ROMA
PHUNG: BYU YI JHANG FOIN: KAID DA" MOUGSOUG"
(Romans)
Lagyoo Polu gi- Roma voomoo" Khyoo: Ju" Yhi: wa shid re" myed soin' teing to" zi yo" dakhyoo" to" no, re nyheung' soin' ayang: qei" lo" khyo" wigi he: Roma lhid" pug ri lhid" to" da" zi nghoid. Nyang: myid to" zigi- hau: voo mo Khristain: yi jhang moo moo" yhe: voin lho:- nyangnu" bo pang" thoug byid: ziyo' Spin: mung" moo sasana yhe: koid wa shid re" myid to".
He: da" Roma lhid" pug moo nyang: gi- nyang: se' gyo: yu da" Khristain noku loem khau khyoo: yo' hau: thung" tarha" yo" dakhyoo" ti" Khristain yi cang zei: yhi: ca" da" khyoo: yi ri Jhau" kyeing" to". Khristain: yi da thung" tarha" yo sen: lho: wigi- lagyoo Polu jhau" byid: mungdang: mo- he: jhoem: pug gi- jhoeb byeung" thang jhoem: pug nghoid bye:.
Lagyoo Polu gi Roma voomoo" mo phung: byu yiri- u" dang: tid lho: hougbang: ri myid boin: akyu" mho' byid: khyoo: bain tid lang" nyang: lhid" kaid nau da" dang: khyoo" zeing ri tid kyo". Hau: dangkang: yhau: gyen: khyoo: joem gi loemkhau: mo ri Mangsoo: shidkhoin" moo byu yi kham: yu wa shid re" khyoo: tid kyo" nyid ein: da" lu dang: nghoid. ( 1:17) He: loemkhau: khyoo: gi xangshid" mo zi lo" thang sho' cang ca" zi nghoid.
Hau: thang: ri lagyoo: Polu gi hau: dangkang: agung ri gyi" gyi: lam lam doem xo' phid: kyo". Yuda byumyu" yi yo" tungbau byumyu" yi boo sho' byu xangsu: yi dangain" gi yooboo yoem so' khoug: moo loung" jo mo za: nghoid boem yoomo Mangso da" shidkhoin" moo byugi yi khyo" doem kham: yu wa ca" nyid. Hougsu" Mangsoo: shid moo yo" kham: yu wa shid re" Yesu Khristu ri loemkhau: ca" da" khyoo: ri jhoug" byid. Houglang" she'- Mangso dadeing: daloem: za: bue" loo bye ein: da" Mangsoo: yo' loem" jeing" da" pyaid seig bue" loo wa nghoid. Khristu ri loemkhau: su gi- Mangso shidkhoin" moo byugi yo" soin: wa da akhang" yo" yu lho:- Mangso da" young" gyeing" Venyi: gi hougbang: ri yooboo yoemso yo' shid: lo" da" akhoug: mo loid byoin loo" wa akhang" ri byid bye:. Abeing: 5-8 moo ju" sho' Mangso tarha" da myidsoin' khyoo: yo' Aseing" ri loemkhau: su: ri Mangso da" Venyi: yoemso gi yu" goin coung: nyid khyoo: ri lagyoo: Polu gi sham: go" to". Hau thang: Yesu ri Yuda byumyu" yi she: pyam da" khyoo: gi- byu xangsu: dangain" gi- Aseing Yesu khyo" wigi- Mangso da" jeju" ri shau" kham: zoo: wa shid re" nghoid. Yuda byumyu" yi gi- Aseing Yesu ri khanham' we' jha" she: pyam wa zi anghoid ein: loem" da" khyoo:- Khristain pyaid khasu" cang yhe: loo" wa da" akhyoo" again joem ri we' je wigi subi" yo" loem" jeing" lo" da jang" moo jheddab da" tarha" ri khasu" ci: loo" ca" khyoo ri Polu lhid" to". Hougsu" lhid" byid: jang" moo Mangso da" moozoo" ri voinvu da" khyoo:- nyang: nya: mungdain: yo" byumyu" shid re" Khristain: yi yo" bo voinvu ca" da" khyoo:- nheigloem: soozoo: yo" sen: da" khyoo: joem ri bain lhid" byid thang ri nya: mungdang: yo" lho: Mangso myeing ri coung" wigi- he lhid" pug ri dang: thang: said pyam bye:.
1
1 Nya: ngeibu lu dang: gi ri fu" kaid wa shid re" lagyoo: gyeing" dayug khyo" Pho' Mangsoo: khyen: yu nyheung' too" su:- Khristu Yesu da" deizoo: ngoo Polu gi- mougsoug" lhid" kaid.
2 Goonham' mo Mangsoo: gi nya da" lapi: yi khyo" hau: ngeibu: lu dang: ri kyo" kaid wa ga: dang: soo" to" zi yo" dakhyoo" gyeungshang: jhoem: mungdang: moo lhid" to".
3 Hau: ngeibu lu dang: ein: zigi- David akung: mo khu: lo lho: Xangsu: byugung re" void da" Mangso nya: zoo: ngoonu" da" Aseing Yesu Khristu da" khyoo: nghoid.
