10
1 Mangnhung" yi we"- ngoo gi ngoonya: da" byumyu" khyoid yu zi shau" wa shid re" nheigloem: ungkhoug: dangain" yo" myid byu zoo" re" Mangso da jhang: moo akyu" mho' nyid.
2 Nyangnu" gi Mangsoo: ri gye loem" jeing" loem" jeing" mo nghoid zi ri ngoo sagsi yo" kham: loug we' nyangnu" da loem" jeing" da" akhyoo" ri shoid vhang: nyid boem.
3 Nyangnu" gi- Mangso da" shidkhoin" moo deingbyeing" loo wa da akhyoo" ri asi yoomo hau: khyoo" moo acang loo za: nyang: nyang: myid soin: nyheung' koid to" da khyoo: ri cang lo" boem. Houg: yoomo nyangnu" gi- Mangsoo: nyheung' to" deingbyeing" khyoo: moo acang boem.
4 Houg: yoomo Khristu gi tarha" pyaid ri thang loo" nhang: bye nghoid yoomo Aseing ri loem" jeing" mo dangain" ri nya: da" shidkhoin" moo deingbyeing" mo bue" loo wa da" akhang" ri Mangsoo: byid: bye:.
5 Moshe da" tarha" ri cang lho: Mangso da" shid moo deingbyeing" mo, yo" bue" lo da" khyoo: yo" lho:- Moshe gi tarha" cang mo gi kangso dei nyid wa ga tid to".
6 Nghoid loug we' loem" jeing" khyoo: khyo" Mangso da shid moo deingbyeing" zi yo" lho: jhoem: mungdang: moo kha: yug gi mougkhung: khyoo: yo" ju" loo" wa lha"- ein: nanya: gung ri nanyang: atid'.
7 Khayug gi moovoo moug: khyoo: yo" gyoo" loo" wa lha ga:- nyang: nya: gung ri amyid: yu" goo"- ga: wigi (Tid nau da" dang: gung gi- Khristu ri mougkhung: tho' mo ngoonu" jhang gyoo" loo wa shid re" khayug gi mougkhung: khyoo: do lo" lho: khe: khyo yu la". Khristu ri shid: jangmo doem dei to'' loo wa da shid re" khayug gi moovoo moug: khyoo: gyoo" lo" lho: lo" khe: thoid' yu la"? ga: bo nyid).
8 Jhoem: mungdang: moo tid nau zi gi- Mungdang: tarha" gi re" da" nam moo nyang: jo bye:. Hau: mungdang: tarha" ri re" da nhoid' moo yhen: yu lho: re" da" nheigloem: ung: khoug: moo xoem" too" bye:- ga: wigi tid. Hau: mungdang: tarha" ga: zigi nanu" ri ngoo kho" kyo" Mangsoo: ri loem" jeing" khyoo: yo" da" mungdang: nghoid.
9 Hougsu" wigi Yesu gi Aseing nghoid ga: wigi re" nhoid' moo yhen: yu lho: Mangsoo: gi- Hau da" Aseing ri shid: da" jangmo doem dei to'' loo nhang: da" khyoo: ri re" nheigloem: ung: khoug: moo loem" jeing" nghoid rigi nang Mangsoo: da" khyoid yu zi shau" wa nghoid.
10 Khasu" wim ga: ri nanu" gi nheigloem: ung: khoug: moo loem" jeing" khyo" Mangsoo: da" shidkhoin" moo deingbyeing" mo yo" bui" wa akhang" yo" lho: nhoid' mo yhen: yu khyo" khyoid yu khyoo: ri yo" yu zi nghoid.
11 Hau: jhoem mungdang: moo hang" nghoid loug we' Aseing Yesu ri loem" jeing" mo, gi nheigloem: byo, loo" wa khyoo: aboo loo: ga: tid to".
12 Phoo' Mangsoo: gi byu xangsu: yi dangain" bang: da" kangso Aseing nghoid lho:- nyang: gi akyu" mho' mo dangain" ri joeb byeung" da mainkaid jeju" byid. Houg: yoomo Yuda byumyu" yo' tungbau byumyu"- ga: suid" aphyed'.
13 Jhoem: mungdang: gi Mangsoo: ri akyu" mho' mo dangain" ri khyoid yu khyoo: yo" yu wa ga: toin" shid to".
14 Nghoid loug we' houg: bang: gi- vhu" vang loem" jeing" khyoo: abo rigi- Khasu" wigi- Aseing jhang akyu" yhe se' mho' wa lha". Mungdang: tarha" ashoug" gyo: rigi- khasu" wim vhu" vang se' loem jeing" wa Mungdang: tarha" kho" kyoo" su: anyid ri khayo se' shoug" gyoo: wa
15 Kho" kyoo" wa shid re" nhang: kaid su: abo ri khasu" se' kho" kyoo" wa. Jhoem: mungdang: moo bo zi yo" dakhyoo" ti" ngeibu: lu dang: gi ri voin loo mo da" khyid: yi gi- khayhi' young" du nyid boem lha"? ga: lhid" to".
16 Nghoid loug we' hau ngeibu: lu dang: gi ri byu dangain" mo aloem" jeing" boem. Lapi: Esaia tid to" zi gi- O" phoo' Mangsoo: we" ngoonu" tid fu" da" ngeibu: lu dang: gi ri- hang" loem" wa lha"? ga: tid.
17 Houg yoomo byu yi gi Mungdang: shoug" gyoo: yoomo vhu" vang loem" jeing" lo boem. Byu dayug gi Khristu da" khyoo: kho" kyoo" yoomo byu yi gi mungdang: ri yo" shau" gyo: boem.
18 Hougsu" nghoid loug byu yi gi- hau da" mungdang: shoug" gyoo: wa akhang" ajo la" ein: ngoo myid nau.
Byu yi gi shoug" gyoo: wa da" akhang" gyeing" gyeing" yo" boem.
Jhoem: mungdang: moo mungdang: tarha" ri kho" khyoo" su: da" thui: gi
mougmyid dagyab goin" moo fu" neing" loo" bye:.
Nyangnu" da" tarha" dang: yigi mougmyid ayam loem: kheing' goem: sho' ngam loo" bye:>>
ga: tid zi yo" dakhyoo" nyang: nghoid bye:.
19 Ngoo dalheung: doem myid shi" wa Israela byumyu" yigi
hau da" khyoo: ri ase' gyo: boem la".
Mangsoo: gi Moshe khyo" wigi
?Ngoo gi ci: anghoid da byumyu" ri ci lho:- no" zo' vo da nheigloem: kaid byid wa.
Agyeing" da" byumyu" khyo: wigi nga" da" byumyu" ri nheig ze" shoo" byid: wa?
ga: wigi xangshid" phoid: kyo".
20 Mangsoo gi Esaia khyo" tid to" zigi
ngoo ri ashoo: mo, gi shau" myang boem
nga" da khyoo: ri amyid aphoid: sho: mo, gi ngoo ri shau" myang boem?
ga: wigi gyeing" nyang: tid to".
21 Nghoid loug we' Israela byumyu" yi da khyoo: gi ?Ngoo ri pyi: sho: gyi koid lho: nga" dang: ri atam" gyo: da" byumyu" ri ngoo gi danyid" goin" lo, fe: khe: nyid? ga: Mangsoo: tid da" khyoo: Esaia xo' tid to".