1 Hau: thang: ri ngoo gi mouglaid moo gootu: atho' oung: se' tid da" gyi: thang da" mau" pho" khyoo: daja: ri myang Hau: zigi shidgyoin nyhed ja: ein: da" moug: lagyoo: nyhed yug nghoid. Hau: da" shidgyoin joem gi Mangsoo nheig khoo" yo: da" khyoo" ri lo" thang mo toin" shid khyoo: nghoid.

2 Hau: thang: moo ngoo gi myi: yo' lheug to" da bangteing gyid thoem" daja: ri myang- xo' lho: wigi akhyeung" da" gougnyhoug zeing yo' nya: soolhoo: ri we' nya: da" nghab yug dazid' ri tab ci: mo, ri we' yo" oung: pyam bye: su: ri we' ngoo myang. Nyangnu" gi Mangsoo byid: da" teing joem ri ci: lho: bangteing gyid thoem" nam, moo zheung: yab, yoin" to" wigi 3 Nyangnu" gi Mangso deizoo: Moshe yo' Yang nu" da" shidkhoin" moo zheung: yab, jo, boem wigi Moug: thu' xang: poin: mo wigi danyid nyid da" Mangsoo we"- Nang koid da" moozoo" gi gyi: thang lho: mau" pho" zi nghoid nyid nhung: byumyu" yi bain sho mo, da" Khokham" phoo' we"- Re" da" moozoo" joem gi jo ziyo' deingmain" zi za: danghoid nhung:. 4 Aseing we"- Nang ri agyug phau" zi hang" yo" nyid wa lha". Re" da" gyi: myhang: khyoo: ri tid fu" wa shid re" hang" voem" ngeug pyam wa lha" Nang za: date: gyeungshang: nyid yoomo byumyu" cang: joeb, bain sho' mo, gi Nang koid da" moozoo" dangain" deing byeung" jo, da" khyoo: ri byumyu" cang: joeb, bang: myang loo: yoomo Nang ri phau" myang: noku lo boem wa"- ga: wigi jikhoin" khoin" nyid boem ago". 5 Hau: thang: ri mougkhung: moo dang: thang cab, zoem" nu" jo, da" Noku Yhoem: Moo" khoem" bang jo, ziri ngoo myang. 6 Hau: thang: ri nooboug: nyhed ja: ri ci: thu' lo da" moug: lagyoo: nyhed yug gi Noku Yhoem: Moo" khoug: mo thu' re" boem. Nyangnu" gi doug, bang gyeungshang: da" jidmoo" byimi, joem ri void ci: lho: sheing: phyid" cu" ri yang gang moo zheung: cu" ci: boem ago". 7 Dei noem gougnyhoug myid du: mo dadu: gi pyaid di du: moo dadei nyid da" Mangso nheig khoo" yo: da" ziyo' byeung" bo da" sheing: goem, nyhed loem: ri moug: lagyoo: yi nyhed yug bang: da" lo, moo zheung: ab, byid. 8 Noku Yhoem: Moo" gi Mangso myonhoo: phung" yoeb, yoomo myikhoug" byeung" nheung: jo. Houg: yoomo moug: lagyoo: nyhed yug zheung: ci: re" da" nooboug: joem athang thang gi hau: Noku Yhoem: Moo" moo hang" we' ayo" vang loo.