4 Mangsoo: gung khyoo" gi- Mangso da" nya: zoo nghoid da" khyoo: ri thu bang shug wa shid re" Mangsoo: gi agoin athang da" yoem: moo" khyo" hau: Aseing ri shid: jangmo doem dei to' loo nhang: bye:.
5 Mangsoo: gi hau Khristu khyo" wigi- byu dangain" mo, ri loem khau loem" jeing" tam" gyo: loo wa shid re" ngoo ri phoug" dab thang da" shu" u" lagyoo: zeing dayug khyo" aya: tang: byid: bye:.
6 Roma voomoo" moo nyid da" nanu" we' Yesu Khristu da" phung: byu agyeing" yi khyo" Mangsoo: khyen: yu too" mo nghoid yoomo hau: byuphung: moo boo mo nghoid nyid.
7 Mangsoo: gi jheddab yoomo nya: byu yi bue" loo wa shid re" khyen: yu to" da" Roma mo phung: byu dangain" mo jhang khyoo: he: mougsoug" ri lhid" foin: kaid. Ngoonu" da" nya phoo Mangsoo: yo' Aseing Yesu Khristu jhang mo je" ju" yo' myenjham" khyoo: ri nanu" yo" yu boem baja" o".
8 Yesu Khristu ri nanu" Loem" jeing" da" khyoo: gi Mougmyid gyab goin" fu" nheing, loo" yoomo ngoo gi nanu" dangain" shid re" Yesu Khristu khyoo: ngoo gi nga" Mangsoo: ri xangshid" coung" nghei" nyid.
9 Nya: zoo: da" khyoo: ngeibu: lu dang: gi ri tid fu" lo" khyo" wigi- ngoo gi Mangso moozoo" voin vu nyid. Ngoo gi akyu" mho' khang" moo" moo nanu" ri ajang" myed boin nyid da" khyoo: ri Mangsoo: nyang si gu nghoid bye:.
10 Vho: ngei nghoid rigi- athei" myang" ri nanu" jhang moo ngoo yo" ri" wa da" khyoo: bang" loo wa shid re" ngoo Mangsoo: ri mho' nyid.
11 Nanu" da" nheigloem: geing: teing jo wa shid re" nanu" ri Venyi: jhungshug gam byid: noug yoomo ngoo gi nanu" yo" gye myang" mo shau" goo" nau nyid.
12 Ngoo tid nau zigi- nanu" da" loem" jeing" nheigloem: yo' ngoonu" da" loemkhau: zi yo" gootu: byu yi ri pang" wa shid re" ngoo nanu" ri vho: nyid. Nanu" da" nheigloem: gi ngoo ri pang" thoug wa- nga" da" loemkhau: nheigloem: we' nanu" ri pang" thoug wa.
13 Nga" mangnhung" yi we"- Yuda byumyu" anghoid da" tungbau byumyu" yi jhang moo Mangsoo: moo" zei: ri oung: doid lo" yhang: ti" nanu" jang" moo we' oung: doid loo" wa shid re" ngoo gi nanu" jhang re" wa shid re" alheung: lheung: myid soin' bye:. Nghoid loug we' akhyoo" aeung: shi" yoomo ayo" ri" shi" da" khyoo: nanu" myid boin: nyid ge'.
14 Byumi" yi- byukyang: yi- phajhi" si mo,- asi' mo,- dangain" da shid re" ngoo moo yoovoin boo yoomo
15 Ngeibu: lu dang: gi ri Roma voomoo" moo nyid da" nanu" ri we' kho" kyoo" wa shid re" nheigloem: gye" tho' nyid.
16 Ngoo gi ngeibu lu dang: ri nheig shid: nheig deig loemkhau: bye:. Hau: lu dang: gi loem" jeing" mo, dangain" da" Yuda byumyu" yi yo" tungbau byumyu" yiri xangshid" khyoid yu da" Mangsoo: yoemso phung" yoeb nghoid.
17 Phoo Mangsoo: gi- byu xangsu: yi ri khasu" vho: ngei kham: yu da" khyoo: ri ngeibu: lu dang: mo tid pang toin" shid nyid. Hau: da" khyoo: gi xangshid" mo zi lo" thang ju" sho' loem" da" nheigloem: mo, ayang: qei" to" da khyoo: nghoid. Houg: yoomo jhoem: dang: moo tid zigi- Mangsoo: vho: ngei kham: yu zi shau" su: gi- loem" khyo" kangso dei nyid ca"- ga: bo.
18 Deingmain" da" khyoo: ri byu yi asi wa shid re" toem' jhed' to" da" agyeing" ashoeb' da" yooboo dangain" ri mougkhung: mo Mangsoo: nheig no yo: khyoo: ri pang shug nyid ziri se' lo boem bye:.
19 Mangsoo: gi hougbang: ri jhoug" mho' dam kaid bye: yoomo Mangsoo: yo" sen: da" si' ca" gu: dangain" ri Mangsoo: gi bang" bang tid kyo' kyoo" bye:.
