4
1 Hau: da" ayo, akhyeing: moo Philisti byumyu" yigi Israela byumyu" yiri meing: zain: wa shid re" foem: zeung: nyid ago". Houg: yoomo Israela byumyu" yi we' nyangnu" ri meing: zain: wa ga: thu lo boem ago". Israela byumyu" yigi Ebeneza moo zeung: foem: nyid boem. Philisti byumyu" yigi Apheg moo zeung: foem: nyid ago".
2 Philisti yigi meing: zain: lo wigi yoem: zug theig said go" thang: ri Israela byumyu" yiri nyangnu" oung: doid pyam wigi hau: gyipui" moo byu myid: khyeing" koo: said pyam boem bye:.
3 Loid byoin bang: theing: jang: khyoo: doem tau" lo" uri Israela vhujhung: yigi akhid" nyid" ciwim yoomo Aseing gi Philisti byumyu" yiri oung: loo" nhang: lha". Nyang: gi nyhang" yo' dage" nyid lho: gyivoo joem da" lo, khoug: mo nyhang" ri re" khyoid yu wa shid re" Shilo voogung mo Aseing da" Dang: Theing Kuid: ri lo" vu, yu shang� ga: tid go".
4 Hougsu" nghoid yoomo nyangnu" gi Shilo khyoo: lagyoo: zheung: nhang: kaid wigi dung dab da" dei noem atho' moo zhung: da" myhang: thang Aseing da" Dang: Theing Kuid: ri yu ci: re" ago". Eli da" nya: zoo: tang: Hobni yo' Phineha we' hau: Dang: Theing Kuid: yo' dage" cang re" ago".
5 Hau: Dang: Theing Kuid: ju" ri" yo' dage" Israela byumyu" yigi myidjang noin" loo" sho' gau yi boem ziyo' yoem: bain sho' nyho: boem abye: go".
6 Philisti byumyu" gi hau: nyhoo: thui: ri shoug" gyoo: lang" �Hebre theing: jang: moo nyho: nyid da" thui: dangain" ziri tam" gyo: yu" ge'. hau: zigi ce: noem dang: kang: nghoid lha"� ga: tid nyid ago". Hebre theing: jang: moo hau: Aseing da" Dang: Theing Kuid: ju" jo, ziri nyangnu" myang lang"
7 nyangnu" gi gyoug ziyo' yu phara" daloem: nyangnu" da" theing: jang: moo ju" jo, bye: nhung:- nyhang" soem" loo" zi bye:- lid loo bye: da" ayo, moo ngoonu" hid: yhang: te" zigi dalheing: we' abue" yu".
8 Hid: yhang: te" da" yoem: so' gyi: da" yu phara" yi lo, mo ngoonu" ri hang" yo" khoid yu wa lha". Hau: yu phara" gi Egutu byumyu" yiri midcoo: doem: moo said toem" pyam bye: zi nghoid.
9 Philisti byumyu" yi we"- agyug goo" lu: gi yi yhang: ti" zain: nyid ge'. hougsu" anghoid rigi nya" da" join koid yu" bye: da" Hebre" byumyu" yi yhang: ti" nyhang" we' nyangnu" da" join shoug" koid wa zi nghoid. Hougsu" nghoid yoomo lu: gi yi yhang: ti" zain: nyid ge'� ga: tid.
10 Philisti byumyu" yigi yoem: theung wigi xo' zain: loo" yoomo Israela byumyu" yiri oung: pyam bye:. Israela bang: we' nyangnu" da" yhoem: khyoo: phang: lo" abye: go". Houg: moo gye" said pyam yoomo Israela gyizoo: yigi soem" moin shid bye:.
11 Mangso Dang: Theing Kuid: ri we' lhoid yu lo" byug wigi Eli da" nya: zoo: tang: Hobni yo' Phineha ri we' said pyam zi shoug" bye:.
