SAMUELA
MOUGSOUG" PUG EIG LOEM:
(2 Samuel)
Samuela mougsoug" mo xo' lo zi nghoid da" 2 Samuela mougsoug" gi mougpyi: shoid mo Yuda meing: ri xang: shi" khokham koid (abeing: zeing 1-4) ziyo' thang: ri mougzhung: shoid mo Israela mung" bo da" damung" dain: goin" ziri khokham khyo" vhoeb khang" da" David mhoomyid: shen" dam nghoid (abeing: zeing 5-24).
He: zigi David nya: mungdain: ri khasu" shu" jhen" yu khyoo: yo' nya: zhungtang geing: teing wa shid re" mung" byu yi akhoug: moo nyid da" gyivoo yi yo' tungbau yoem: so' joem ri khasu" khaid zain: ein: ziri bang bang lhid" to" zi nghoid.
David gi laloem lakhoug: gyi: su:- Mangsoo ri noku su: dayug nghoid wigi nya: byumyu" yi nyang: moo dang: zung" nyid shoug" su: nghoid ziri toin" shed to" zi nghoid. Nyang: gi dalheing: lheing: nheig khyeug myid aboo loo: za: nyang: myid vho: ziyo' bui" nau da" khyoo: ri za: koid shoid yooboo joem ri we' toin" shed too" bye:.
Nghoid loug we' nyang: gi nya: yooboo yoomo Aseing da" lapi: Nathan yo' shoug" go" uri nyang: gi hau: joem ri yen: yu wigi Mangsoo byid: da" dam ri khab yu bye:.
David da" kangso' dei khyoo: yo' oung: doid moo" zoo" gi Israela byumyu" yi nheigloem: khoug: moo gye" zug jo, da:. Houg: yoomo thang: boin: ri hau: byumyu" yi nheigloem: thang wigi gootu: khokham dayug ri myid vho: nyid uri David akung: ako' mo David nya: zoo: dayug nyang: yo' du zi nghoid baja" o" ga: sho' myid nyid da:.
1
1 Sholu shid: thang: ri David Amaleg byumyu" moo eig nyid" nyid da:.
2 Thang: nyid" ri Sholu dab mo yuggi zoo: dayug David jhang ju" lo wigi phau" myang: ziyo' myidjang khyoo: goeb pid bye:. Nyang: gi nheig koug nheig nge ziri ci: shug wa shid re" nya: byi: ri lang: ceig ziyo' nya: vhoo" loem ri myidzhoo" phei" geug gyoin: ci: da:.
3 David gi ?Khakhyo" lo lha"? ga: myid: lang"
nyang: gi ?Israela dab mo phang: thu lo? ga: tid.
4 David gi ?Ciwim ziri ngoo ri tid kyoo" we'? ga: tid lang"
nyang: gi ?Nyha" gyizoo: yigi meing: zain: jang: mo zheing: phang: bug bye: ziyo' gye" myoo: sho' ri we' said pyam shau" boem abye:. Sholu yo' nya: zoo: Yonathan: ri we' said pyam bye:? ga: tid.
5 David gi nyang: ri ?Sholu yo' Yonathan shid: ziri nang khasu" se' lha"? ga: myid:
6 Nyang: gi ?Ngoo gi Gilbea boem moo nyid nyid uri Sholu gi nya: lham: moo nghe: nyid ziri shau" myang. Gyivoo joem da" myang: rheing" yo' myang: ju: bang: gi nya: jhang khyoo: je tab lo nyid da:.
7 Hau: thang: ri nyang: lheing: yu" kaid ri ngoo ri myang yoomo ngoo ri khe: kaid da:. Ngoo gi ?Shoug" gyoo: bye: aseing:? ein: tu" bye:.
8 Nyang: gi ngoo ri hang" nghoid ga: myid: yoomo ngoo gi nyang: ri ngoo gi Amaleg byumyu" nghoid ein: phoug tid bye: zi nghoid.
9 Houg: lang" nyang: gi ?Hid: khyoo: re" wigi ngoo ri re" said pyam we' ngoo gye" gyi: da" dam dab bye: wigi kang: gyoo" loo: wa ti" ga: kyi' bye:? ga: tid.
10 Hougsu" nghoid yoomo nyang: gi khasu" nghoid nghoid leung loo" yo' dage" kang: gyoo" wa zi ngoo se' yoomo ngoo nya: jhang yhe: wigi nyang: ri said pyam bye:. Hau: thang: nya: vhoo" loem mo bidmug yo' nya: lo, mo lo, theing" joem ri ngoo khyoid yu wigi hau: joem ri re" jhang khyoo: ngoo ci: re" zi nghoid aseing we"? ga: tid.
