17
(2 Sam 7:1-17)
1 Akhid" khokham David gi nya: khokham kho" moo: nyid nyid da:. Danyid" gi nyang: Nathan ri khi nhang: lho: nyang: ri ?Ngoo gi shamu thi" yo' koid to" da" yhoem: moo: nyid nghoid loug we' Aseing da" Dang: Theing Kuid: gi zoem" mo to" to" da? ga: tid.
2 Nathan gi ?Nang myid to" zi ja: khang" moo" ri koid we'. Ciwim gari: Mangsoo gi nang yo' dage" nghoid da" ga: tid da:.
3 Nghoid loug we' hau: myen ri Mangsoo gi Nathan ri dang: tid da:.
4 Nyang: ?Nga" dei zoo: David jhang yhe: wigi ngoo nyang: ri tid ziri tid kyoo" we'. Hau: zigi ?Nang gi ngoo nyid wa nga" shid re" Noku Yhoem: Moo" koid wa su: anghoid.
5 Egutu mung" mo Israela byu yiri ngoo khyoid yu da" ayo, mo akhid" nyid" yu" sho' ngoo gi Noku Yhoem: Moo" moo: khanham we' anyid yu". Ngoo gi khanham we' zoem" joem mo za: nyid lo wigi da joyoo mo zi da joyoo khyoo: thoid shu" yen" da:.
6 Israela byu yi yo' dage" nga" gyung: khyoo: thang sho' moo: shamu thi" yo' koid da" Noku Yhoem: ciwim ngoo ri akoid byid: boem la' ein: ngoo nyangnu" vhujhung: yi kha: yug ri we' khanham atid yu"?.
7 Houg: yoomo yoem: moo" bo Aseing ngoo nyang: ri tid nyid khyoo: ri nga" dei zoo: David ri tid kyoo" we'. ?Ngoo gi nang ri coung" yoo moo: yang joem lhoug zung" nyid jang" mo shu" yu lho: nga" Israela byumyu" yiri vhoebkhang" su: khyoo" yoovoin byid: too" bye:.
8 Ngoo gi nang khamoo: nyid khamoo: nang yo' dage" nyid lo wigi nang gyi zain: yhe: lo" uri ngoo gi re" gyivoo gi dangain" ri nang oung: sho' koid bye:. Ngoo gi mougmyid tho' moo: gyi: sheung: thang da" vhujhung: yi yhi nang ri myeing gyi: nhang: bye:.
9-10 Ngoo gi nga" byumyu" Israela shid re" joyoo daloem: ri khyen: yu lho: hougmoo: nyangnu" ri nyid nhang: bye:. Nyangnu" gi hougmoo: zeig zo: zi ashau" loo goo" wa. Nyangnu" he: mung" khyoo: vang lo da" ayo, moo: athoug" akhyoug: da" byumyu" yi wigi gyi khaid zain: da" khyoo: ri thung" shau" bye:. Nghoid loug we' hougsu" khanham we' adoem bui" loo: wa. Ngoo gi re" gyivoo dangain" ri oung: pyam nhang: wa yo' nang ri amyed ashen byid: wa dangsoo" byid:.
11 Nang shid: lo" wigi re" phoug" phyid" yi yo' dage" myhoeb shoung: pyam lang" re" yuggi zoo: yi mo dayug ri ngoo khokham koid nhang: lho: nya: mungdain: ri yoem: bo jo, nhang: wa.
12 Nyang: gi nga" shid re" noku yhoem: koid byid: wa su: nghoid wa. Nya: da" khokham byuxeig gi apyaid atoo: moo: geing: teing jo, wa.
13 Ref 17:13: 2Ko 6:18: Heb 1:5. Ngoo gi nya: phoo bue" lo wigi nyang: gi nga" yuggi zoo: bue" lo wa. Nang khokham bui sho' ngoo yu pyam da" Sholu ri ngoo koid lo yhang: ti" nyang: ri ngoo pang" thoug ziri nyang: mo ngoo atau" yu wa.
