3
1 Phoung: da" vhujhung: bui" noug, su: gi ge thang da" moo" daloem: ri vho: ngei nyid su: nghoid ga: wigi tid to" da" dang: gi deingmain" da" dang: dakhoin" nghoid nyid.
2 Phoung moo vhujhung: koid su: dayug gi yooboo adab su:- myi: dayug za: yoo" su:- se' zid" lhid nyid su:- nyang: nya: da" gung du: ri yo" khang" su:- akhyoo" joo joo kangso' se' dei nyid su:- nya: yhoem: moo tungbau being" voo ri doo" zhoo" doo" jhug noug su:- se' jhoug" byid: su: nghoid ca.
3 Yhid: ashug su:- anoug akhyoid akoid su: nghoid lho: wigi sam" dab nu" nham' su- myen, jham" khyoo: ri vhoo: su- nyang: gi ngei myo, ano, su: nghoid wigi
4 Nyang: nya: da" yhoem: ekoin deungkhu: ri goolhoo' za: yo" shu" vhoeb khang" ziyo' nya: zooyi wigi phau" myang: ziri shau" kham: yu sho' yo" se' koid su: nghoid ca.
5 Byu dayug gi nya: yhoem: ekoin deungkhu: ri khasu" shu" vhoeb khang" nyid wa ziri ase' nghoid rigi Mangso da" noku phung: ri khasu" se' shu" vhoeb khang" nyid wa lha".
6 Nyang: gi Khristain aseig bue" loo su: we' age nghoid- hougsu" wigi phau khuang khyoo: moo nheigloem: myhang: lo wigi yu satan ri yhang: ti" shen" yhen dang: phyed zi ashoug" baja"- hau: loem" jeing" khyoo: moo myheung yang" lo wigi nheig boo ung: gyeing: su: nghoid ca" nyid.
7 Nyang: gi juang" yi kheung" yoem: zi ashoug" wa ziyo' yu satan da" loemkhau: khyoo: moo abyid gyo" vang loo wa shid re" aloem" jeing" shi" bang: da" phau" myang: khyoo: ri yo" kham: yu da" byu dayug nghoid ca.
8 Phoung: tau, we' nheigloem: deing byeung" lho: asam" avoid, gi mo, nghoid ca. Yhid: ashug bang: ngei ri myo, no, vhoo: abo ziyo'
9 Hougsu" toin" shid too" bye: da" loem" jeing" khyo: da" deingmain" khyoo: ri gyeungshang: da" nheigloem: yo' lhoem: kham: yu yu lho: loem" jeing" loemkhau: nyid mo, nghoid ca" boem.
10 Nyangnu" gi xangshid" ri ca: kyeung yu" zi shau" boem lho: yooboo ri yo" oung: loid loo" mo, nghoid boem rigi phungtau, moo" ri voin nyid goo" baja.
11 Nyangnu" da" yhoemseing: myi' yi we' aved asam" gi mo, nghoid ca" juang" yi gei sang: mo, a gi nyangnu" gi yhid: ayed ziyo' khyoo: khaid khang" moo" moo deingmain" loem gi mo, nghoid ca".
12 Nyangnu" da" yhoem: seing: myhi' we' asam" avoid, gi bang: nghoid wigi sube" da" lu, wim gei sang: shang pyang: bang: anghoid loo: za: myonhoo: phung" yoeb, bo lho: khyoo: khaid khang" moo" moo nheigloem: dain: bang: nghoid nyid boem ca.
13 Nyang: yo' sen: da" moozoo" ri voin: tang: yo" zei: oung: doid' lo" da" phungtau, gi nya: shid re" myonhoo: ngi: shab zi shau" kham: yu ziyo' nyangnu" da" Khristu moo loem" jeing" khyoo: ri myo, yang" ziyo' yo" kho" kyo' nyid boem.
14 Ngoo gi he: da" mougsoug" lhid" nyid da" ayo, moo kha: myhang amyang" ri re" jhang moo ju" ri" wa ein: wigi myid byu nyid.
15 Nghoid loug we' ngoo to' myang" byug nghoid rigi dadei nyid Mangso phung: ein: da" hau: deingmain" apoem: ayang: nghoid da" Mangso yhoem: ekoin deungkhu: moo ngoonu" gi kha: yhang: te" da" avoid asam"- cang yhi: ca" khyoo: ri yo" se' yu baja" ein: he: mougsoug" ri lhid" kaid zi nghoid.
16 Nyha" noku thung" mo loem" jeing" da" no, thang khyoo: gi kha: yhi' gyi: lam: jo, ziri
hang" we' ngeug wa joyoo abo zigi vhoo: moo lhid" to" ziyo' dakhyoo" ti" nghoid nyid.
xangsu: byu da" gungdu: khyo" thu' yab, loo bye: ziyo' deing su: nghoid da" khyoo:-
hau: gyeungshang: da" Venyi: gi toin" shid nyid.
moug: lagyoo: yi we' nyang: ri shau: myang boem bye:.
Nya: khyoo: gi byumyu" bain sho' mo, ri kho" kyo" tid fu" boem abye: go".
Mougmyid byu dangain" gi nyang: ri loem" jeing" boem abye: go".
Houg: su" nyang: ri mougkhung: tho' khyoo: shu" to' yu zi shau" abye:.