20
1 Hau: thang: ri moug: lagyoo: dayug gi no, athang da" joyoo mo khoem" thoug" yo' jo to' jang coo" doem zeing ri nya: lo, moo ci: lho: mougkhung: mougdi mo gyoo" lo ziri ngoo myang.
2 Nyang: gi yu yo' satan nghoid da" goonham, mo lhangmyu, ein: da" main jung: zeing ri tei" yu lho: zain nyid dakhyeing" ju" sho' tei" too" bye:.
3 Moug: lagyoo: gi hau: yug ri zain' nyid dakhyeing" zain lid loo" sho' mungbyu yi ri ayo" mhoug: loo: baja" ga: hau: no, athang da: duang: khuang" khoug: khyoo:- nyang: ri khyo, kaid to" wigi hau: duang: khuang" ri myhed" to" ziyo' hau" atho' moo dazid' ri baid to". Hau: zain nyid dakhyeing" zain lid loo" lang" gi nyang: ri daso' zoo: doem phoid: kaid wa zi nghoid.
4 Hau: thang: moo zhungtang joem ri ngoo myang kaid- hau" zhungtang tho' moo zhoung: jo, mo, gi dang: phyed wa da" amyeung" yoem: so' yoo" mo, nghoid nyid boem. Hau" tho' mo gootu: Aseing Yesu da" sagsi kham yoomo we' Mangso mungdang: yoomo we' zain: said zi shau" mo, yo' hau: da" akhyeung" da" gougnyhoug ri we' nya: da" alhoo: ri we' abo no" mo, yo' nya: da" laxoem" nghab yug ri nyangnu" da" ngeilang: yo' lo, moo abo tab ci: mo, da" soobyoo joem ri ngoo myang. Nyangnu" gi doem dei lo boem wigi zain nyid dakhyeing" ju" sho' Khristu yo' dage" vhoeb khang" nyid boem wa zi nghoid.
5 ( Deing jo, da" byu shid: yi koem gi hau" zain nyid dakhyeing" athang loo" shi" uri gi adoem dei to'' lo boem shi") He: zigi shid: bang: ri xangshid" moo doem dei to'' loo nhang: da" khyoo: nghoid.
6 Xang: shed" doem dei to'' lo phung: moo yo" boo su: gi ngi: lhoo' su: gau yi zi shau" su: nghoid- eig lheung: shid: da" khyoo: gi nyangnu" ri ayo" vhoeb khang" loo. Nyangnu" gi Mangso da" khainjung yi yo' Khristu da" khainjung yi nghoid boem wa nghoid wigi hau' zain nyid dakhyeing" Khristu yo' dage" yo" vhoeb khang" nyid boem wa zi nghoid.
7 Hau zain nyid dakhyeing" lid loo" lang" gi satan ri thung: mo doem nhang: kaid zi shau" wa zi nghoid wigi
8 Hau" satan gi mougmyid gyab, goin" jangmo Goga yo' Magoga ga: da" byumyu" yi ri meing: shu" zain: wa shid re" mhau' khe: zheing" wa ga: thu' yhe:loo" wa zi nghoid- houg: bang: gi nam mug dara mo midcoo: su" myo: zi nghoid boem.
9 Houg: bang: gi mougmyid goem: sho' yoeb, do, lo wigi Mangsoo byu yi dab yo' nya: jheddab da" voogung ri lheung khoem' to" boem bye:. Nghoid loug we' mougkhung: moug: di mo myi: gyoo" lo wigi nyangnu" ri re" nghe jhoem" pyam bye:.
10 Hau: thang: ri nyangnu" ri mhau' da" main: yu we' myi: yo' fang nge" nyid da" thoem" khoug: khyoo:- du" khyo' kaid zi shau" bye:- hau:jang" moo hau" akhyeung" da" gougnyhoug ni zeing yo' mhau' da" lapi: joem we' loung" jo. Nyangnu" gi nyid" ri myen" ri kyikhyeig shau" nyid ziyo' apyaid atoo: moo daloung" jo, boem wa nghoid.
11 Hau: thang: moo phyu: da" zhungtang yo' hau: tho' moo zhoung: jo, su: ri ngoo myang- Nya: da" myo, shid ti: mo wigi mougmyid yoosoo" yo' mougkhung: mougdi gi bei: loo" khare" lho: hau: eig ja: gi khanham we' adoem myang loo.
12 Hau: lho: wigi shid: lo" byug bye:mo, gyi: zoo: nge, zoo: gi hau: zhungtang shidkhoin" moo to' yab, jo, boem ziri ngoo myang. Houg: lang" mougsoug" bug joem ri we' phang to" boem Kangso mougsoug" ga: da" mougsoug" bug gootu: ri we' phang to". Shid: loo" bye: mo, gi nyang: nya: da" aved' asam" yo' dakhyoo" ti" mougsoug" bug moo lhid" to" khyo" cang lho: tarha" dang: phyed zi shau" nyid boem ago".
13 Houg: lang" nammugdara gi nyang: moo bo da" byu shid: joem ri doem toug" byid- shid: no khyoo: yo' moovoo, moug we' nyang: tu:nyang: moo bo da" shid: mo, ri doem toug" byid: boem- byu dangain" bang: gi nyangnu" nyang: zei: loo bye: lo, moo" yo' dakhyoo' ti" tarha" dang: phyed zi shau" nyid boem.
14 Houg: lang" shid: zoug: yo' moovoo, moug: gi hau" myi: gyid' thoem" moo du" zei pyam zi shau' ago".( Hau" myimi: thoem" gi eig lheung: ein: shid: da" khyoo: nghoid.
15 Kangso mougsoug" pug moo myeing aboo mo, hang" we' hau" myimi: thoem" moo du" zei pyam zi shau" nyid.