14
1 Yoab gi khokham David Absalom ri gye" nheig nge boin: so" ziri se' nyid yoomo
2 Tekoa voomoo" moo nyid da" nheigbo da" myiyi: myhi' ri khi: nhang: kaid da:. Nyang: ju" lang" Yoab gi nyang: ri ?Re" xam: akyo' loo: nheig koug nheig nge da" byimi ri void wigi nheig kug mhau' mhau' we'. Hougsu" wigi ayo, akhyeing: myang" myang" nheig kug nheig nge shau" da" myiyi: nu" dayug koid ci: we'.
3 Hau: thang: khokham phoo jhang khyoo: vang yhe: lho: ngoo nang ri khasu" tid wa ein: tid to" ziyo' dayhang: ti" nyang: ri tid wa zi nghoid? ga: tid da:. Hau: thang: khasu" tid wa khyoo: ri Yoab we' myiyi: myhi' ri tid kyoo" bye: da:.
4 Hau: myiyi: gi khokham phoo jhang yhe: lho: phau" myang: ziyo' goeb pid wigi ?Aseing: khokham we" ngoo ri bo pang" we' o"? ga: tid.
5 Nyang: gi myiyi: myhi' ri ?Nang cica" lha"? ga: myid: bye:.
Myiyi: myhi' gi ?Aseing: we" ngoo gi sho" jhen: da" cougmoo" myhi' nghoid. Nga" yhoem: seing: phoo we' shid: bye:.
6 Ngoo yuggi nu" eig yug yo"- Aseing: we"- danyid" rigi nya: tang: ri joug jhoin" zi hang" aboo looza: zoo goo" yoomo byo, go" wigi dayug ri said pyam bye:.
7 Akhid" gi Aseing: we" nga" bidnoem seing" cang" yi ngoo ri thougtheung lho: nya: mang: ri said pyam yoomo nyang: ri we' nyangnu" said pyam wa shid re" nyangnu" lo, khoug: khyoo: nga" zoo: ri ab pyam wa khyo" mho' nyid boem. Nyangnu" hougsu" koid nghoid rigi nga" lo" thang myid byu khyoo: yo' nga" yhoem: seing: phoo da" byuxeig doem: sho' lhu: phyo' wa zi nghoid? ga: tid.
8 Khokham gi ?Yhoem: khyoo: loo" we' hau: khyoo: ri ngoo koid byid: wa? ga: tid.
9 Myiyi: myhi' gi ?Aseing: khokham we" nang ce: noem koid nghoid loug we' nang yo' re" yhoem: byu yi younglho' nyid yoomo yooboo gi ngoo yo' nga" yhoem: byu yi kham: yu wa zi nghoid? ga: tid.
10 Khokham gi ?Nang ri gyi koid bang: dangain" ri nga" jhang khyoo: shu" ri" we' houg: lang" nyang: gi nang ri gyi doem yo" koid loo: wa zi anghoid? ga: phug tid.
11 Myiyi: myhi' gi ?Aseing: khokham we"- shid: bye: da" nga" zoo: shid re" latoo: phug wa akhang" yo" da" nga" bidnoem yi nyid boem ashi". Nga" zoo: ri said pyam tho' je gyi: da" youg: ashoid goo" baja". Re" Aseing Mangsoo jang" moo jeju" mo akyu" mho' byid: la o"? ga: tid.
David gi ?Re" zoo: dajhi' we' dam dab wa zi anghoid ein: kangso' Aseing jang" moo dangsoo" byid: too" bye:.
12 Myiyi: myhi' gi ?Aseing: khokham we"- ngoo ri jeju" mo dang: dakhoin" tid nhang: shi" we' o"? ga: tid.
Nyang: gi ?Gi bye:? ga: nyang: phug tid.
13 Myiyi: myhi' gi nyang: ri ?Ciwim yoomo Mangsoo byumyu" yiri houg: yhang: te" shoid da" moo" zoo" nang koid la". Gootu: mungdain: khyoo: khaid pyam da" re" zoo: ri doem tau" loo wa akhang" abyid: nghoid yoomo nanyang: tid ziyo' dayhang: ti" nang dang: phyed bye:.
14 Nyhang" dangain" shid: shoug" wa zi nghoid. Nyhang" gi myidgung moo foid sain" kaid wigi adoem yo" yu loo da" gyid yo' du nyid bye:. Mangsoo gi shid: jang" mo adoem yo" dei nhang: loug we' nang khokham gi gootu: mungdain: khyoo: khaid pyam da" byu dayug ri doem shu" yu wa khyoo: daloem: ri za: gi shau" myang wa zi nghoid.
15 Aseing khokham akhid" byumyu" yi ngoo ri kyug zo: nyid yoomo nang ri re" tid kyo" zi nghoid. Ngoo- ngoonyang: shau" myid lho: nang ri hid: su" re" lho: ngoo tid gu: ri nang koid byid: abe ein: myid byu nyid zi nghoid.
16 Mangsoo gi nya: byumyu" yiri byid: bye: da" mougmyid mo nyhang" ri thoid pyam wa jang" mo we' nga" zoo: yo' ngoo ri said pyam wa shid re" yoem: kaid nyid su: lo, mo we' khyoid yu wa shid re" nga" dang: ri nang tam" gyoo: byid: wa zi nghoid ein: ngoo myid jho: nyid.
