5
1 Ref 5.1: Apm 35:22: 49:3,4. Hid bang: gi Yaku da" yuggi zoo: yi mo mang mo" yug Ruben da" amyed ashen yi nghoid ago". (Nyang: gi nya: pho da" dangcang: myhi' dayug yo' gung shoo" zoem" yoomo zooshid" aya: ri ayo" yu nghoid da:. Hau: aya: ri Yoseb shau" yu lo" da:.
2 Ref 5.2: Apm 49:8-10. Nghoid loug we' Yuda byumyu" kung: gi yoem: bo thang da" byumyu" kung: bue" lo lho: byumyu" kung: dangain" bang: shid re" vhoebkhang" su: bue" lo da:.)
3 Yaku da" yuggi zoo: yi mo mang: moo" Ruben gi Hanug- Palu- Hezron yo' Kharmi ga: da" yuggi zoo: myid: yug yo" da:.
4-6 Ref 5.6: 2Kh 15:29. Hid bang: gi daxeig mo daxeig nyid gyoo" re" boem da" Yoela da" amyed ashen yi nghoid ago". Houg: bang: gi Shemaia- Goga- Shime- Mikha- Reaia- Bala- Bera bang: nghoid ago". Asuri khosen Tiglad Pilesera gi byumyu" kung: da" vhujhung: Bera ri myheug yu lho: shu" lo" byug da:.
7 Vhoo: moo: lhid" xoem" to" zigi Ruben byumyu" kung: yi mo vhujhung: yi da" yhoemkhung: zhayhen" nghoid da:. Houg: bang: gi Yeila- Zekharia-
8 Bela bang: nghoid. Bela gi Azaza da" yuggi zoo:- Shema da" myid: zoo:- Yoela da" kung: mo nghoid da:. He: akung: ako' yigi Aroera yo' hau: mougzhung: shoid mo zi: Nebo yo' Bala Meon ju" sho' mo mougmyid moo: nyid boem ago".
9 Nyangnu" gi Gilead mung" moo: goug: nyhoug kyung myoo" sho' yo" ago". Houg: yoomo nyangnu" gi bidthu shoid Uphrad gyung: khyoo: ju" da" khyoo: khaid nghoid da" dain" pyoid yoo moo: ju" sho' da" mougmyid ri seing: yu pyam da:.
10 Khokham Sholu da" pyaid moo: Ruben byumyu" kung: yigi Hagara byumyu" yiri gyi yhe: zain: lho: gyi khaid pui" moo: nyangnu" ri said pyam ago". Houg: lho: Gilead mung" bidthu shoid mo nyangnu" mougmyid ri seing: yu pyam ago".
11 Gad byumyu" kung: yigi Ruben byumyu" kung: yi da" mougzhung: shoid mo: jo, wigi bidthu shoid Saleka ju" sho' nghoid da" Bashan mung" moo: nyid boem ago".
12 Yoela gi byumyu" kung: yi da" vhujhung: nghoid wigi Shapham gi nya: vhoo: mo yhouggyen: thang yug nghoid da:. Yanai yo' Shaphad kung: bang: gi Bashan mo gootu: vhujhung: kung: bang: nghoid.
13 Gootu: byumyu" kung: mo bang: gi vhoo: moo: lhid" to" da" byumyu" nyhed kung: mo nghoid da:. Houg bang: gi Mikhaela- Meshulam- Sheba- Yorai- Yakham- Zia yo' Ebera kung: bang: nghoid ago".
14 Nyangnu" gi Huri da" yuggi zoo: Abihala da" amyed ashen yi nghoid ago". Nyangnu" da" phoug" phyid" yi vhoo: mo yo' dakhyo" yo" shab tau" da:. Houg bang: gi Abihala- Huri- Yaroa- Gilead- Mikhela- Yeshishai- Yado- Buza bang: nghoid.
15 Abdiela da" yuggi zoo: Guni da" myid: zoo: Ahi gi he: kung: bang: da" vhujhung: yi nghoid da:.
16 Nyangnu" gi Bashan yo' Gilead moug: moo: jo, da" voogung joem moo yo' Sharon mung" mo coung yoo dangain moo: nyid boem ago" (
17 He: lhid" xoem" joem ri Yuda khokham Yotham yo' Israela khokham Yeroboam da" pyaid moo: lhid" to" zi nghoid da:.)
18 Ruben- Gad- Bidthu shoid Manashe byumyu" kung: yi mo goo joem Shamcoin" joem yo' lid: joem ri ci: jang" moo: kung sho' jhau" to" da" gyizoo: 44760 yug nyid da:.
19 Nyangnu" gi Hagara byumyu" Yetura- Nephisha- Nodab kung: bang: ri gyi yhe: zain: ago".
20 Nyangnu" gi Mangsoo ri khoug: nghe: wigi pang" thoug wa shid re" nyang: ri akyu" mho' boem. Mangsoo gi nyangnu" akyu" mho' thui: ri tam" gyoo: byid: wigi Hagara byu yi yo' nyangnu" da" myid veing" bidnoem yiri oung: pyam nhang: da:.
21 Nyangnu" gi gyivoo yi mo Gola-ug 50000 du:- Yang 250000 du:- Loo zei: 2000 du: ri seing: yu lho: gyi khaid pui" mo thung: byu 100000 yug ri myheug yu ago".
22 Nyangnu" gi gyivoo myoo" sho' ri we' said pyam ago". Ciwim gari gyipui" gi Mangsoo myid vo: khyoo: nghoid. Houg: lho: nyangnu" gi pyoung" shu" loo" shau" da" bidnyid ju" sho' hau: mougmyid moo: nyid boem ago".
23 Bidthu shoid mo Manashe byumyu" yigi Bashan mougmyid mo mougzhung: shoid Bala Hermon- Senira- yo' Hermon boem ju" sho' moo: de: nyid boem wigi nyangnu" gi myo: je: gyi: sheung: lo boem ago".
24 Vhoo: mo bang: gi nyangnu" kung: mo vhujhung: yi nghoid ago". Houg: bang: gi Ephera- Ishi- Eliela- Azriela- Yeremia- Hodavia yo' Yadiela bang: nghoid. Nyangnu" dangain" bang: gi bugthu sheing" jhu" da" gyizoo: yi nghoid wigi nyangnu" byumyu" kung: yi da" myeing gyi vhujhung: yi nghoid ago".
25 Nghoid loug we' byumyu" yigi nyangnu" phoug" phyid" yi da" Mangsoo ri jhug azug lho: to" pyam da:. Mangso wigi hau: mungdain: mo khaid thu pyam bye: da" byumyu" yi da" yu phara" soolhoo: joem ri no' ago".
26 Ref 5:26: a 2Kh 15:19: b 2Kh 15:29: c 2Kh 17:6. Houg: yoomo Mangsoo gi Asuri Khosen Pula (Tiglad Pilesa ga: we' myeing yo") ri nyangnu" mung" khyoo" jhen" vang yhi: nhang: da:. Nyang: gi Ruben- Gad- Bidthu Shoid Manashe byumyu" kung: yiri meing: pyoung" pyam lho: nyangnu" ri Hala- Habora- Hara yo' Gozan gyid yam moo apyaid atoo: de: nyid nhang: da:.