11 David gi nheig koug ziyo' nya: byi: ri lang: ceig pyam wigi nya: byu yi dangain" hougsu" cang koid boem ago".
12 Meing: zain: pa: moo gye" myoo: sho' said pyam shoug" bye: da:. Sholu yo' Yonathan: shid re" we' Aseing da" byumyu" nghoid da" Israela byumyu" yi shid re" we' nyangnu" gi nheig koug nheig nge ngoug byid ngoug nab' yo' myen" thang: ju" sho' zoo: noem zeung: nyid boem ago".
13 David gi nya: jhang khyoo: lu dang: ci: re" da" yuggi zoo: ri ?Nang khamo nghoid lha"? ga: myid: bye:.
Nyang: gi ?Amaleg byu dayug nghoid- nghoid loug we' re" mungdain: moo nyid su: nghoid? ga: phoug tid.
14 David gi nyang: ri ?Aseing khyen: to" da" khokham ri nang voem" said zigi khasu" lha"? ga: myid:.
15 Hau: thang: ri David gi nya: byu dayug ri khe: yu wigi ?Nyang: ri said pyam we'? ga: tid. Hau: yuggi zoo: gi Amaleg byu ri said pyam da:.
16 David gi Amaleg byu ri ?he: zigi nanyang: ci: loo bye: zi nghoid. Nang gi Aseing khyen: to" da" khokham dayug ri said pyam bye: ein: ziri yen: yu bye: yoomo nanya: gung nanyang: tarha" dang: phyed zi nghoid.?
17 David gi he: ngoug ji ri Sholu yo' nya: zoo: Yonathan shid re" ji: byu: bye: zi nghoid ziyo'
18 Hau: zigi Yuda byumyu" yiri jhau" byid: wa shid re" amyeing" dang: byid: kaid bye:. (he: ziri Yasha da" soug" pug moo lhid" xoem" too" bye: zi nghoid)
19 Israela boem joem atho' mo ngoonu" da" vhujhung: ri said pyam bye: goo" nhung:.
Ngoonu" da" seing" yang" thang da" gyizoo: joem leung bye: goo" nhung:.
20 Hau: ziri Gad voogung yo'
Askhelon voogung khyoo: cang afu" yen" goo".
Philisti myhi' zeing yi agoug nhang: goo".
Yu phara" no' bang: da" myiyi: zooshang: yiri abu: nhang: goo"
21 Gilboa boem moo moug: we' avoo nhang: baja"
Nghain: we' akhyoo' nhang: baja" hau: boem yam cang shivoo: khanham we' agi baja".
Ciwim gari seing" yang" bang: da" goo joem ri aphau" akhyoid she: pyam to" ziyo'
Sholu da" goo ri we' xu: agyoid looza: she: pyam too" bye: zi nghoid.
22 Yonathan da" lid: gi kangso' yo" said da:.
Sholu da" Shamcoin" gi nheig khyeug shoomyen: zi aboo nghoid da:.
Yoem: gyi: bang: ri tu: lheing: pyam wigi gyivoo yiri said pyam ago".
23 Sholu yo' Yonathan nyid ri we' dage"
shid: ri we' dage" nghoid yoomo gye" mau" ziyo' jheddab myid nghoid da:.
Zoin bung: tho' myab wigi khangkhyi tho' yoem: je gyi: da:.
24 Israela myiyi: myhi' yi we"- Sholu shid re" ngoug ge'
Nyang: gi nanu" ri gyo, suid" void bo da"
phoug" dab phe" pain" byimi ri byid: foid bye:.
Nanu" ri lug nyoug sheing: zi yo' shoung: byid: bye:.
25 Seing" yang" da" gyizoo: yi leung bye: goo" nhung:-
Nyangnu" meing: zain: jang: moo said pyam zi shoug" bye: goo" nhung:.
Boem gung cang Yonathan leung shid: bye: nhung:.
26 Nga" nhung" Yonathan we"-
re" shid re" ngoo nheig koug nheig nge nyid.
Nang ngoo ri khayhi' jheddab nyid lha"
Nang ngoo ri jheddab zigi khayhi' mau" phoo" zi nghoid lha".
Hau: zigi myiyi: myhi' yi da" jheddab myid tho' re" je gyi: nyid da:.
27 ?Seing" yang" da" gyi: zoo: yi leung bye: goo" nhung:.
Nyangnu" da" gyizi gyikhoo: joem du" pyam khoo' bye: wigi
akyu" aboo bue" byug bye: nhung:? ga: ji: byu: bye:.