17 Aseing: we" khokham gi Mangso da" moug: lagyoo: yo' du wigi ge ziyo' age ziri se' kho' yu yoomo re" dangsoo" khoin" gi ngoo ri gau nhang: wa ziri ngoo shau" myid nyid. Re" Aseing Mangsoo gi nang yo' dage" danyid nyid baja" o"? ga: tid.
18 Khokham gi ?Ngoo nang ri dang: dakhoin" myid: yu" ba- dangain" jo eing khyo" nang ngoo ri tid ca" wa zi nghoid? ga: tid.
Myiyi: myhi' gi ?Aseing: khokham we" ci: nghoid loug myid: we'? ga: tid.
19 David gi nyang: ri ?He: moo" zoo" nang ri Yoab koid nhang: anghoid la"? ga: myid: bye:.
Myiyi: myhi' gi ?Nang myid: da" dang: khoin" ri mhau' phug tid zi anghoid ein: deing byeung" da" aseing: khokham mo dang: theing too" bye: zi nghoid. He: zigi gyeing" nyang: re" gyizoug: Yoab gi ngoo ri khasu" koid wa khasu" tid wa tid kyoo" bye: zi nghoid.
20 Nghoid loug we' nyang: gi dangain" ziri nyheing wa khyo" koid zi nghoid. Aseing: khokham gi Mangso lagyoo: yhang: ti" phajhi" bo nyid yoomo moo" zoo" dangain" ziri se' nyid zi nghoid? ga: tid.
21 Hau: thang: khokham phoo gi Yoab ri ?Nang vho: khyo" koid wa shid re" ngoo myid phyed too" bye:. Zooyam zoo: Absalom ri yhe: khe: wigi hid: khyoo: shu" loo we'? ga: tid.
22 Yoab gi David shidkhoin" moo phau" myang: ziyo' goeb pid lho: ?Aseing: khokham we" Mangsoo nang ri mainkaid byid: baja"- ngoo mho' zi byid: yoomo nang ngoo ri vho: ngei nyid ein: ziri akhid" ngoo si' bye:? ga: tid.
23 Hau: thang: nyang: Geshura khyoo: yhe: lho: Absalom ri Yerusalem voogung khyoo: shu" loo bye:.
24 Nghoid loug we' khokham phoo gi Absalom ri khokham vang" moo ayo" nyid ga: amyeing" byid: too" bye:. Khokham phoo gi ?Ngoo nyang: ri anau yu"? ga: tid. Houg: yoomo Absalom we nya: yhoem: moo nyid wigi khokham pho shidkhoin" moo athu shug nghoid da:.
25 Israela byumyu" yi moo Absalom yhang: te" younglho' myeing gyi: da" byu hang" anyid nghoid da:. Nyang: gi vhuloem mo zi khyid: vhu" ju" sho' ca" zi ci aboo su: nghoid da:.
26 Nya: xam: joem gye" thu: ziyo' dazain dalheing: gye sheing: lho: myo: loo lang" za: nyang: phyed pyam da:. Hau: zigi leug yu" ri khokham vang" mo ci: da" jang yo' dakhyo" ga ri 1 joid: jain" bo da:.
27 Absalom gi yuggi zoo: soem" yug yo' Tama ga: da" gye" yung" myiyi: zoo: dayug yo" da:.
28 Absalom gi Yerusalem moo khokham ri amyang lhoo: za: eig zain nyid bye:.
29 Hau: thang: Absalom gi nya: shid re" khokham jhang yhe: nhang: wa ga: Yoab ri khi: nghoid loug we' nyang: ari" nghoid da:. Dalheing: doem khe: nhang: loug we' ari" nghoid da:.
30 Houg: yoomo Absalom gi nya: dei zoo: yiri ?Yu" we' Yoab da" yoo gi nga" yoo nam moo nghoid. Hau: yoo moo yoono, yug jo, da:. Hau: ziri yhe: nghe' pyam ge'? ga: tid. Houg: yoomo nyangnu" we' hau: yoo ri yhe: nghe' pyam bye:.
31 Yoab gi Absalom da" yhoem: khyoo: yhe: lho: ?Re" dei zoo: yi nga" yoo ciwim re" nghe' pyam lha"? ga: re" myid.
32 Absalom gi ?Ngoo nang ri re" khi: nhang: ri nang aloo yoomo nghoid. Ngoo nang ri khokham jhang yhe: nhang: lho: nya: jhang nga" shid re" hid: su" ein: yhe: tid we'. Ngoo Geshura voomoo" mo hid: khyoo: cikoid thu lo lha". Ngoo hau: voogung moo nyid zigi nga" shid re" je ge nyid da? ga: tid. Absalom gi xo' lho: ?Ngoo khokham ri yo" myang wa shid re" nang ri koid nhang: nau ziyo' nga" jang yooboo bo nghoid ri nyang: ngoo ri said pyam baja"? ga: tid.
33 Houg: yoomo Yoab we' khokham David jang yhe: lho: Absalom tid ziri yhe: tid kyoo" bye:. Khokham we' Absalom ri khi: nhang: wigi nya: jhang re" lho: nya: shidkhoin" moo goeb pid bye:. Khokham phoo we nyang: ri babug bug ziyo' tau yu bye:.