SHOLUMON JIKHOIN"
MOUGSOUG"
(Song of Songs)
Akhid" pyaid mo jhoem: dang: phug yi dayham" moo he: jhoem: pug ri jikhoin" joem da" jikhoin" ga: myheing to" ago".
Ngoonu" da" myeing" moo he: zigi dang: kang: ko' loo" wa akhyoo" bui" nhang: da:. Houg: yoomo he: dang: vhu" ri Sholumon da" jikhoin" ein: ngoonu" doem nyheing koid too" bye:. Ciwim gari Hebre jhoem: pug moo Sholumon ga: lhid" too" yoomo nghoid.
He: mougsoug" pug gi jheddab myid dang: zhoem' mougsoug" nghoid wigi je" myo: du gi yuggi dayug wigi myiyi: myhi' ri nghoid nghoid myiyi: myhi' dayug gi yuggi phoo dayug ri nghoid nghoid yhang: byid: da" jikhoin" dang: joem nghoid.
He: jikhoin" pug ri dang: kang: phoid: to" zigi Yuda yi nghoid lang" gi Mangsoo yo' nya: byumyu" yi da" zoem" khoug: khyoo: ri pang shug to" zi nghoid. Khristain yi nghoid lang" gi Khristu yo' phung: da" zoem" khoug: khyoo: ri pang shoug to" zi nghoid.
1
1 Ge thang da" Sholumon jikhoin" dang:
Myiyi: myhi'
2 Re" nhoid yo' ngoo ri babug bug byid: bye:.
Re" jheddab myid gi zabyid yhid: tho' je ge nyid da:.
3 Nang joid ci: da" xu: gi gye nam pyo: nyid da:.
Re" myeing khyang" gi hau: ziri boin: soo" nhang: nyid zi nghoid.
Myiyi: dayug we' re" jheddab nheigloem: mo ayo" phang: loo" nghoid da:.
4 Nang yo' dage" ngoo ri khe: yu wigi nyha" tang: phang: shang.
Nga" khokham bue" lho: ngoo ri re" yab khyoo: shu" loo" we'.
Nyha" tang: dage" pyoo: shang.
Zabyid yhid: yed sho' shug lho: pyo: nyid shang.
Myiyi: myhi' yi dangain" nang ri jheddab zigi ce: moug" cang aboo.
5 Yerusalem mo myiyi: yi we" ngoo gi ceig ceig no, nghoid loug we' young" nyid.
Kedara midcoo: boem" mo zoem" yhang: ti" ceig ceig no, nghoid loug we'
Sholumon da" kho" khoug: mo khoem" goo pain" tho' re" gi je young".
6 Ngoo ri bid zang" wigi shoo" no, yoomo ngoo ri ayu" ngi goo".
Nga" mang: bang: ngoo ri nheig yo: wigi zabyid khyam: moo ngoo ri moo" koid nhang: bye:.
Ngoo gi nga" gung shid re" shoung: wa ayo, ayo" byid: nghoid da:.
7 Ngoo jheddab su: we" ngoo ri tid we'
Re" yang phung: ri nang mhain" khayoo: yhe: shu" zhoo" wa lha".
Nyid" dang: gung ri nyangnu" khayoo: vhoeb noo: wa la".
Ciwim yoomo gootu: yang zung" bang: da"
yang phung: khoug: moo nang ri ngoo shoo: wa shid re" ca" la".
Yuggi phoo
8 Myiyi: yi mo jheddab thang su: we" nang gi joyoo asi' rhe".
Yang phung: thang: cang yhi: we'.
Yang zung" bang: da" zoem" yam moo
re" coidbaid joem shid re" coung" yoo gi jo, zi nghoid.
9 Ngoo jheddab su: we"- Phara u da" myang: rheing" mo myang: loo: ri myang: myhi' gi
nheig dab yhang: ti" nang gi yuggi yiri nheig dab nyid.
10 Re" xam: gi re" baloid moo young" nyid da:.
Re" leung zeing ju" sho' sheing: gyoo" re" wigi lug nyoug yhang: ti" du nyid da:.
11 Nghoid loug we' ngoonu" gi re" shid re" sheing: yi: yo'
ngei khu joem koid byid: shi" wa zi nghoid.
myiyi: myhi'
12 Nga" khokham gi nya: yhoeb yoo moo jhang" jo, uri
nga" nam pyo: ja: gi lid moo nam pyo: nyid da:.
13 Nga" jheddab su: gi nga" yang gang moo jhang" jo, uri
Mura boo" yhang: ti" shoem: nam da:.
14 Nga" jheddab gi Engedi zabyid khyam: moo jo, da" bain: boo" yo' du da:.
Yuggi phoo
15 Ngoo jheddab su: nang gi khayhi' young" nyid lha".
re" myojid" we' jheddab myid yo' khayhi' bang nyid la".
Myiyi: myhi'
16 Ngoo jheddab su: nang gi khayhi' young" nyid lha".
Ngoo ri khayhi' myid pyoo: nhang: nyid lha".
Vufu" yoo gi nyha" da" yhoeb yoo nghoid da:.
17 Gyoin: gam gi nyha" yhoem: da" khung: doem: nghoid lho:
shithang: gam gi nyha" yhoem: da" moug: goo thi" nghoid nyid da:.