20 He mougmyid ri Mangsoo: phain" to" da akhyeing: mo nyang: xangsu: byu yigi Aseing da" athang agoin myonhoo: phung" yoeb ri we' Aseing gi Mangsoo: agyeing" nyang nghoid da" khyoo: ri we' goolhoo: nyang: si bye:. Nyangnu" gi hid te" da" Mangso myonhoo: ngeilang: ri amyang yu" nghoid loug yo" se' boem. Hougsu" yo" se' da" khyoo: gi nyangnu" gi Mangsoo: phain" to" da" zi yoo joem ri myang yoomo nghoid. Houg: yoomo houg: bang: gi nyangnu" nyang: shoid vhang: da" yau: noo yooboo da shid re" lhoid' pyoin' wa da" khyoo: aboo loo.
21 Nyangnu" gi Mangsoo: ri se' boem nghoid loug we' Mangsoo: da" phung" yoeb yo" jeju" coung" nghei moin: loug we' acung" anghei' byid: boem nghoid ago". Coung" nghei wa gung thid'- akyu" abo da" moo" ri za: myid soin: yu" nyid ago" . Nyangnu" da" asi ayeig da nheigloem: ung: khoug: moo mougcoid wigi nghoeb' to"
22 Nyangnu" tid zi gi- nyang: nya: da" gung ri phajhi" bo ga: myid boem: nghoid loug we' ce: phajhi" we' abo mo nghoid boem.
23 Ase' shid: da" Mangsoo: ri noku ca" nghoid loug- se' shid: lo" da byu nghoo: joem- myid: khyid: dab da goug: nyoug joem- hougsu" anghoid lang" do: yu: lo" se' da" gougnyhoug yi ngho' joem da" soolhoo: joem ri no' boem ago"
24 Hau: khyoo: yoomo Mangsoo: gi xangsu: byu yi ri nyang: nya: myonhoo: ze" shoem: pyam lho: nyang: nya: nheigloem: nya nheug yo: khyoo: cang loo" wa shid re" nyangnu" nyang: ri she: pyam too" bye:.
25 Nyangnu" gi- Mangso deing: main" da" tarha" ri shoid da" khyoo: yo" thid' go" pyam. Phain" so: too" su: da" gung thid' phain" to" da" zi ri te: loem no" ago". Phain" so: to" da Aseing myonhoo: phung" yoeb ri khanham' we' loem khau noku boem baja".
26 Houg: su" nghoid yoomo Mangsoo: gi xangsu: byu yi ri aco' ajhoid' da: nyam yo: aved avhu: da" khyoo: moo cang loo" wa shid re" she: pyam too" bye:. Myiyi: yi we" tarha" khyoo: khyo" gi anyid looza: myiyi: nyang: cang" zoem" go" lo" boem.
27 Houg: yo" dakhyoo" ti" yuggi yi we"- myiyi: yi yo" loem" jeing" nyid akhyoo" khyo" akoid' loo: za:- yuggi nyang: cang" nyam' yo: avoid avhu: khyo" cang wigi- yuggi nyang: cang" asho' ashid: koid nyid: lho:- nyang: nya: aco' ajhoid' zei: da moo" zo" moin: yi" yooboo aphoug" ri kham: zo nyid abye: go".
28 Xangsu: byu yi gi Mangsoo: vho: zi ri ashau" myid boem yoomo Mangsoo: gi nyangnu" ri she: pyam to" wigi- nyangnu" gi deingmain" khyo" ayo" myid yu boem loo: yoomo akoid' eung: da" moo" ri koid lo" boem bye:.
29 Nyangnu" gi aco' ajhoid' akhyeing" ashoeb' da" moo" aja: ja: anyoin: athoung" zi mougmyid ziyoo ri loug gyi: zi- nheigloem: byo, lo" khyoo:- byencang" ri nozo: khyoo:- subi" kang: ri said khyoo:- byo, go" khyoo:- mhoug fain" zo: khyoo: pyi: cang sho: khyoo: joem ri shoid vhang: nyid boem. Nyangnu" gi- lu wim gei sang: se' ago".
30 Dang: so' so'- subi" myonhoo: shoem: nhang: Mangsoo: ri we' ngheung" avhoo: mo, nghoid. Nyang: cang" nyang: juang" go"- nghoidboin: yung" thui: gyo:- phau: fain" vo: ngeug se: subi" ri aphoug"- age khyoo: aja: ja: ri nyheung' soin: zei so' se' boem. Nya: myhi' nya: pho' dang: ri we' atam" gyo: boem.
31 Nheigloem: azung" mo, dang: soo" lid: mo, subi" ri nheig khyeug nheig myen: nheigloem: we' nyangnu" ayo" toin" shid.
32 Hid: yhang: te" mo gi shid: moin: nyid ga:- Mangso mungdang: moo tid to" khyoo: ri nyangnu" nyang: si gu nghoid loug we' nyangnu" gungdu: nyang: he: moo" ri zei: tho' moo agoo" hid: su" cang zei: nyid mo ri we' yoem: byid: tu: to' gau yi nyid boem nhung: lha".