7
1 Houg: yoomo Kiriad Yarim voobyu yi we' Aseing da" Dang: Theing Kuid: ri re" yu wigi bouggung moo nyid da" Abinadab ga: su: da" yhoem: moo yu to" boem ago". Nyangnu" gi hau: ziri yu" coung: wa shid re" hau: yug da" nya: zoo: Eleaza ri ab to" ago".
2 Aseing da" Dang: Theing Kuid: gi Kiriad Yarim voogung moo eig xi: zain koo: jo, jo, da:. Hau: ayo, akhyeing: ri Israela byumyu" yi dangain" gi bo pang" wa shid re" Aseing jang" moo mho' yoid ngau nyid.
3 Samuela gi Israela byumyu" yiri nanu" da" Aseing jhang khyoo: nanu" da" ung: khoug: nheigloem: dangain" yo' lheung: lo boem nghoid rigi tungbau yu phara" soolhoo: dangain" ziyo' yu phara" myhi' Astarte da" soolhoo: dangain" ziri she: pyam ca" boem wa zi nghoid. Nanu" nya: gung hau: Aseing ri bain sho' shugbyid: to" wigi nyang: ri kyeing" za: noku loem khau: nyid boem nghoid rigi nyang: nanu" ri Philisti byumyu" yi da" lo, mo khyoid yu wa zi nghoid.
4 Hougsu" nghoid yoomo Israela byumyu" yigi nyangnu" da" Bala yo' Astarte yu phara" soolhoo: joem ri she: pyam wigi Aseing ri kyeing" za: noku loem khau: lo boem ago".
5 Hau: thang: ri Israela byumyu" yi dangain" bang: gi Mizpa joyoo moo zeung: foem: wa shid re" Samuela khe: kaid wigi nyangnu" ri �Hid: moo ngoo nanu" shid re" Aseing jang" moo akyu" mho' byid: nyid� ga: tid.
6 Hougsu" nghoid yoomo nyangnu" dangain" mo, gi Mizpa joyoo moo zeung: foem: nyid boem ago". Gyid dajhi' ri we' nyangnu" kham: yu lho: Aseing ri xoin" to' khyo" wigi pyi: khyo' pyam ziyo' danyid" goin" zoo: noem zeung: nyid boem ago". Nyangnu" gi �Nyangnu" da" Aseing ri shoid bye: o"� ga: toungbain: nyid ago". He: zigi Mizpa joyoo moo Israela byumyu" yiri Samuela gi tarha" tid byid: da" khyoo: nghoid nyid da
7 Israela byumyu" yigi Mizpa joyoo moo zeung: foem: nyid boem ga: ziri Philisti byumyu" yi shoug" gyoo: lang" Philisti khokham wim: yug yo' nya: byu yigi nyangnu" ri gyi khaid wa shid re" to' yhe: lo" nyid boem abye: go". Israela byumyu" yi we' hau: ziri shoug" gyoo: lang" gyoug: boem wigi
8 Samuela ri �Philisti byumyu" yi da" lo, mo ngoonu" ri khyoid yu wa shid re" ngoonu" Aseing Mangsoo ri xo' wigi akyu" mho' byid: we' o"� ga: tid nyid boem.
9 Samuela gi yang nu" dadu: ri said wigi Aseing shid re" xoin" khyo" du: goin" nyang: myi: nghe' xoin" ngei" byid: bye:. Hau: thang: ri nyang: gi Israela byumyu" yiri bo pang" wa shid re" Aseing jhang akyu" mho' ziyo' Aseing gi nya: akyu" mho' dang: ri tam" gyoo: byid: bye:.
10 Samuela gi hau: xoin" ri ngei" byid: nyid uri Philisti byumyu" yigi gyi khaid wa shid re" shid khyoo: ju" re" nyid boem nghoid loug we' Aseing nyangnu" ri gyi khaid khyo" wigi mougkhung: mo moug: goem: ri goem: nhang: kaid bye:. Nyangnu" gi gyoug dain ziyo' abyoo: asain" bue" lo" byug boem lho: phang: lo" byug bye:.
11 Israela byumyu" yi we' Mizpa joyoo mo thu re" boem wigi Bedkhara voogung alug ju" sho' Philisti byu yiri cang khaid yhe: lho: dakhyoo: goin" jang moo nyangnu" ri said pyam yhe: lo" boem bye:.
12 Hau: thang: ri Samuela gi lugzeing daloem: ri koid: yu wigi Mizpa yo' Shen agyoo: moo zhug to" lho: �Aseing gi ngoonu" ri dakhyoo: moo" goin" jang" moo pang" thoug bye:� ga: tid lho: nyang: gi hau: ziri �Pang" thug lugzeing� ga: myeing myheing byid: bye:.
13 Hougsu" nghoid yoomo Philisti byumyu" yigi gyi soem" lo" wigi Samuela dadei nyid da" ayo, bain sho' moo Israela yi da" mougmyid moo re" vang zain: wa da" byu yi dangain" ri Aseing gi toem' too" bye:.
14 Philisti byumyu" yi seung: to" da" Ekron yo' Gad agyoo: mo voogung joem dangain" gi Israela byumyu" yi da" lo, khoug: khyoo: doem vang bye: yoomo Israela byumyu" yigi nyangnu" da" mungdain: dangain" ziri doem yo" yu pyam bye:.
Hau: lho: Israela byumyu" yi yo' Khanan byumyu" yi da" agyoo: moo we' ngei pyo: yug yo khyoo: yo" doem bui" bye:.
15 Samuela we' nya: da" apyaid thang sho' Israela byumyu" yiri vhoebkhang" nyid bye: zi nghoid.
16 Nyang: gi zain khang" moo" Bethela- Gilgala yo' Mizpa joyoo cang so" lheung: yen" wigi Tarha" dang: ri cang phyed byid: yen" da:.
17 Hau: thang: ri nyang: gi Rama voogung mo nya: yhoem: khyoo: lo" wigi houg: moo we' tarha" agyi moo" zoo" ri lo" zei: nyid da:. Rama voogung moo we' Aseing shid re" xoin" to' phoin: daloem: ri we' nyang: koid too" bye:.