nheig nhei: jang: geingteing jo, wa shid re" amyeung" byid: nyid we.
18 Ge, lho, da" moo" ri zei: nyid wa shid re" ge da" moozoo" mo, yo" de loo wa shid re" we' byu gooji yiri gam, byid: myhoo' byid: khyoo: moo we' amyung ashoo" loo: yo" gam, byid: wa shid re" jen" jen" koid nyid goo' baja"- nyangnu" ri jhau" byid: nyid we.
19 Hid: khyo" wigi nyangnu" gi thang: phyang" pyaid shid re" geingteing da" apoem: ayang: bue" nyid goo" baja"- phoug" dab da" ziyoo jonu" ri nyangnu" shau" young: to" lho: Kangso dei khyoo: gyeing" nyang: shau" yu to" boem wa zi nghoid.
20 Timothi we"- nang ri ab, byid: to" da" aya: ri goolhoo: za: zoem: shoung: too" we. Aco' ajhoid da" khoin" co' loeb, khyoo: ri we' phajhi" dang: nghoid ga: byu dayham" bang: tid shoid myid da" akoo" afang: ga: ngeug go" dang: ri we' jang" pyam nyid we.
21 Khasu" wim ga: ri byu dayham" bang: gi hau: ja" phajhi" si' bang: nghoid ga: boem lho: wigi hau: loem" jeing" khyoo: mo vhang: lo" boem ago". Mangso da" jeju" gi nanu" dangain" mo, yo' dage" dajo, jo, baja" o".