14 Ngoo gi nga" byumyu" yi atho' moo: we' nga" mungdain: atho' moo we' apyaid atoo: nyang: ri vhoeb nhang: wa. Nya: da" khokham byuxeig gi khanham we' athang wa? ga: tid.
15 Nathan gi nyang: ri Mangsoo pang shug bye: gu: ja: khang" moo" David ri tid kyoo" bye:.
(2 Sam 7:18-29)
16 Hau: thang: khokham David gi Aseing da" shidkhoin" zoem" khyoo: vang yhe: wigi zhung jo, lho: akyu" mho' zigi ?Aseing Mangsoo we"- ngoo ri yo' nga" yhoemkhung: ri nang koid bye: da" gu: gi ngoo yo' amoin: yi" nghoid da:.
17 Nghoid loug we' akhid" nang je myoo: sho' lang" koid abye:. Nang gi ju" loo wa ayo, mo nga" amyed ashen yi khyoo: yo' sen: wigi dangsoo" byid: to" abye:. Nang Aseing Mangsoo gi ngoo ri byu zeing dayug yhang: ti" koid abye:.
18 Nang ri ngoo ci su" tho' tid loo: wa la". Nang gi ngoo ri nyeing" za: se' da:. Nghoid loug we' re" dei zoo: ngoo ngi: shab byid: da:.
19 Ngoo ri hid: su" koid wa ziyo' nga" da" ju" loo wa ayo, mo gyi sheing: khyoo: nang ngoo ri ci shug byid: wa zigi re" myid vho: khyoo: yo' re" myid too" jang: nghoid da:.
20 Aseing we"- nang yo' du zi hang" anyid. Nang dayug kyeing" Mangsoo nghoid ziri ngoonu" khanham we' se'.
21 Na nya: byumyu" bui" wa shid re" nyangnu" ri join bue" nyid jang" mo khyoid yu da" Israela byu yo' du zi mougmyid tho' moo: ci: byumyu" we' anyid nghoid ago". Nyangnu" shid re" nang koid da" gyi sheing: khyoo: yo' mau" pho" moo" joem gi mougmyid goem: sho' re" myeing gyi: khyoo: fu" pyo: kaid abye: go". Nang gi re" byumyu" yiri Egutu mung" mo khyoid yu wigi re" byumyu" yi shid vhu" khyoo: jhen" yhe: lo" uri gootu: byumyu" yiri nang houg: mo khaid thu pyam da:.
22 Nang gi Israela byumyu" yiri apyaid atoo: moo: nanya: byumyu" yi khyo" koid yu wigi nang Aseing gi nyangnu" Mangsoo bue" loo bye:.
23 ?O" Aseing we"- akhid" ngoo yo' nga" amyed ashen yi yo' sen: wigi nang tid to" da" dangsoo" ri joeb byeung" loo nhang: we'. Nang koid wa tid to" ziri we' koid we'.
24 Re" myeing gi gyi: sheung: loo wa. Byumyu" yigi ?Yoem: moo" bo Aseing gi Israela yi da" Mangsoo nghoid da? ga: tid loo goo" wa. Houg: lho: nang gi ayo, khang" moo" moo: nga" khokham byuxeig ri zei ci: loo wa.
25 Nga" phoo Mangsoo we"- nang ri he: akyu" mho' dang: yo' mho' wa ngoo yoem: yo" da:. Ciwim gari: nang gi re" dei zoo: ngoo ri he gu: dangain" ci: shug byid: bye:. Nang gi nga" amyed ashen yiri khokham koid nhang: wa ga: ngoo ri tid too" bye:.
26 Aseing we"- nang gi Mangsoo nghoid da:. Nang gi he: mau" pho" dangsoo" ngoo ri byid: too" bye:.
27 Nyangnu" re" ngi: shab khyoo: ri xo' lho: kham: zoo: zoo" baja" nga" amyed ashen yiri mainkaid byid: wigi re" mainkaid jeju" gi nyangnu" atho' moo: apyaid atoo: deing jo, baja" o"? ga: akyu" mho' da:.