12 Benyamin akung: mo byu dayug gi meing: zain: jang: mo Shilo voogung khyo: tang" phang: lo" wigi hau: nyid" nyang: ju" lo da:. Nyang: gi nheig koug khyoo: ri ci: shug khyo" wigi nya: byi: ri lang: ceug pyam lho: vhuloem moo phei" lhoug: geig shoin" nyid.
13 Eli we' Dang: Theing Kuid: shid re" gye" myid ci' nyid yoomo khyoo: yam moo jo, da" zoem" khoug: moo zhung: jo, wigi yu" nyid da:. Hau: yug gi voogung goin" moo lu dang: lo fu" kaid yoomo gyoug yoomo dangain" mo, da" ngoug thui: thu lo boem ago".
14 Ngau: thui: joem ri Eli shoug" gyoo: lang" �Lu: fu: da" ngoug thui: joem gi ce: noem thui: joem nghoid lha"� ga: myid: lang" hau: yug gi Eli jhang myab myab re" wigi lu dang: dangain" ziri tid kyoo" bye:.
15 Akhid" Eli gi goug: xe: shed zain nghoid bye: yoomo myo, alug lug amyang loo nghoid da:.
16 Hau: yug gi �Ngoo gi meing: zain: jang: mo phang: loid lo zi nghoid- akhid" nyid" nyang: hid: moo ju" sho' tang" phang: lo zi nghoid� ga: tid.
Eli gi nyang: ri �Nga" zoo: we"- ciwim bye: lha"� ga: myid: bye:.
17 Lu dang: lo fu" su: gi �Israela byumyu" yigi Philisti byumyu" yi da" shidkhoin" mo phang: sain" lo" byug boem bye:. Hau: zigi nyha" shid re" atho' tid loo soem" lo" byug bye:. Hau: tho' moo re" zoo: tang: Habni yo' Phineha eig yug we' said pyam zi shoug" bye:. Mangso da" Dang: Theing Kuid: we' lhoid yu pyam zi shoug" bye:� ga: tid kyo".
18 Hau yug Dang: Theing Kuid: khyoo: ri tid kyoo" lang" Eli gi khyam: khoem" duang: yam nyang: zhung: jo, da" zhungtang mo leung loo" khari" bye:. Nyang: gi gye" mang: bye: ziyo' xu: yoomo leung zeung: gyau: wigi shid: khari" bye:. Nyang: gi myid: xi: zain Israela byumyu" yi da" vhujhung: koid loo bye: su: nghoid.
19 Eli da" dumoo" Phineha da" yhoem: seing: myhi' gi zoonu" gung nghoid wigi nya: zoonu" khu: wa da" ayo, ju" re" nyid bye:. Nyang: gi Mangso da" Dang: Theing Kuid: yu pyam byid: bye: da" khyoo: ri we' nya: vang moo" yo' nya: yhoem: seing: phoo shid: bye: da" khyoo: ri shoug" gyoo: bye: yoomo nyeigdain tung" zookhu: noo no wigi zookhu: byid: bye:.
20 Nyang: gi bain shid: lo" nyid yoomo nyang: ri bo pang" da" myiyi: yigi nyang: ri �Zeing: we' nang yuggi nu" dayug khu: too" bye:� ga: tid. Nghoid loug we' nyang: gi atam" gyoo: wigi phug we' aphug tid loo: nghoid da:.
21 Nyang: gi zoonu" myeing ri Ikhabo ga: myheing byid: bye:. Hau: zigi Mangso phung" yoeb Israela byumyu" yi jang" mo thu lo" byug bye: ein: da" dang: kang: ri yu zi nghoid. Hau: zigi Dang: Theing Kuid: ri lhoid yu phyug ziyo' nya: vang moo" yo' nya: yhoem: seing: phoo shid: lo" khyoo: ri dang: kang: tab yu zi nghoid.
22 Nyang: gi �Mangso da" Dang: Theing Kuid: lhoid yu phyug bye: yoomo Mangso da" phung" yoeb Israela byumyu" yi jang" mo thu lo" byug bye:� ga: tid.