24
(Ikm 21:1-27)
1 Aseing gi Israela byu yiri dalheing: doem nheig yo: wigi nyangnu" jhang khyoo: nyang: gi David khyo" ci: loo" nhang: bye:. Aseing nyang: ri ?Israela yo' Yuda byumyu" yiri yhe: nghab yu" we'? ga: tid.
2 Houg: yoomo David gi nya: gyiphung: ri vhoebkhang" da" Yoab ri amyeing" byid: zigi ?Re" moo" voin bang: yo' dage" dathang: mo dathang: goem: sho' moo nyid da" Israela byukung: yi jhang khyoo: yhe: wigi byumyu" yiri yhe: nghab yu" ge'. Kha: myhoo' nghoid ziri ngoo si' nau? ga: tid.
3 Nghoid loug we' Yoab gi khokham ri ?Aseing khokham we"- re" Aseing Mangsoo gi Israela byumyu" yiri akhid" tho' mo dashoo: boem je myoo: sho' koid wa zi nghoid wigi nyang: hougsu" koid ziri yo" myang wa shid re" nang dei nyid zi nghoid. Nghoid loug we' ciwim yoomo hau: ziri aseing: khokham koid nau nyid lha"? ga: tid.
4 Nghoid loug we' khokham gi Yoab yo' nya: moo" voin mo, ri nya: amyeing" dang: tam" gyo: sho' koid wigi nyangnu" we' nya: shidkhoin" mo thu lo" lho: Israela byumyu" yiri yhe: cang nghab yu" boem bye:.
5 Nyangnu" gi Yodan gyid lang ri gu: dab wigi Gad mougmyid mo lang: khung" gung moo koid to" da" Arora voomoo" mougpyi: shoid moo dab koid lho: nyid boem. Houg: mo zi nyangnu" gi mougzhung: shoid Yezera voogung khyoo: we'
6 Gilead mung" khyoo: we' Hiti moug: Kedesha voogung khyoo: we' yhe: lo" boem. Hau: thang: ri nyangnu" gi Dan khyoo: doem yhe: ago". Dan mo zi bidvang shoid moo jo, da" Sidon khyoo: doem yhi: bye:.
7 Hau: thang: ri nyangnu" gi mougpyi: shoid mo vang khyam: kyam' to" da" Turu voogung khyoo: we' Hivi yo' Khanan byumyu" yi da" voogung joem khyoo: we' lo" thang moo Yuda mung" mougpyi: shoid moo jo, da" Berasheba voogung khyoo: nyangnu" ju" so" yen" boem bye:.
8 Houg: yoomo mougmyid dangain" jang moo cang so" yen" mo, gi lhammoo" goug: khyab eig xi: nyid" myang" thang: ri Yerusalem voomoo" khyoo: doem tau" ju" lo boem bye:.
9 Nyangnu" gi khokham" phoo ri gyi moo" yo" voin wa byu dangain" gi Israela mung" moo 800,000 yug yo' Yuda mung" mo 500,000 yug nyid ziri lo tid kyo" boem bye:.
10 Nghoid loug we' David gi byu zhayhen" ri bain koid: thang: ri nya: emyed moo akhyi" akhyoid bue" lo ziyo' nyang: gi Aseing ri ?Ngoo gi he: moo" zoo" ri koid lho: gyoug pho" da" yooboo ri shoid bye:. Jeju" mo yooboo ri khyoid pyam byid: we'. Ngoo gi koodoug: moo" zoo" ri koid bye: nhung:? ga: tid.
11-12 Aseing gi David da" lapi: Gad ri ?Khyen: yu wa zi soem" loem: ngoo nyang: ri byid: to" ein: David ri yhe: tid we'. Nyang: khyen: yu zi kha: loem: nghoid loug ngoo koid wa? ga: tid. Thang: nab kyoo' David to' thang: ri
13 Gad gi nya: jhang khyoo: yhe: lho Aseing nyang: ri citid bye: ziri tid kyo" lho: myid: zigi ?Kha: ziri khyen: yu wa lha". Re" mungdain: gi soem" zain phang" khoug gyoo" wa. Anghoid lang" re" gyivoo yi da" lo, moo vi: khyoo: phang: yen" ca" wa. Anghoid lang" gi soem" nyid" re" mungdain: moo noo phyoo" kyi" khyeug zeing shoug" wa. Akhid" hau: ziri myid yu" lho Aseing ri ce: noem doem phoug tid wa ziri ngoo ri tid kyoo" we? ga: tid.
