22
1 Hau: thang: ri moug: lagyoo: gi Mangsoo yo' yang nu" da" zhungtang mo yau, thu' lo lho: kyi: myhoo: lug su" bang young" jo, da" kangso gyid moo" lang' ngoo ri toin" shid wigi
2 Hau" da" gyid moo" lang' gi voogung kang' mo fu" moo" khyoo: cang yau, gyoo" lo nyid. Hau: gyid yam, shoid khang" moo" moo lhammoo" khyab, khang" moo" dazain moo daxe: eig lheung: ashi" zei: da" kangso' shi" gam yug jo. Hau: shi" gam, da" afu' joem we' byumyu" yi da" noo boug: ri ze: gi byid: wa shid re" moocid" moo" nghoid nyid.
3 Hau: voogung khoug: moo Mangso nheing" myeing" nheing" thui: ga: zigi khanham we' jo, loo: wa zi anghoid. Mangsoo yo' yang nu" da" zhungtang gi voogung khoug: moo dajo, jo, wigi Nya: deizoo: yi gi nyang: ri noku coung" nghei boem wa za: nghoid.
4 Ngoonu" gi nya: da" myonhoo: ri yu" wigi nyangnu" da" ngeilang: joem moo nya: myeing ri lhid" tab to" boem wa.
5 Hau: voogung moo myen" khanham we' ajo, yoomo nyangnu" gi myibung: da" bidbang we' bid da" boo" bang we' aca" loo: wa Khasu" wim gari Aseing Mangsoo gi nyangnu" da" bidbang bue" lo wigi nyangnu" gi apyaid atoo: moo Khokham" yi yhang: ti" vhoeb khang" lo" boem wa.
6 Hau: thang: ri moug: lagyoo: ngoo ri tid zigi He: dang: joem gi deing byeung" ziyo' loem ge" nyid. Hau: lho: nya: Venyi: lapi: yi ri kaid byid: da" Aseing Mangsoo gi ayo, khamyhang amyang" ri bue" loo wa da" khyoo:- nya: deizoo: yi ri toin" shid wa shid re" nya: da" moug: lagyoo: yi ri nhang: kaid bye ga: wigi Yesu ngoo ri tid.
7 Yesu gi tam' gyoo: ge' ngoo amyang" ri re" loo wa he: jhoem: pug mo lapi: dang: ri tam" gyoo: mo gi ngi: lho' shau" boem wa ga: tid.
8 Ngoo Yohan gi he: da" khyoo: joem dangain" ri shau" gyo: ziyo' shau" myang su: nghoid. He: khyoo: ri shau" gyo: ziyo' bain myang thang: ri he: khyoo: joem ngoo ri toin" shid da" moug: lagyoo: khyid: yang: moo ngoo gi nyang: ri goeb pid wa soin.
9 Nghoid loug we' nyang: ngoo ri tid zigi Houg: su" akoid- ngoo gi re" da" mangnhung" lapi: yi yo' he" moug: soug" moo bo da" mungdang: ri tam" gyoo: mo, dangain"- nanu" da" deizoo: byencang" dayug nghoid. Mangsoo ri danoku" ge'? ga: tid toem pyam.
10 Hau: thang: ri nyang: gi ?He: mougsoug" moo bo da" lapi: dang: ri azau" too". Khasu" wim gari he: khyoo: dangain" bue" loo wa ayo, gi jhang bye:.
11 Adeung amain" su: gi adeung amain" khyo" cang nyid shi" baja"- agyeungshang: su: gi agyeungshang: khyo" nyid shi" baja"- gyeungshang: su: gi gyeungshang: nyid baja",, ga: ngoo ri tid.
12 Tam" gyo: yu" ge'. Ngoo amyang" ri ju" ri" wa dayug yo' dayug ri nya: moozoo" yo' dakhyoo" ti" doem toug" byid: wa moin: yi" da" ngi: shab jhungshug gi ngoo ci: ri" wa.
13 Ngoo gi xangshid" yug yo' lo" thang yug- gamshid" shi: su: yo' gamthang: theing su: nghoid? ga: wigi Yesu tid.
14 Kangso shi" gam, mo ashi" ri zoo: wa amyeung" yo" lho: voogung khoug: khyoo: khoem" moo" duang: khyo" yo" vang loo" sho' nyang: nya: da" byisheung: joem ri cid" phyu: pyam mo, gi ngi: lho' nyid.
15 Nghoid loug we' voogung da" nghe: shoid moo nyid mo, gi loem" jeing" khyoo: moo khyoo: vhang: vhang: mo, goem, phain" maintain: khyoug" mo, yo' aved, avhu: koid mo, byu said mo, soolhoo: ri noku mo, yo' ung: khoug: mo we' zei: da" moozoo" khyo" we' no" zo mhau' fain" voo mo, nghoid nyid boem ago".
16 ?Ngoo Yesu gi Phoung byu yi da" akhoug: moo hid: yhang: te" khyoo: joem ri tid fu" kyoo" wa shid re" nga" moug: lagyoo: ri nhang: kaid. Ngoo gi David da" akung: mo yhoem: byu nghoid lho: wigi nabsoin: boo" myhu: we' ngoo nghoid nyid.
17 Hau: Venyi: yo' myhi' seig gi ?ri" we'?.
He: khyoo: ri shoug" gyoo: mo, hang" nghoid loug we' ?ri" we'? ga: tid baja".
Gyid shed' su: gi ri" baja"- shug noug mo, hang" nghoid loug we'
jhungshug khyo" aphoug" agyoo" loo: za: kangso gyid ri kham: shug goo" baja"? ga: tid.
18 Ngoo Yohan gi he: da" mougsoug" mo lapi: dang: joem ri gyo: yu mo, dangain" ri jhug jhug tid poin" kaid zigi dang: he: gu: mo daja: ja: ri loung: kaid su: hang" ri we' he: mougsoug" moo lhid" to" da" shen" yhen shidgyoin joem gi Mangso wigi nya: tho' moo lung: byid: loo wa.
19 He: mougsoug" moo bo da" lapi: dang: daja: ja: ri yu she: pyam su: hang" ri nghoid loug we' he: mougsoug" moo lhid" to" da" kangso shigam mo shi" ri zoo: wa ziyo' gyeungshang: da" voogung moo yo" vang yu zoo: wa nya: da" agyid asoo: ri Mangso yu she: pyam byid: loo wa zi nghoid.
20 Nghoid bye: ngoo amyang" ri deing" deing nyang: ju" ri" wa ga: tid. Houg: su" bui" baja"- Aseing Yesu we"- gyoo" ri" we' o".
21 Aseing Yesu da" jeju" gi yug khang" moo" yo' dage" dajo, jo, baja" o".