14 David gi ?Ngoo myid myo: nyid zi nghoid. Nghoid loug we' byu yi khyo" wigi dam byid: ziri ngoo avhoo:. Aseing gi nheig se' khyeug su: nghoid yoomo nga" adang moo nyang: dam byid: baja"? ga: tid.
15 Houg: yoomo Aseing gi hau: nab soin: mo zi nyang: khyen: to" ayo, aju" cang cang gi Israela byumyu" yi da" adang moo noo phyoo" kyi" khyeug zeing ri bue" loo nhang: bye:. Mungdain: dathang: mo zi da thang: goem: sho' mo da" Israela byumyu" yi nyhed moin shid: doem pyam bye:.
16 Aseing da" moug: lagyoo: gi ?Yerusalem voomoo" ri lhu: phyo' pyam loo yid ri Aseing gi byumyu" yiri dam byid: jang" mo nheigloem: thid lho: wigi houg: bang: ri said yen" da" Moug: lagyoo: ri ?Noo: loo: ge'- gi" bye:?? ga: tid. Moug: lagyoo: gi Yebusi byumyu" Arauna da" gug nang: jang: nam moo nyid nyid da:.
17 David gi byumyu" yiri said da" moug: lagyoo: ri myang wigi Aseing ri ?Ngoo gi yooboo yoo" su: nghoid. Ngoo gi yooboo koid shoid su: dayug we' nghoid. He: sho" jhen: da" byumyu" gi cikoid shoid bye: lha". Nang gi ngoo yo' nga" ikoin deungkhu: byu yiri dam byid: eung: nyid zi nghoid.
18 Hau: nyid" jang: Gad gi David jhang khyoo: yhe: lho: nyang: ri ?Arauna gug nang: jang: khyoo: do, yhe: wigi Aseing shid re" xoin" ngei" phoin: daloem: koid we'? ga: tid.
19 David gi Aseing da" amyeing" ri tam" gyo: wigi Gad tid kyo" ziyo' dakhyoo" ti" yhe: koid bye:.
20 Arauna yu" kaid ri khokham yo' moo" voin bang: nya: jhang khyoo: do, lo nyid ziri myang bye:. Nyang: gi David da" shidkhoin" moo myidjang moo ju" sho' goeb pid wigi
21 Myid: zigi ?Aseing: khokham we"- nang hid: khyoo: cikoid re" lha"? ga: myid: bye:.
David gi ?Noo phyoo" kyi" khyeug zeing ri theung: pyam nhang: wa shid re" re" da" gug nang: jang: ri qei yu wigi Aseing shid re" xoin" ngei" phoin: daloem: koid wa nghoid? ga: tid.
22 Arauna gi ?Yu we' aseing: khokham we"- nang vho: ziyo' dakhyoo" ti" Aseing ri xoin" ngei" byid: wa shid re" nuloo: zoo: we' nyid. Thang" koid wa shid re" we' nukyoug: joem gug nang: jang: nyam: zam joem we' jo, da? ga: tid.
23 Arauna gi khokham ri hau zi joem dangain" byid: wigi nyang: ri ?Re" Aseing Mangsoo gi re" xoin" ri lhoem: yu baja" o"? ga: tid.
24 Nghoid loug we' khokham gi ?Anghoid he: shid re" nang ri ngoo aphoug" byid: wa. Ngoo moo aphoug" agyo" da" xoin" ri nga" Aseing Mangso shid re" ngoo angei" byid: wa? ga: tid. Hau: lho: nyang: gi gug nang: jang: yo' nuloo: zoo: shid re" ngei wim: xi: (50) byid: wigi qei: yu bye:.
25 Hau: thang: ri nyang: gi Aseing shid re" xoin" ngei" phoin: daloem: koid lho: myi: nghe' xoin" yo' zoem" khau: xoin" ri ngei" byid: bye:. Aseing we' nya: akyu" mho' da" dang: ri tam" gyo: byid: wigi Israela mung" mo noo phyoo" kyi" khyeug zeing gi theung: lo" byug bye:.